Pag-aaral ng ivermectin laban sa COVID-19, ibinasura na ng DOST

ni Lolet Abania | May 23, 2022

Ibinasura na ng Department of Science and Technology (DOST) ang kanilang clinical trial kaugnay sa paggamit ng antiparasitic drug ivermectin para sa COVID-19.

Ayon kay DOST Secretary Fortunato dela Peña, nabatid na nahirapan silang kumuha ng ethics clearance hinggil sa pag-aaral nito at nagdesisyon na rin ang Department of Health (DOH) na gamitin ang humigit-kumulang na P48-milyon pondo sa ibang bagay.

“Ang pinaka-final decision namin ang recommendation ng Department of Health kasi sila rin naman ang nagrekomenda ng trials. Sila rin naman ang nag-recommend na itigil ang trials at i-save na lang ang almost P48 million for other purposes,” pahayag ni Dela Peña sa radio interview ngayong Lunes.

Sinabi ni Dela Peña na wala ring bagong impormasyon na available internationally sa ivermectin. “Ang grupo na binuo for our trial ay member din ng international network at ‘yun nga ang kanilang sinasabi, wala pang dumadating na anything that is clear na may benefits sa ivermectin,” saad ng opisyal.

Aniya pa, ilang pasyente ang nagawang lumahok sa clinical trial, habang ang mga suppliers ng ivermectin ay tumatangging makiisa sa pag-aaral kapag nabatid na nila ang kanilang layunin.

“Nahirapan kami kumuha ng supplier ng gamot. ‘Pag nalaman nilang gagamitin sa trial ay umaatras sila. Natatakot siguro sila ang effect ay makasira ang market,” paliwanag ni Dela Peña.

P75 B pondo para sa COVID-19 vaccines sa mga kabataan — DOF

ni Lolet Abania | May 13, 2021

Tinatayang P20 billion ang kinakailangang pondo ng pamahalaan upang makapagpabakuna ang nasa populasyon ng mga kabataan sa bansa kontra-COVID-19, ayon kay Department of Finance Secretary Carlos Dominguez III.

“About P20 billion for approximately 15 million teenagers,” ani Dominguez sa isang text message ngayong Huwebes.

Ito ang naging tantiya ni Dominguez matapos maiulat na pinayagan ng US regulators ang Pfizer at BioNTech’s COVID-19 vaccine na gamitin sa mga kabataan na nasa edad 12.

Naghain na rin ang Pfizer para naman sa British approval sa paggamit ng COVID-19 vaccine na nasa 12-anyos hanggang 15-anyos kung saan isinumite nila ang kanilang datos sa health regulator ng nasabing bansa.

Sa ilalim ng 2021 General Appropriations Act, naglalaan ang gobyerno ng Pilipinas ng P82.5 billion para sa mass vaccination program na layong matugunan ang tinatayang 55% ng populasyon ng bansa.

Para sa anti-COVID vaccination program, target ng pamahalaan ang 50 hanggang 70 milyong Pilipino, subalit ang age bracket nito ay 18-anyos at pataas. Ang mga adolescents at mga bata ay hindi nakasama rito dahil ang available na COVID-19 vaccines pa lang ay para sa edad 18 pataas at wala pang kabataan na napabilang sa ginawang clinical trials sa bakuna.

“On top of the P20 billion estimated for teenagers’ vaccination, around P55 billion is also needed to purchase booster shots, likely for next year,” ani Dominguez.

Matatandaang noong Abril, sinabi ni Vaccine Czar Secretary Carlito Galvez, Jr., na kinokonsidera na ng pamahalaan ang pagkuha ng booster shots ng Moderna kontra-COVID-19.

“We found out that Moderna is developing a booster. ‘Yung booster na ‘yun, puwedeng gamitin kahit na Sinovac o kahit na Gamaleya ang ating nauna,” ani Galvez noon sa isang congressional hearing.

Sa tanong kung paano mabubuo ng gobyerno ang pondong kailangan para sa COVID-19 vaccines sa mga kabataan, ani Dominguez, “It is still to be determined.”

Phase 3 trial para sa COVID-19 vaccine sa USA, sisimulan na!

ni Thea Janica Teh | September 1, 2020

Nagsimula na sa Phase 3 trial ang British drugmaker na AstraZeneca para sa experimental coronavirus vaccine sa US. Ito ang pangatlong kumpanya na gumagawa ng vaccine panlaban sa COVID-19.

Nangangailangan ang AztraZeneca ng halos 30,000 adult volunteers na may edad 18 pataas mula sa iba't ibang lahi, ethnic at geographic groups na may magandang kalusugan at stable na medical condition, at kabilang na rin 'yung may kaso ng HIV at COVID-19.

Ang mga makikilahok ay makatatanggap ng 2 active ng placebo doses sa apat na linggong pagitan.

Sa kasalukuyan, isinasagawa na ang Phase 3 trial ng vaccine ng AstraZeneca sa Britain, Brazil at South Africa. Plano rin nitong magsagawa ng trial sa Japan at Russia.

Ang US trial ay pinondohan ng Biomedical Advanced Development Authority at National Institute of Allergy and Infectious Diseases na kabilang sa National Institute of Health (NIH) ng pamahalaan.

Ayon kay NIH Director Dr. Francis Collins, committed at suportado ng NIH ang Phase 3 vaccine trial upang tumaas ang tsansa ng pagiging epektibo ng ginagawang vaccine.

"We also know that preventing this disease could require multiple vaccines and we're investing in those that we believe have the greatest potential for success."

Dagdag pa ng AstraZenca, target nilang makakuha ng 50,000 volunteers globally kabilang ang 30,000 sa United States pati na rin sa Latin America, Asia, Europe at Africa. Bukod pa rito, ibinahagi rin ng AstraZeneca na susundin nito ang strict requirement na ibinigay ng global regulators.