100 barko ng China, naispatan sa WPS

ni Mylene Alfonso | April 29, 2023

Mahigit 100 barko ng China ang naispatan ng Philippine Coast Guard (PCG) sa West Philippine Sea (WPS).

Ayon kay Coast Guard spokesperson Commodore Jay Tarriela, isinumite na ng PCG sa

National Task Force West Philippine Sea (NTFWPS) ang ulat kaugnay sa mga barko ng China sa WPS partikular na ang Chinese warship sa Philippines' Exclusive Economic Zone (EEZ).

Bukod pa sa ginagawang agresibong aksyon ng Chinese Coast Guard (CCG) laban sa barko ng PCG.

Nabatid na nakita ng PCG ang mahigit 100 barko ng China sa isinagawang maritime patrols sa WPS noong Abril 18 hanggang 24.

Kabilang sa mga barko ng China ang kanilang Chinese Maritime Militia vessels, People's Liberation Army Navy corvette, at dalawang China Coast Guard vessels.

Sa malapit umano sa Sabina Shoal, 18 na Chinese Maritime Militia vessels, ang nakita.

Hindi umano sumunod ang mga barko ng China na lisanin ang lugar sa kabila ng napakaraming tawag sa radyo.

Sa may Pag-asa Island, apat pang Chinese Maritime Militia vessels, ang nakita na nangingisda sa karagatan na pinaalis ng Philippine vessels.

Sa bisinidad naman ng Julian Felipe Reef, 17 grupo ng mahigit 100 Chinese Maritime Militia vessels ang nakita.

Idineploy ng PCG ang kanilang Rigid Hull Inflatable Boats para sila ay paalisin pero hindi sila sumunod.

Noong Abril 21, 2023, isang Chinese People's Liberation Army (PLAN) Navy vessel na may bow number 549 ang humarang sa PCG vessels sa distansiya ng seven nautical miles mula Pag-asa Island.

Binantaan pa ng Chinese gray ship ang PCG sa radyo na lisanin ang lugar o magkakaproblema sila kapag hindi sila umalis.

At nitong Abril 23, CCG vessels na 5201 at 4202 ang naharang ng PCG sa Ayungin Shoal.

Unang iginiit ni Pangulong Ferdinand Marcos, Jr. na hindi isusuko ng Pilipinas sa China kahit pa ang pinakamaliit na teritoryo ng Pilipinas.

4 arestado sa nasabat na P1.2-B halaga ng taklobo

ni Ronalyn Seminiano Reonico | April 18, 2021

Arestado ang apat na kalalakihan matapos masabat ng awtoridad ang tinatayang aabot sa 200 toneladang fossilized giant clam shells o “taklobo” sa Roxas, Palawan noong Biyernes.

Tinatayang aabot sa halagang P1.2 billion ang mga naturang taklobo na nakumpiska sa isinagawang joint law enforcement operations ng Coast Guard Intelligence Group Palawan, Coast Guard District Palawan, PCSD, PNP – Maritime Group Palawan, AFP Intelligence Operatives, at Bantay Dagat Roxas.

Ayon sa PCG, ang apat na suspek na inaresto sa Sitio Green Island, Barangay Tumarbong, Roxas, Palawan na kinilalang sina Rey Cuyos, 54; Rodolfo Rabesa, 48; Julius Molejoa, 47; at Erwin Miagao, 40, ay haharap sa kasong paglabag sa Republic Act No. 9147 o ang Wildlife Resources Conservation and Protection Act, at Republic Act No. 8850 o ang Philippine Fisheries Code.

Saad pa ng PCG, “They were brought to the Palawan Council for Sustainable Development (PCSD) for inquest proceedings and filing of appropriate cases.”

39 Pinoy at iba pa, nawawala sa East China Sea

ni Thea Janica Teh | September 3, 2020

Apatnapu’t tatlong katao ang pinaghahanap ng coast guard ng Japan kabilang ang 39

Filipino, 2 New Zealander, Australian at Singaporean matapos makatanggap ng distress call habang bumabagyo sa East China Sea.

Ang alarm signal ay natanggap sa 185 kilometers west ng Amami Oshima island ng Japan.

Ito ay mula sa Gulf Livestock 1 ship na magdadala sana ng 5,800 baka sa Chinese port ng Tangshan mula sa Napier ng New Zealand.

Ayon sa coast guard, sila ay sinabihan ng defense ministry na may natagpuang isang tao na nakasuot ng life jacket sa lugar kung saan nawala ang barko.

Hindi pa malinaw kung sino ang nasagip dahil agad itong kinuha gamit ang patrol plane at dinala sa defense ministry.

Bukod pa rito, nakakita rin ng rubber boat sa pinangyarihan ng insidente ngunit, hindi pa alam ng coast guard kung ito ay mula sa nawawalang barko.

Sa ngayon, patuloy pa rin ang pagsasagawa ng search-and-rescue operation ng 4 na coast guard vessel at ilang eroplano.