Janssen at Covaxin COVID-19 vaccines, aprub sa FDA

ni Mary Gutierrez Almirañez | April 20, 2021

Inaprubahan na ng Food and Drug Administration (FDA) ang emergency use authorization (EUA) ng mga bakunang Janssen at Covaxin kontra COVID-19, batay sa inanunsiyo ni Vaccine Czar Secretary Carlito Galvez, Jr. sa ginanap na public briefing kagabi.

Nauna na ring nag-tweet si Indian Ambassador Shambhu Kumaran upang pasalamatan ang ‘Pinas sa iginawad na EUA sa bakuna nilang Covaxin na mula sa Bharat Biotech manufacturer.

Ayon sa tweet ni Kumaran, “Another decisive step in the long battle together against Covid-19.”

Batay sa pag-aaral, ang Covaxin ay nagtataglay ng 92% hanggang 95% na efficacy rate.

Samantala, ang Janssen COVID-19 vaccines nama’y gawa ng Johnson and Johnson, kung saan mahigit 6 milyong doses nito ang binili ng ‘Pinas.

Matatandaang inirekomenda ng U.S Food and Drug Administration (FDA) at Centers for Disease Control and Prevention (CDC) na ihinto muna ang pagbabakuna ng Janssen dahil sa iniulat na blood clot sa 6 na nabakunahan nito.

Sa ngayon, ang may emergency use authorization (EUA) pa lang na bakuna ay ang Pfizer-BioNTech, AstraZeneca, CoronaVac ng Sinovac, ang Sputnik V ng Gamaleya Institute at kabilang ang dalawang nadagdag na bakuna.

3 nabakunahan ng AstraZeneca sa Cotabato, patay

ni Mary Gutierrez Almirañez | April 15, 2021

Tatlong nabakunahan ng AstraZeneca kontra COVID-19 ang namatay umano sa Matalam, Cotabato ilang araw matapos silang maturukan ng unang dose nito. Gayunman, wala pang kumpirmasyon kung may koneksiyon ang bakuna sa pagkamatay nila, ayon kay Provincial Board Member Philbert Malaluan.

Paliwanag pa ng Integrated Provincial Health Office (IPHO) head na si Dr. Eva Rabaya, isa sa mga nasawi ay may hypertension at ang dalawa nama’y nagkaroon ng COVID-19. Posible rin aniya na walang kaugnayan ang bakuna sa pagkamatay ng mga ito.

“Only the DOH could conduct the causal analysis of their deaths, so, let’s just wait for the results,” giit pa ni Dr. Rabaya.

Kinilala ang mga namatay na sina Emily Salimbag, isang 51-anyos na healthcare worker at si Councilor Berlin Laroza, 58-anyos, kabilang ang isang kamag-anak nito.

Sa ngayon ay iniimbestigahan na ng Department of Health (DOH) Soccsksargen region ang pagkamatay ng tatlo.

Matatandaang 29 ang iniulat na nasawi sa Norway nang dahil sa blood clot matapos mabakunahan ng AstraZeneca.

Batay din sa inilabas na tala ng Centers for Disease Control and Prevention (CDC) sa Vaccine Adverse Event Reporting System (VAERS), tinatayang 472 ang namatay sa Moderna at ang 489 nama’y dahil sa Pfizer ilang araw matapos silang mabakunahan kontra COVID-19.

6 namuo ang dugo... Johnson & Johnson vaccine, stop

ni Mary Gutierrez Almirañez | April 14, 2021

Inirekomenda ng U.S Food and Drug Administration (FDA) at Centers for Disease Control and Prevention (CDC) na ihinto muna ang pagbabakuna kontra COVID-19 gamit ang Johnson & Johnson ng Janssen Pharmaceuticals dahil sa iniulat na blood clot sa 6 na nabakunahan nito.

Ayon sa tweet ng U.S FDA kagabi, “Today FDA and @CDCgov issued a statement regarding the Johnson & Johnson #COVID19 vaccine. We are recommending a pause in the use of this vaccine out of an abundance of caution.”

Dagdag pa nila, "Until that process is complete, we are recommending this pause. This is important to ensure that the health care provider community is aware of the potential for these adverse events and can plan due to the unique treatment required with this type of blood clot."

Base sa huling tala, mahigit 6.8 milyong indibidwal na ang nabakunahan ng Johnson & Johnson COVID-19 vaccines, kung saan ang anim na nakaranas ng severe blood clot ay mga babaeng nasa edad 18 hanggang 48-anyos. Naranasan nila ang pamumuo ng dugo makalipas ang 6 hanggang 13 araw matapos silang mabakunahan ng unang dose.

Batay din sa lumabas na statement ng mga eksperto, “In these cases, a type of blood clot called cerebral venous sinus thrombosis (CVST) was seen in combination with low levels of blood platelets (thrombocytopenia)… Usually, an anticoagulant drug called herapin is used to treat blood clots. In these setting, administration of herapin may be dangerous, and alternative treatments need to be given.”

Ngayong Miyerkules ay makikipag-meeting ang U.S FDA sa Advisory Committee on Immunization Practices (ACIP) upang mapag-usapan ang tungkol sa nadiskubreng adverse event sa nasabing bakuna.

Matatandaang nauna nang ipinahinto ang pagbabakuna ng AstraZeneca dahil sa blood clot na kumitil sa buhay ng 29 indibidwal matapos mabakunahan nito.

Samantala, inaasahan namang mapipirmahan ngayong linggo ang supply agreement at emergency use authorization (EUA) ng Johnson & Johnson upang mai-deliver sa ‘Pinas ang 6 milyong doses nito.