Abusado at mabisyong SAP at 4Ps beneficiary, out sa ayuda

Ryan B. Sison / Boses

Ipinambili ng alak, ipinansugal at ipinuhunan sa shabu, ilan ito sa mga naiulat ng ilang lokal na pamahalaan sa Department of Social Welfare and Development (DSWD) kaugnay sa ipinamimigay na Social Amelioration Program (SAP) cash subsidy sa mahihirap na pamilya na pang-alalay sa gitna ng krisis.

Dahil limitado ang benipisaryo, sinigurado ng mga lokal na pamahalaan at DSWD na karapat-dapat makatanggap ng ayuda ang mga pamilyang pasok sa programa.

Gayunman, tulad ng inaasahan, hindi lahat ng natanggap na ayuda ay ginamit sa mga pangangailangan.

Dahil dito, nagbabala ang DSWD na diskuwalipikado na sa mga susunod na ayuda ang mga umabuso at hindi ginamit sa tama ang natanggap na tulong. Kung 4Ps naman ang inabuso, bibigyan ng warning sa unang opensa pero kapag umulit, puwedeng suspindehin o tuluyan nang tanggalin sa listahan.

Pagkatapos nito, pipili ang DSWD kung sino ang puwedeng ipalit na karapat-dapat makatanggp ng tulong dahil kailangan umano ang ganitong konsiderasyon dahil may pamilyang puwedeng magutom kung tuluyan itong pababayan ng gobyerno.

Magandang hakbang ito para masiguradong nagagamit sa mga pangangailangan ang ayudang ipinamimigay ng gobyerno at hindi sa bisyo.

‘Yung iba kasi riyan, ang sasama ng loob ‘pag hindi nakatatanggap ng ayuda, pero todo-labas ng pera ‘pag bisyo ang kailangan gastusan.

Nakakahiya naman sa mga nagtatiyagang pumila pero umuuwing luhaan kahit may “K” makatanggap ng tulong-pinansiyal.

Para sa mga nakatanggap ng ayuda, gamitin n’yo ‘yan nang tama. Natanggap n’yo ‘yan dahil kuwalipikado kayo. At sa mga nakatanggap pero magiging diskuwalipikado, dapat lang ‘yan sa inyo. Mga sakit kayo sa ulo!

Sa parating na ikalawang bugso ng ayuda, maipamigay sana ito sa mga totoong nangangailangan at hindi sa mga mabisyo lang.

Nagsisikap ang pamahalaan para matulungan ang lahat ng nangangailangan kaya bilang benepisaryo, ipakita ninyong karapat-dapat kayong tulungan.

Hindi pinupulot ng gobyerno ang pondo kaya bilang pasasalamat, gamitin natin ito nang tama.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.

Muling pagtaas ng COVID-19 cases sa bansa, pinaghahandaan sa pagluwag ng lockdown

Ryan B. Sison / Boses

Simula bukas, Mayo 16, isasailalim sa General Community Quarantine (GCQ) ang moderate risk areas habang ang mga high-risk areas naman ay ilalagay sa Modified Enhanced Community Quarantine (MECQ) tulad ng National Capital Region (NCR), Laguna at Cebu City.

Habang naghahanda na ang mga lugar na isasailalim sa GCQ at MECQ, naghahanda na rin ang mga ospital sa posibilidad na tumaas ulit ang kaso ng COVID-19.

Matatandaang ang San Lazaro Hospital ang unang pagamutan na nakapagtala ng COVID-19 patient noong Enero kung saan 23 beds lamang ang kapasidad ng pagamutan para sa COVID patients na naging 48 beds at sa ngayon, naghahanda pa ito ng karagdagang 16 beds.

Ang pavilion 2 ng naturang ospital na noon ay punumpuno ng mga pasyente na may tigdas, dengue o leptospirosis ay binakante at kinabitan ng pinto ang mga kuwarto para ma-isolate at magamot ang mga pasyenteng may COVID-19.

