Bilang paghahanda para sa graduation... Mga Iskolar ng Bayan sa UP Mindanao, nag-F2F na

ni Zel Fernandez | April 24, 2022

Mainit na pagsalubong ang ibinigay ng mga tagapangasiwa ng University of the Philippines (UP) Mindanao sa muling pagbabalik-unibersidad ng mga Iskolar ng Bayan para sa unang batch ng kanilang mga estudyante na dadalo sa isasagawang limited face-to-face campus activities.

“Isa itong oportunidad para atin na i-maximize ang paggamit ng blended learning para mabigyan natin ang ating mga estudyante ng platform para ang edukasyon ay magiging personal, collaborative, at naiuugnay sa tunay na mundo ” pahayag ni UP Mindanao Chancellor Prof. Lyre Anni E. Murao.

Gayundin, muling sinalubong ng UP Mindanao ang mga graduating students ng BS Food Technology at MS Food Science programs sa isang flag ceremony.

Ayon sa ulat, aprubado na ng CHED Regional Office ang hiling ng unibersidad na magsagawa ng pilot implementation para sa limited face-to-face (F2F) classes ng mga mag-aaral sa kolehiyo na nangangailangan ng hands-on laboratory at fieldwork para sa pagkukumpleto ng kanilang thesis.

Pagtitiyak ng tagapangasiwa ng unibersidad, ngayong unti-unti nang nagsisibalikan sa campus ang mga mag-aaral, patuloy pa rin ang pag-oobserba sa mga health protocols kontra-COVID-19 ng kanilang mga university officials, faculty, at students.

Samantala, ang iba namang mga graduating students na kailangang mag-field para sa kanilang thesis ay maaari umanong mag- request para sa limited F2F bilang pagtalima sa CHED-DOH Joint Memo Circular at ng UP VP for Academic Affairs' Memo kaugnay sa muling pagbubukas ng mga paaralan sa bansa.

Pondo sa health insurance ng mga estudyante, target ng gobyerno – DOH

ni Lolet Abania | April 22, 2022

Gumagawa na ng paraan ang Philippine Health Insurance Corporation (PhilHealth) at ang Department of Budget and Management (DBM) para makakuha ng pondo sa insurance policy na kailangan ng mga estudyanteng nasa kolehiyo na lalahok sa in-person classes, ayon sa Department of Health.

Sinabi ni DOH Secretary Francisco Duque III, na ang mga estudyante naman na below 21-anyos ay awtomatikong dependents ng kanilang mga magulang na silang mga miyembro ng PhilHealth.

“Problema, iyong 21 years and above. Iyon ang hinahanapan ng PhilHealth at saka ng DBM ng pondo para ma-enroll sila,” saad ni Duque sa isang televised briefing ngayong Biyernes.

“Hinanapan nga ng PhilHealth ng pondo para mailista, maisama sila sa National Health Insurance Program. Hindi na po sila dependents ng kanila pong mga magulang... iyan din naman ang mandato sa ilalim ng Universal Healthcare Law na lahat ng Pilipino ay maging miyembro ng PhilHealth,” dagdag ng opisyal.

Una nang sinabi ni PhilHealth spokesperson Dr. Shirley Domingo na ang mga estudyante na 21-anyos at pataas ay maaaring makipag-ugnayan sa kanilang mga paaralan o sa mga PhilHealth offices para mag-apply ng insurance.

Gayunman, ayon sa National Union of Students of the Philippines, hindi lahat ng estudyante ay kayang makakuha ng health insurance, kung saan hinimok nila ang gobyerno na pondohan ang naturang programa.

Dapat bakunado at may insurance... Face-to-Face Classes, 'wag gawing komplikado - Bong Go

ni Zel Fernandez | April 22, 2022

Ipinanawagan ng chairperson ng Senate Committee on Health sa Commission on Higher Education (CHED) na gawing mas simple lamang ang requirements para sa mga college students na dadalo sa face-to-face classes.

Batay sa Resolution No. 164 ng Inter Agency Task Force for the Management of Emerging Infectious Diseases, tanging mga fully vaccinated na mga estudyante na mayroon lamang health insurance ang papayagang pumasok sa eskuwelahan para dumalo sa kanilang face-to-face classes.

Gayunman, para kay Sen. Bong Go, “alam n’yo, huwag na ho nating pahirapan pa ang mga kababayan natin sa pagbalik sa pag-aaaral. Hirap na nga ‘yung mga kababayan natin dito sa ating transition nu’ng naging distance learning tayo tapos ngayon magbabalik na naman sa face-to-face learning, mahihirapan naman ang mga kababayan natin. Huwag na ho nating pahirapan pa ang mga kababayan”.

Para kay Go, hindi naman kinakailangan manggaling pa sa pribadong kumpanya ang health insurance dahil maaari namang gamitin ang PhilHealth.

Paliwanag ni Go, nakasaad sa Republic Act No. 11223 o ang Universal Health Care Law, maaaring mapakinabangan ng mga mag-aaral ang PhilHealth insurance, “’yung insurance naman po, hindi dapat private. So, ibig sabihin, PhilHealth… insured ka d’yan dahil miyembro ka ng PhilHealth. ‘Yung mga 21 years old and above ay miyembro ka na po, indigent ka, miyembro ka na po. ‘Yung mga dependents naman less than 21, mga dependents sila… pwede n’yo na hong gamiting insurance ‘yon”.

Sa kabila nito, pinakamahalaga pa rin umanong requirement para sa face-to-face classes na fully vaccinated o nakapagpa-booster shot na ang mga estudyanteng kuwalipikado sa face-to-face classes dahil ito ang maituturing na “best health insurance” sa malalang sintomas ng COVID-19.

Ani Bong Go, “’pag bakunado ka, mas insured ka. Not only sa papel, but ‘yung kalusugan mo mas more insured ka na hindi ka mahahawa, magkasakit o mamatay sa COVID-19”.

“Unahin n’yo pa rin ang kalusugan at buhay ng mga kabataan bago n’yo isabak sa classroom. Mas mahirap po ‘yung mas nasa panganib ‘yung buhay nila, ‘yung mga magulang nasa bahay nag-iisip kung ano ‘yung kalusugan at katayuan ng kanilang mga anak habang nag-aaral. ‘Yun po ang dapat siguruhin ng ating mga awtoridad,” dagdag pa niya.

Samantala, inaasahang marami nang mga kolehiyo at unibersidad mula sa mga lugar na nasa Alert Level 1 ang magbabalik na sa face-to-face classes.