Lagundi at VCO trials kontra-COVID-19, malapit nang ilabas

ni Lolet Abania | June 27, 2021

Posibleng sa susunod na buwan mailabas ang paunang resulta ng pag-aaral sa mga herbal medicines ng Pilipinas na lagundi at virgin coconut oil bilang potensiyal na gamot para sa mga pasyenteng may COVID-19.

“'Yung VCO at lagundi, malapit na po siguro, by next month, baka mayroong preliminary analyses kung anong sinasabi ng datos ng pag-aaral na ito,” sabi ni Dr. Jaime Montoya, director ng Department of Science and Technology-Philippine Council for Health Research and Development sa interview ngayong Linggo nang umaga.

Matatandaang sinabi ni DOST Chief Fortunato Dela Peña na ang clinical studies para sa paggamit ng VCO kontra-COVID-19 ay makukumpleto sa pagtatapos ng June habang ang clinical trials para naman sa lagundi ay nagsimula noong October ng nakaraang taon.

Ayon sa DOST, nakumpleto ang Phase 2 ng clinical trials para sa VCO noong November habang ang completion ng hospital-based clinical trials para rito ay dapat sanang matapos noong May 31.

Subalit, ayon kay Montoya, naghihintay naman ng maraming volunteers na nais lumahok sa pag-aaral sa clinical trials para sa herbal plant na tawa-tawa na panlaban sa COVID-19.

“'Yung tawa-tawa po, medyo hindi ganoon kabilis ‘yung pagkukuha ng lalahok kasi ito ay boluntaryo, so ito, matatagalan pa nang kaunti,” saad ni Montoya.

Noong 2020, sinabi ng DOST na pinag-iisipan nilang gamitin ang tawa-tawa upang madagdagan ang treatment sa mga pasyenteng infected ng COVID-19.

Noong November, ibinunyag naman ni Montoya na isinagawa na ang Phase 1 clinical trials para sa tawa-tawa.

P75 B pondo para sa COVID-19 vaccines sa mga kabataan — DOF

ni Lolet Abania | May 13, 2021

Tinatayang P20 billion ang kinakailangang pondo ng pamahalaan upang makapagpabakuna ang nasa populasyon ng mga kabataan sa bansa kontra-COVID-19, ayon kay Department of Finance Secretary Carlos Dominguez III.

“About P20 billion for approximately 15 million teenagers,” ani Dominguez sa isang text message ngayong Huwebes.

Ito ang naging tantiya ni Dominguez matapos maiulat na pinayagan ng US regulators ang Pfizer at BioNTech’s COVID-19 vaccine na gamitin sa mga kabataan na nasa edad 12.

Naghain na rin ang Pfizer para naman sa British approval sa paggamit ng COVID-19 vaccine na nasa 12-anyos hanggang 15-anyos kung saan isinumite nila ang kanilang datos sa health regulator ng nasabing bansa.

Sa ilalim ng 2021 General Appropriations Act, naglalaan ang gobyerno ng Pilipinas ng P82.5 billion para sa mass vaccination program na layong matugunan ang tinatayang 55% ng populasyon ng bansa.

Para sa anti-COVID vaccination program, target ng pamahalaan ang 50 hanggang 70 milyong Pilipino, subalit ang age bracket nito ay 18-anyos at pataas. Ang mga adolescents at mga bata ay hindi nakasama rito dahil ang available na COVID-19 vaccines pa lang ay para sa edad 18 pataas at wala pang kabataan na napabilang sa ginawang clinical trials sa bakuna.

“On top of the P20 billion estimated for teenagers’ vaccination, around P55 billion is also needed to purchase booster shots, likely for next year,” ani Dominguez.

Matatandaang noong Abril, sinabi ni Vaccine Czar Secretary Carlito Galvez, Jr., na kinokonsidera na ng pamahalaan ang pagkuha ng booster shots ng Moderna kontra-COVID-19.

“We found out that Moderna is developing a booster. ‘Yung booster na ‘yun, puwedeng gamitin kahit na Sinovac o kahit na Gamaleya ang ating nauna,” ani Galvez noon sa isang congressional hearing.

Sa tanong kung paano mabubuo ng gobyerno ang pondong kailangan para sa COVID-19 vaccines sa mga kabataan, ani Dominguez, “It is still to be determined.”

Melatonin, Ivermectin, langis at halamang gamot kontra COVID-19, pinag-aaralan ng DOST

ni Mary Gutierrez Almirañez | April 20, 2021

Pinag-aaralan na ng Department of Science and Technology (DOST) ang mga posibleng gamot sa pasyenteng may COVID-19, kabilang ang Melatonin, Ivermectin, langis at mga halamang gamot, batay sa pagsusuri ni DOST Secretary Fortunato Dela Peña.

Aniya, “Mayroon tayong inaaral kamukha noong Melatonin kasi nakita po nila sa Makati Med, Manila Doctors na iyong mga matitinding severe patients ay nagte-take sila ng Melatonin… Actually, pampatulog po 'yun, pero nakakabuti raw po kaya inaprubahan din po namin ang clinical trial sa Melatonin at ongoing din.”

Dagdag pa niya, “Ang aming susubukan naman po ay isang bagong pormularyo na iyong tinatawag na methylprednisolone na isa pong steroid. Mayroon po kasing nasubukan na gamot iyong dexamethasone pero naghahanap po tayo ng isang katulad noon para hindi tayo magkaproblema sa intellectual property.”

Maliban dito ay pinag-aaralan din ng DOST ang Lagundi, Tawa-Tawa at virgin coconut oil na posibleng epektibo bilang gamot sa ilang sintomas ng COVID-19.

Samantala, isasailalim na rin sa clinical trial test ang veterinary product na Ivermectin, kung saan matatandaang ginamit ito nina dating Senate President Juan Ponce Enrile at kasalukuyang Senate President Tito Sotto. Dalawang ospital na rin ang inaprubahan sa paggamit nito dahil sa isinumite nilang compassionate special permit (CSP).

Sabi pa ni Dela Peña, “Pinakamahina po na buwan, kasi sa clinical trial, marami po talagang pinagdaraanan, maliban na lang kung talagang bigla pong magkaroon ng maraming-maraming magbo-volunteer, mapapabilis po.

“At ang plano po rito ay iyong mga quarantine center na malapit sa PGH ang pagsasagawaan nito. Mayroon na rin pong in-allocate na pondo ang DOH para dito sa clinical trials na 'yan,” paglilinaw pa niya.

Sa ngayon ay nakabuo na ng local ventilator ang mga taga-Technological Institute of the Philippines (TIP) at ang Don Bosco na ipinasusubok sa mga ospital.