Gayundin, kung noon ay umaabot sa anim na pasyente ang nagkakasya sa bawat silid, ngayon ay isang pasyente muna kada kuwarto.

Ayon sa mga doktor, hindi nawawala ang posibilidad na muling tumaas ang kaso ng COVID-19 pagtapos ng ECQ, gayundin, patuloy na naghahanda ang mga health workers sa “worst case scenario”.

Gayunman, kamakailan ay sinabi ng World Health Organization (WHO) na baka hindi na mawala ang sakit kaya dapat manatiling alerto at siguraduhing handang rumesponde.

Sa ilang buwang pagsasakripisyo at pakikipaglaban natin, mukhang matagal-tagal pa ang laban natin kontra COVID-19.

Nakakatakot ang posibilidad na muling tumaas ang bilang ng mga kaso nito sa bansa, pero sana ay hindi tayo makampante sa pagluwag ng lockdown.

Hindi porke inalis ang ECQ, tapos na ang pagiging disiplinado at pag-iingat natin. Nand’yan pa rin ang banta at hindi natin alam kung kailan ito aatake.

Naging iba man ang paraan ng ating pamumuhay mula nang ipatupad ang ECQ, makabubuting ganito pa rin ang gawin natin sa mga susunod na araw, linggo o buwan para manatiling ligtas laban sa nakamamatay na virus.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.

Pagkakamali sa COVID-19 data, nakaaalarma

Ryan B. Sison / Boses

Habang patuloy na nakikipaglaban ang buong mundo sa COVID-19 pandemic, napakahalaga ng bawat datos na naitatala ng gobyerno mula sa bilang ng tinamaan ng sakit, impormasyon ng mga pasyente hanggang sa sitwasyon ng bawat lungsod o probinisya.

Kailangan ng koordinasyon ng iba’t ibang ahensiya ng gobyerno at lokal na pamahalaan nang sa gayun ay maging tama ang desisyon na kanilang gagawin para sa mamamayan.

Gayundin, ang mga datos na ito ang ginagamit na basehan sa pagdedesisyon ng pamahalaan kung maaari nang tanggalin ang community quarantine sa iba’t ibang panig ng bansa.

Kaugnay nito, umamin ang Department of Health (DOH) na nagkaroon ng mga error o pagkakamali sa kanilang datos sa COVID-19, ngunit iginiit nito na hindi nakaaapekto ang mga pagkakamali sa kabuuang interpretasyon at pagsasagawa ng desisyon ng pamahalaan.

Kabilang sa mga napuna ng UP COVID-19 Pandemic Response Team ang pagbabago ng lokasyon at pagbabago mula patay na naging buhay na pasyente.

Gayunman, idinepensa ng DOH na agad nilang naayos ang mga pagkakamali at nangakong magdaragdag pa ng ibang rows dulot ng mga koreksiyon sa kanilang mga ipinakikitang datos sa COVID tracker.

Bagama’t nagpaliwanag ang DOH, nakaaalarma ang pagkakamaling ito at kahit naaksiyunan, kailangan pa ring managot ng sinumang responsable rito.

Mahalaga ang anumang impormasyon dahil ito ang basehan ng mga desisyon na maaaring makaapekto sa buhay at trabaho ng nakararami.

Kung mauulit ito at ‘di maaaksiyunan, paano na? Kanino pa magtitiwala ang publiko?

Bawat impormasyon at datos na nailalahad natin ay mahalaga hindi lamang dahil ito ang ginagamit na basehan sa mga desisyon para sa taumbayan kundi dahil puwede rin itong magdulot ng takot at panganib sa publiko.

Magsilbing aral ito na maging maingat tayo sa pagtatala ng mga datos o impormasyon.

Hindi basta-bata pagtatala ang ginagawa natin dahil kaligtasan at buhay din ang nakasalalay dito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.