Checkpoint, tinakasan.. 15-anyos na binatilyo, patay, angkas sugatan sa motor

ni Lolet Abania | January 19, 2022

Isang 15-anyos na lalaki ang namatay habang sugatan ang 19-anyos na kanyang angkas nang sumemplang ang kanilang motorsiklo, matapos na takasan ang isang police checkpoint sa Quezon City ngayong Miyerkules ng madaling-araw.

Nakaposisyon ang checkpoint sa bahagi ng Banawe corner Calamba Streets, alinsunod sa ipinatutupad na Oplan Sita ng mga awtoridad.

Ayon sa mga police officers na naka-duty, sisitahin lamang nila ang dalawang binatilyo dahil sa wala silang suot na mga helmet.

Subalit sa halip na huminto sa checkpoint ang mga binatilyo, pinaharurot pa ng takbo ang kanilang motor. Agad naman silang hinabol ng mga naka-duty na mga pulis.

“They disobeyed deliberately the Oplan Sita and they sped off instead. However our TMRU (Tactical Motorcycle Riders Units) conducted the chase... The suspects, while being chased, they drew their firearm. Accidentally the firearm dropped,” ani Police Lieutenant Colonel Tyrone Valenzona, commander ng La Loma Police.

Umabot ang habulan sa C3 Road sa Caloocan City hanggang sa maaksidente ang motorsiklo ng dalawang binatilyo.

Sa salaysay ng 19-anyos na angkas, pinahihinto na niya ang kaibigan pero itinuloy pa rin nitong pinaharurot ang motor.

“Ayaw niya na ring pigilan, ayaw na niyang ihinto. Natatakot lang din po kaya niyakap ko na lang din siya. Noong nasa dulo na po, dire-diretso na po kami nu’n. Hindi namin akalain ‘yung lubak. Doon na po kami tumilapon. Doon na, nagdugo-dugo na ‘yung ulo

niya,” sabi ng binatilyo na nagtamo naman ng mga sugat sa kaliwang binti at balikat.

Ayon sa pulisya, isang caliber .38 pistol ang kanilang nakumpiska, kung saan itinapon umano ito ng 19-anyos na binatilyo sa gilid ng kalsada.

Gayunman, itinanggi ito ng binatilyo at hindi umano sa kanya ang baril.

Mahaharap ang binatilyong suspek sa mga reklamong disobedience at illegal possession of firearms in relation to Omnibus Election Code.

Checkpoints sa NCR, inalis na — PNP

ni Lolet Abania | September 15, 2021

Inihayag ngayon ni Philippine National Police (PNP) Chief Police General Guillermo Eleazar na walang itatakdang mga checkpoints sa National Capital Region (NCR) kapag isinailalim na ang rehiyon sa Alert Level 4 bukas, Huwebes.

Sa isang interview, sinabi ni Eleazar na ang pagde-deploy nila ng mga pulis ay nakatuon na lamang sa mga lugar na nasa ilalim ng granular lockdowns. “Wala na tayong checkpoint sa operation dahil narinig naman natin ng uniform naman itong Level 4 [Alert Level 4 in NCR],” ani Eleazar .

Paliwanag pa ni Eleazar na ang pagpapatupad ng granular lockdowns ay hindi na bago sa kapulisan dahil sa may 50 lugar sa Metro Manila ang kasalukuyang nakasailalim sa naturang restrictive measure.

Una nang inianunsiyo nitong Martes ni Department of Interior and Local Government (DILG) Secretary Eduardo Año na ang NCR ay isasailalim sa Alert Level 4 simula sa Huwebes sa gitna ng COVID-19 pandemic.

Sa ilalim ng Alert Level 4, ang ikalawang pinakamataas na alert level sa bagong scheme ng pamahalaan, ay iyong may mga kaso ng COVID-19 na mataas ang bilang o nadaragdagan pa habang ang kabuuang mga kama at ICU beds ay nasa high utilization rate.

Ang mga hindi pinapayagan o bawal lumabas ng kanilang bahay na nasa ilalim ng Alert Level 4 ay mga edad 17 pababa, mga 66-anyos pataas, mga mayroong immunodeficiencies, comorbidities, o iba pang may panganib sa kalusugan, mga buntis.

Ang mga indibidwal naman na papayagan o maaaring lumabas ng bahay ay iyong mga kukuha o bibili ng mga essential goods at services, o magtatrabaho sa mga industriya o opisina na pinayagang mag-operate ng gobyerno.

Gayundin, sa ilalim ng Alert Level 4, ang intrazonal at interzonal travel para sa mga indibidwal ay maaaring payagan subalit nakadepende ito sa ipinatutupad na regulasyon ng LGU na destinasyon o nais na puntahan.

Pila sa checkpoint, umaabot ng 2 oras... Random check na lang — PNP Chief Eleazar

ni Lolet Abania | August 8, 2021

Dalawang oras umano ang inabot ng ilang motorista bago sila pinadaan sa mga checkpoint habang nasa ilalim ng enhanced community quarantine ang National Capital Region (NCR).

Ayon sa isang motorista, pumila siya sa checkpoint sa boundary ng Caloocan at San Jose del Monte, Bulacan, kung saan lumagpas pa umano ng dalawang oras bago siya tuluyang pinadaan ng mga pulis nitong Sabado nang gabi.

Salaysay naman ng isa pa, “Hassle kasi may pasyente nga kaming dinala sa ospital. Nauna ‘yung ambulansiya, naipit kami... Galing po ako ng Cavite,” kung saan aniya, wala nang bakante sa mga ospital sa Metro Manila, kaya napilitan silang dalhin ang pasyente sa nasabing lugar.

Sa España Blvd. sa Maynila, binubusisi sa checkpoint ang mga dokumento ng bawat daraan para tiyakin umano ng mga awtoridad kung sila ay authorized person outside residence (APOR).

“Kapag po sila working APOR, hinahanapan ng Certificate of Employment. ‘Yung kanilang mga ID, kailangang ipakita para mapatunayan na working APOR. Kapag consumer APOR, kailangan, may quarantine pass,” paliwanag ni Police Lt. Ronald Calixto, team leader sa checkpoint. Iniutos naman ni Philippine National Police chief Gen. Guillermo Eleazar na sakaling ang pila sa mga checkpoint ay humaba, maaaring magpatupad na lang ng random check.

Gayundin, iisa-isahin na lamang ng mga pulis ang mga sasakyan kapag maigsi na umano ang pila nito sa checkpoint.

Ayon kay Eleazar, karaniwan na aniyang paglabag sa ECQ ang hindi at maling pagsusuot ng face mask, face shield at physical distancing. Kasama na rin dito ang hindi pagsunod sa curfew hours. “Itong tatlo, ito ang minimum public health standards natin ang nakikita natin (violation) pero most of them wina-warning-an lang naman,” sabi ni Eleazar. Babala naman ng PNP chief na kanilang papanagutin ang sinumang non-APOR driver na mang-aabuso. Aalamin nila sa mga employer nito kung tunay ang ipinakita nilang mga dokumento.

Nagbigay na rin ng direktiba si Eleazar sa Criminal Investigation and Detection Group (DILG) habang patuloy ang pakikipag-ugnayan ng ahensiya sa mga lokal na pamahalaan dahil sa posibleng pagdagsa naman ng mga nagpapabakuna kontra-COVID-19 sa mga vaccination sites.