Sundin ang GCQ guidelines, pero dapat may malasakit pa rin para sa mga senior citizens

Sonny Angara / Agarang Solusyon

Nitong Hunyo 1, ganap nang ibinaba ng gobyerno ang estado ng ating kuwarantina sa general community quarantine o GCQ.

Ano ang ilang mahahalagang nilalaman ng GCQ?

Ang ilan sa mga patakarang nasasailalim dito ay tulad ng paglilimita pa rin sa galaw ng publiko. Halimbawa, maaari lamang lumabas ng kanilang tahanan ang mga residente kung kailangan nilang bumili ng mga pangunahing pangangailangan sa bahay o essentials o kailangang pumasok sa trabaho na kabilang sa mga tanggapan at industriya na pinapayagang mag-operate sa ilalim ng GCQ. Hindi pa rin puwede ang mga pamamasyal.

At nasasailalim pa rin dito na bawal pang lumabas ang mga residenteng may edad 21 pababa at 60 pataas o ang mga tinatawag nating senior citizens. Hindi pa rin pinapayagang lumabas ang mga kababayan nating may mga malulubhang karamdaman, sapagkat sila ang pinakamadaling mahawahan ng COVID-19 dahil sa mahina nilang resistensiya. Kasama rin sa mga pinagbabawalan ang mga buntis.

Nabanggit na rin lang natin ang edad 21 pababa, senior citizens at ang salitang “essentials” para sa kaalaman ng mga kinauukulan, malinaw ang isinasaad ng GCQ guidelines: Hindi pa rin sila maaaring lumabas ng bahay, liban na lamang kung sila ay bibili ng mga mahahalagang bagay tulad ng gamot, pagkain at para sa essential services tulad ng pagkuha ng ating mga lolo’t lola ng kani-kanilang pensiyon.

Paano nila makukuha ‘yan, kung pagbabawalan silang lumabas ng kanilang bahay o restricted sila sa pagpasok sa mga establisimyento o sa paggamit ng iba’t ibang uri ng transportasyon?

May isa nga raw senior citizen ang hindi pinasakay sa public transpo dahil na rin sa batas na ipinatutupad ng IATF-EID. May isang lola naman na ilang oras naglakad papuntang MRT-3, pero nakapanlulumo na pagdating niya sa istasyon, hindi naman pala siya puwedeng papasukin sa tren dahil nasa batas na bawal pang bumiyahe ang mga seniors. Ang pakay nila sa paglabas — kukuha ng pensiyon.

Nasabi na natin at sasabihin nating muli: Sentido komon lang ang kailangan natin sa pagsasaalang-alang sa kapakanan ng ating senior sa panahong ito. Isipin naman natin kung paano nila makukuha ang mga serbisyong nakalaan sa kanila kung ‘ikukulong’ lang natin sila sa kanilang tahanan?

Halos tatlong buwan tayong humimpil sa ating mga bahay. Sa loob ng tatlong buwan na ‘yan, matinding hirap ang inabot ng seniors natin dahil hirap silang makabili ng kanilang gamot at iba pang kailangan dahil sa mga restriksyon sa kanilang kalagayan.

Para sa kaalaman ng mga kinauukulan, marami pa sa ating mga lolo at lola ang matanda lang sa edad, pero mas malalakas pa ang katawan at maaari pang magtrabaho.

Malinaw sa mga patakarang ipinatutupad sa ilalim ng GCQ, ang ating seniors ay hindi pagbabawalang sumakay sa public transportation basta’t ang kanilang lakad o pakay sa paglabas ay pasok sa ipinatutupad na guidelines ng IATF. Huwag natin masyadong sikilin ang karapatan ng ating seniors sa panahong ito dahil may mga matitindi rin silang pangangailangan.

---

May katanungan ka ba, reklamo o nais ihingi ng tulong? Sumulat sa AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Free COVID-testing, sagot ng PhilHealth; PUI, may P18,000 budget din

Sonny Angara / Agarang Solusyon

Nitong nakaraang araw, nabulgar na positibo sa COVID-19 ang isa sa mga naging resource person sa isinagawang pagdinig sa Senado ng Committee on Basic Education na pinamumunuan ng ating kaibigan at kasamahang si Sen. Sherwin Gatchalian, na dinaluhan naman ng isa pang kasamahan nating si Sen. Nancy Binay.

Dahil d’yan, nagpahayag ang dalawang butihing senador na mas minabuti nilang mag-self-quarantine, gayundin ang kani-kanilang staff. At dahil tayo ay may mga kaliwa’t kanan ding engagements, hindi rin natin sigurado ang ating kalusugan.

Wala tayong anumang sintomas, pero bilang pagsunod sa direktiba ng gobyerno, tayo ay sasailalim din sa self-quarantine. Maging ang ating staff sa Senado ay hindi ko na muna pinapasok bilang pag-iingat.

Sa kasalukuyan, habang isinusulat natin ang pitak na ito, 52 na ang positive cases ng COVID-19 sa Pilipinas. Ang reaksiyon ng tao — panic. Pati sa palengke, grocery stores, drug stores — nagpa-panic-buying na sila.

Gusto sana nating sabihing hindi sagot ang panic at pagpa-panic-buying sa problemang ito. Huwag tayong masyadong magpadala sa kung anu-anong unverified reports na nagiging dahilan ng matinding pagkatakot.

