Pagbabakuna ng Sinovac, stop muna — DOH

ni Lolet Abania | June 29, 2021

Maaari lamang maipagpatuloy ang paggamit ng COVID-19 vaccine ng Sinovac sa Taguig City at iba pang mga lugar kapag ang Chinese drugmaker ay nakapagsumite na ng certificate of analysis (COA) para sa pinakabago nilang shipment na dumating sa bansa.

Paliwanag ni Department of Health (DOH) Undersecretary Maria Rosario Vergeire, ang COA ay nagsesertipika na ang nai-deliver na vaccines ay nasa maganda at mabuting kalidad.

Ang pinakabagong shipment ng 1 milyon doses ng Sinovac vaccines ay dumating sa bansa kahapon, Lunes. “The COA coming from the manufacturer, especially for Sinovac, usually comes in later,” ani Vergeire sa briefing ngayong Martes.

“Kailangang inaantay natin ‘yan bago ma-administer o ibigay sa ating mga kababayan [ang bakuna].” Samantala, ang lokal na pamahalaan ng Taguig ay nag-anunsiyo ngayong umaga na pansamantalang suspendido ang paggamit ng Sinovac vaccines habang hinihintay ang approval ng DOH sa nasabing doses na kasalukuyang naka-store sa cold chain facility ng siyudad.

Tiniyak naman ni Vergeire sa publiko na ang Sinovac vaccine ay nananatiling epektibo sa isang indibidwal kahit pa ang dapat na second dose ay hindi natanggap ng eksaktong 28 araw matapos ang first shot.

“Ayon po sa ating vaccine expert panel, you can have your second dose about three to six months after,” sabi ng kalihim.

“Pero ‘wag ninyo namang patatagalin… In order for you to get that full protection, kailangan may second dose ka at agad-agad, ‘pag ikaw ay naka-schedule na, kunin mo na,” dagdag ni Vergeire.

Donasyong 400,000 doses ng Sinovac, dumating na sa ‘Pinas

ni Mary Gutierrez Almirañez | March 24, 2021

Lumapag na sa Ninoy Aquino International Airport (NAIA) ang eroplano ng Philippine Airlines (PAL) dala ang donasyong 400,000 doses ng Sinovac COVID-19 vaccines mula sa China ngayong Miyerkules, Marso 24, pasado 7:21 nang umaga.

Matatandaang ika-28 ng Pebrero nu’ng dumating sa bansa ang unang batch ng Sinovac na may 600,000 doses na kaagad ding ipinamahagi sa mga referral hospital upang masimulan ang vaccination rollout kinabukasan.

"Today we are happy to have the second batch," giit pa ni Chinese Ambassador to the Philippines Huang Xilian. "We hope we will contribute to speed up the mass vaccination in this country so that we will win over the war against the virus and recover the economy."

Kabilang sa mga sumalubong sa ikalawang batch ng Sinovac ay sina Department of Health Secretary Francisco Duque III, Vaccine Czar Carlito Galvez Jr. at Senator Bong Go.

Paliwanag pa ni Go, "This is another major milestone to us since the supply of vaccine is very limited and we have to inoculate 1.7 million medical frontliners and we have to meet our target this year in order to attain herd immunity."

Ngayong buwan ay inaasahan ding darating sa bansa ang biniling 1 milyong doses na bakuna mula sa China.

Egypt, gagamit ng COVID-19 vaccine na gawang China

ni Ronalyn Seminiano Reonico | December 11, 2020

Dumating na sa Egypt ang first shipment ng COVID-19 vaccines mula sa China National Pharmaceutical Group (Sinopharm) noong Huwebes, ayon sa health official ng naturang bansa.

Ayon sa UAE health ministry, ang Sinopharm COVID-19 vaccine ay may 86% efficacy. Ito rin ang ginamit sa mahigit 1 milyong katao sa China sa kanilang emergency program.

Prayoridad sa Egypt na mabakunahan nang libre ang mga medical staff at ang mga may chronic diseases. Nangako rin ang Russia sa Egypt ng 25 million doses ng Sputnik V vaccine noong Setyembre.

Samantala, noong Miyerkules ay umabot na sa 119,702 ang coronavirus cases sa Egypt at 6,832 ang bilang ng mga nasawi at nagbabala rin ang pamahalaan sa banta ng second wave ng pandemic sa naturang bansa dahil sa pagtaas ng kaso ng COVID-19.