DOH, nagsumite na ng dokumento ng COVID-19 vax deals sa COA

ni Lolet Abania | December 15, 2022

Nagsumite na ang Department of Health (DOH) ngayong Huwebes ng mga dokumento ng kanilang COVID-19 vaccine procurement deals sa Commission on Audit (COA).

Personal na iprinisinta ni DOH officer-in-charge Maria Rosario Vergeire ang mga dokumento sa COA sa kahilingan na rin ng Senate Blue Ribbon Committee, na una nang nagsiyasat hinggil sa non-disclosure agreements, kung saan pumipigil umano sa mga auditors para alamin ang vaccine procurement.

Ayon kay Vergeire, kabilang sa mga nai-submit na mga dokumento ay supply agreements na magpapagaan sa pag-audit ng multi-billion-peso loans para sa mga vaccines.

“Handa pong harapin ng Kagawaran ng Kalusugan ang anumang katanungan ukol sa ating vaccine procurement sapagkat kampante tayo na lahat ng mga prosesong isinagawa ng ating pamahalaaan sa pagbili ng mga bakuna upang maprotektahan ang ating mga kababayan ay nakaayon sa batas,” saad ni Vergeire sa isang statement.

Kamakailan, nabanggit ng COA na ang DOH ay nag-request ng isang special audit dahil ito ay ini-require ng World Bank at Asian Development Bank, kung saan nagpo-provide ng mga loans para sa pagkuha ng mga COVID-19 vaccines.

“The DOH is confident of the results that the special audit will yield,” ani Vergeire.

“The first time we procured these vaccines, confident tayo dahil alam natin we bought these vaccines to protect Filipino people,” pahayag ni Vergeire sa mga reporters.

Calida, napiling COA chairman sa Marcos Cabinet

ni Lolet Abania | June 29, 2022

Uupo si Solicitor General Jose Calida bilang chairperson ng Commission on Audit (COA) sa ilalim ng administrasyon ni President-elect Ferdinand ‘Bongbong’ Marcos, Jr.

Ito ang inanunsiyo ngayong Miyerkules ni incoming Press Secretary Atty. Trixie Cruz-Angeles.

Matatandaan na si Calida ay na-appoint ni outgoing President Rodrigo Duterte bilang solicitor general noong 2016.

Nagsilbi rin siya bilang undersecretary ng Department of Justice (DOJ) mula 2001 hanggang 2004.

Sa panunungkulan sa ahensiya ni Calida, siya ang in-charge sa National Bureau of Investigation (NBI), Witness Protection, Security and Benefits Program, Office of the Government Corporate Counsel, DOJ National Task Force on Terrorism and

Internal Security, at DOJ Task Force on Financial Fraud and Money Laundering.

Nabigyan din si Calida ng posisyon na executive director ng Dangerous Drugs Board, kung saan kanyang na-conceptualize ang “Barkada Kontra Droga,” ang drug prevention project ng ahensiya.

Ayon sa COA, isa siya sa mga top earners sa gobyerno noong 2021, na nasa rank 12th na umabot ang kanyang income sa P16.59 million.

Sinabi rin Cruz-Angeles na si Jose Arnulfo “Wick” Veloso ang itatalagang presidente ng Government Service Insurance System (GSIS).

Si Veloso ay kasalukuyang pangulo ng Philippine National Bank (PNB).

Unang nagsilbi si Veloso bilang chief executive officer ng HSBC Philippines. Ang malawak na karanasan ni Veloso sa banking at capital markets ay umabot ng mahigit sa 30 taon, kung saan 23 taon siyang tumagal sa HSBC.

Dating Davao City accountant Justol, bagong COA chief — Malacañang

ni Lolet Abania | February 18, 2022

Itinalaga ni Pangulong Rodrigo Duterte si Rizalina Noval Justol bilang bagong chairperson ng Commission on Audit (COA), ayon sa Malacañang ngayong Biyernes.

Sinabi ni acting presidential spokesperson Karlo Nograles na ang appointment papers ni Justol ay nilagdaan ng Pangulo noong Pebrero 17.

“We wish Chairperson Justol success in COA,” ani Nograles.

“We assure her that the government will always be supportive of COA’s efforts to ensure transparency and accountability in the use of government funds,” sabi ni Nograles.

Bago itinalaga sa COA, si Justol ay dating city accountant ng Davao City, kung saan mayor pa noon si Pangulong Duterte.

Matapos noon, nagsilbi siya sa ilalim ng Office of the President bilang Deputy Executive Secretary for Finance and Administration.

“All appointed officials are appointed based on experience, credentials, achievements, accomplishments,” pahayag ni Nograles.

“Secondly, for positions like sa COA chair... apart from the appointment, dadaan pa rin naman ng proseso ng confirmation,” dagdag pa ng opisyal.

Papalitan ni Justol si dating COA chief Michael Aguinaldo, kung saan nagtapos sa kanyang 7-taong termino noong Pebrero 2.