Magtiwala tayo sa gobyerno lalo na sa Department of Health (DOH). Sa DOH lamang magmumula ang mga opisyal na pahayag, datos at updates tungkol sa mga nangyayari at patuloy pang mangyayari.

Kamakailan, nanawagan tayo sa DOH na maging bukas sa tao hinggil sa kanilang mga aktibidad kaugnay sa mga bagong kaso. Ito ay para maging “aware” ang publiko at mas maging alerto sa kung paano nila pangangalagaan ang sarili at makaiwas sa anumang posibilidad ng impeksiyon.

Nananawagan din tayo sa lahat ng ahensiya ng gobyerno na may kinalaman sa pagsugpo ng karamdamang ito na makipag-ugnayan sa ating tanggapan.

Kung kinakailangan ng mga ahensiyang ito ng budgetary adjustments, maaari nila itong ipaalam sa inyong lingkod bilang tayo ang chairman ng Senate Committee on Finance.

Bagama’t, may mga kaukulan tayong budget sa ilalim ng 2020 National Budget, maaari silang magpanukala ng adjustments sa panahon ng krisis.

At isang maganda ring balita, babalikatin ng PhilHealth ang halaga ng COVID-19 testing. ‘Yan ang ipinahayag ni Cabinet Secretary Karlo Nograles.

Nauna riyan, nitong unang bahagi ng Pebrero, base sa PhilHealth Circular 2020-004, kada patient under investigation o PUI ay paglalaanan ng P14,000 bilang isolation package at karagdagang P4,000 para sa pag-aasikaso sa hospitalization ng mga pasyente.

Maraming ginagawang hakbang ang ating gobyerno. Huwag tayong magpadala sa panic. Magtiwala tayo dahil hindi tayo pababayaan ng mga kinauukulan at iwasan nating makinig o magbasa ng fake news. Lahat ay ginagawa ng pamahalaan para sa ating kapakanan.

---

May katanungan ka ba, reklamo o nais ihingi ng tulong? Sumulat sa AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Mass lay-off sa mga kumpanya dahil sa COVID-19, imbestigahan

Sonny Angara / Agarang Solusyon

Naglabasan ang mga balita na maramihan daw kung magtanggal ng kani-kanilang empleyado ang ilang kumpanya sa bansa dahil sa pagkalugi dulot ng patuloy na paglala ng COVID-19 sa buong mundo.

Kung totoo ito, dapat itong siyasatin ng Department of Labor and Employment (DOLE) dahil hindi makatarungan sa mga empleyado na tatanggalin sila dahil sa takot sa coronavirus, gayung maayos naman nilang nagagampanan ang kanilang trabaho.

Sa Philippine Airlines (PAL), 300 personnel ang nakatakdang masibak dahil sa patuloy na paghina ng operasyon nito dahil pa rin sa negatibong epekto ng coronavirus.

Kung magtutuluy-tuloy ang mga ganitong pangyayari, mapipilay ang ating ekonomiya at maaapektuhan ang kabuhayan at kalakalan sa bansa.

Sabihin na nating wala pang mga panibagong kaso ng COVID-19 sa bansa, wala nang nasawi matapos mamatay ang isang Chinese national noong Enero, pero ito ang dahilan kaya mawawalan ng trabaho ang 300 PAL employees. Nakalulungkot naman ito.

Maging sa Hong Kong, napakarami raw sa ating mga OFW, partikular ang mga domestic helper, ang tinanggal na sa trabaho ng kani-kanilang amo. Ang dahilan, mas minabuti ng mga employer na takasan ang kanilang lugar dahil sa takot sa virus outbreak.

Kaugnay ng pangyayaring ito, nananawagan din tayo sa DOLE na alamin ang kalagayan ng ating mga kababayang OFW sa Hong Kong upang agad silang matulungan.

At para naman sa napipintong negatibong epekto sa kalakalan ng patuloy na paglala ng COVID-19, umaasa tayong may mga kaukulang hakbang ang pamahalaan para matiyak na mapangangalagaan ang kalagayan ng ating ekonomiya.

Kung may mga sapat na tulong na nagagawa ang gobyerno para iligtas ang mamamayan, kasabay nito ay kailangang may mga solidong plano rin para sa ikaliligtas ng iba’t ibang sektor at industriya sa bansa.

Dapat, ngayon pa lang, iniimbestigahan na ng DOLE kung anu-anong kumpanya ang nagsasagawa ng mass lay-off, maging ang dahilan man ay ang COVID o ibang suliranin ng kumpanya. Hindi lahat ng kumpanyang ito ay kasinglaki at kasingyaman ng PAL na kayang bayaran ang mga inaalis na empleyado.

Paano naman ang maliliit na negosyong umaasa lamang sa foreign visitors tulad ng mga tour guide at bed and breakfast operator?

Ito ang pagkakataon upang mapatunayan ng pamahalaan ang kanilang pagmamalasakit sa mamamayan. Huwag sana nilang hayaang mapariwara ang ating mga kababayan dahil sa mga suliraning ito.

Siguruhin nating sakop ang ating mga apektadong kababayan sa mga programang pangkabuhayan ng gobyerno para naman hindi sila tuluyang mawalan ng pag-asa.

---

May katanungan ka ba, reklamo o nais ihingi ng tulong? Sumulat sa AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com