Cebu at Manila Chooks, sasabak sa Mongolia

ni Anthony E. Servinio - @Sports | May 6, 2022

Hahanapin ng Cebu Chooks ng Pilipinas ang kanilang ikalawang sunod na kampeonato sa kanilang pagsabak ngayong Biyernes at Sabado sa FIBA 3x3 Ulaanbaatar Super Quest sa Sky Resort sa Mongolia. Kasama ng Cebu ang Manila Chooks na susubukang makamit ang isang tiket para sa World Tour Manila Masters sa Mayo 28 at 29.

Ganado sina Mark Jayven Tallo, Zachary Huang, Brandon Ramirez at Mike Harry Nzeusseu matapos ang tagumpay sa Asia-Pacific Super Quest noong Sabado sa Solenad sa Santa Rosa City, Laguna. Natalo ang Manila sa Cebu sa semis at tiyak na babawi ang kombinasyon nina Mark Yee, Chico Lanete, Dennis Santos at Henry Iloka.

Hinati ang walong kalahok sa dalawang grupo kung saan napunta ang Cebu sa Grupo A kasama ang Ulaanbaatar MMC Energy at Amgalan MMC Energy ng Mongolia at Yokohama Beefman ng Japan. Tatlong kinatawan ng Mongolia ang haharapin ng Manila sa Grupo B na Zavkhan MMC Energy at ang mga lumaban sa Asia-Pacific Super Quest na sumegundang Sansar MMC Energy at pumangatlong Zaisan MMC Energy.

Dalawang tiket ang nakataya para sa Manila Masters. Pasok na sa torneo ang Cebu, Sansar at mga naunang naihayag na Ub Huishan NE at Liman Huishan NE ng Serbia, Antwerp ng Belgium, Warsaw Lotto ng Poland at UIaanbaatar.

Dahil sa kampeonato ng Cebu at pagpasok sa semis ng Manila sa Asia-Pacific Super Quest, umakyat ng isang puwesto ang Pilipinas sa ika-28 sa FIBA 3x3 World Ranking. Layunin pa rin na paabutin sa ika-24 o mas mataas ang bansa upang magkaroon ng pag-asa na mapabilang sa 2024 Paris Olympics.

Mapapanood nang live ang lahat ng laro ng Ulaanbaatar Super Quest sa opisyal na YouTube at Facebook ng FIBA 3x3. Magsisimula ang unang laro sa 4 p.m. habang ang mga laro sa Sabado ay nakatakda para sa 2 p.m.

2 Chinese inaresto ng NBI sa pagbebenta ng mga pekeng gamot

ni Jasmin Joy Evangelista | March 23, 2022

Arestado ang dalawang Chinese nationals matapos mahuli ng National Bureau of Investigation (NBI) Central Visayas dahil sa umano’y pagbebenta ng mga pekeng gamot na nagkakahalagang P500,000 sa dalawang magkaibang shop sa Mandaue City, Cebu.

Kinilala ang mga suspek na sina Shi Wenpai, may-ari ng Hua Long Supermarket; at Wu Xiao, store manager ng Laoxiang Supermarket, na kinasuhan na ng violation of Republic Act 8203 o ng Special Law on Counterfeit Drugs.

Kasalukuyan namang pinaghahanap ngayon si Alexine Rapunzel Ong Dy, may-ari ng Laoxiang Supermarket, na wala sa lugar kung saan nagsagawa ng operasyon ang mga awtoridad noong March 18.

“This (operation) was conducted in the wake of President Rodrigo Duterte’s call to hold accountable establishments or individuals caught trading fake medicines or selling medicines without proper documents,” ani NBI-7 sa isang written statement na ipinadala sa mga reporter.

Nakumpiska sa mga Chinese shops ang Amoxicillin Capsules 0.25 grams, OCT Lianhua Qingwen Jiaonang; at, CSPC Arbidol Hydrochloride tablets 0.1g WT 2015009 label in Chinese characters. Ang mga gamot na ito ay pinaniniwalaang ginagamit bilang gamot sa COVID-19.

Naglabas na ng search warrant si Executive Judge Allan Fransisco Garciano ng Regional Trial Court sa Mandaue City na siyang gagamitin ng NBI sa pagsasagawa ng operasyon.

Cebu no.1 sa listahan ng may pinakamaraming bagong kaso ng COVID-19

ni Jasmin Joy Evangelista | January 29, 2022

Naitala sa lalawigan ng Cebu ang pinakamaraming bagong kaso ng COVID-19 nitong Biyernes, ayon sa independent analytics group OCTA Research ngayong Sabado, base sa datos mula sa Department of Health (DOH).

Ayon sa datos na ibinahagi ni OCTA Research fellow Guido David sa Twitter, nakapagtala ang Cebu nh 1,469 new COVID-19 cases nitong Biyernes.

Sinundan ito ng Davao del Sur na may 1,232 new cases, Iloilo na may 982 cases, Laguna na may 814 cases, Cavite na may 678 cases, at Benguet na may 612 cases.

Nitong Biyernes ay ini-report ng DOH na mayroong 18,638 bagong kaso ng COVID-19 sa bansa, kung saan mayroong 2,256 mula sa Metro Manila.

Kamakailan lang ay ibinaba sa moderate risk status for COVID-19 ang Metro Manila mula sa nakaraang high risk status, ayon sa DOH.

Samantala, batay sa obserbasyon ng DOH, mayroong pagtaas sa bilang ng mga bagong kasong naitatala sa mga parte ng Visayas at Mindanao, partikular sa Western at Central Visayas at maging sa Davao region.