Bebot, patay sa sinkhole sa Cebu

ni Lolet Abania | Pebrero 4, 2023

Isang babae ang natagpuang patay matapos na isang sinkhole ang nabuo malapit sa kanyang tirahan sa Danao City, Cebu, nitong Biyernes ng gabi.

Sa report ng GMA News ngayong Sabado, isang 46-anyos na babae ang natagpuang nakabaon sa lupa sa Purok 3, Barangay Sabang, Danao City, Cebu. Narekober ng mga awtoridad ang katawan ng biktima pasado ng alas-9:00 ng gabi nitong Biyernes.

Ayon sa City Disaster Risk Reduction Management Office (CDRRMO) ng Danao City, nagsasagawa na sila ng assessment at pagsusuri para matiyak na ligtas na ang lugar.

Pinag-iisipan na rin ng CDRRMO, kung kinakailangang magpatupad ng preemptive evacuation ngayon sa pinangyarihan matapos ang insidente.

Sinabi pa ng mga awtoridad, ginagamit ang lugar kung saan nabuo ang sinkhole para sa quarrying at posibleng nag-collapse ito dahil sa mga pag-ulan.

Pork na galing sa Iloilo at Panay, ban pa rin dahil sa ASF – Cebu gov’t

ni Lolet Abania | November 10, 2022

Papalawigin pa ni Cebu Governor Gwendolyn Garcia ang temporary ban ng pagpasok ng mga baboy, hogs, at iba pang katulad na produkto mula sa Iloilo at Panay dahil sa nabigo aniya ang mga awtoridad na mapigilan ang pagkalat ng African Swine Fever (ASF).

“What we should be afraid about really is the ASF. Right now, of the 81 provinces in the entire country, 62 provinces are already infected with ASF. They have not been able to control the ASF spread in Panay [and] Iloilo,” pahayag ni Garcia sa isang interview na nai-share sa Facebook page ng Cebu provincial government nitong Miyerkules.

“I will extend it (pork ban). We were trying to study ba kung ma-contain ba, wala. They have not contained it,” saad ng gobernadora.

Noong Oktubre 13, iniutos ni Garcia ang temporary ban ng mga pork at pork products mula sa mga probinsiya ng Iloilo at Panay island para sa period ng 60 araw dahil sa hinihinalang kaso ng ASF.

Ayon kay Garcia, hiniling din niya sa mga airlines at mga awtoridad na ipaalala sa mga pasahero na hindi sila maaaring magdala ng anumang klase ng mga pork products sa Cebu province.

“I have asked again the airlines, as well as the authorities sa airport to keep repeating the warning that is contained under my executive order they cannot bring in [pork] domestic from Manila, Davao, from wherever, they cannot bring in any pork and pork-related products,” sabi ng opisyal. “But, I have asked the airline to announce it while the passengers are still on board,” dagdag pa ni Garcia.

Face mask, ‘di na kailangan sa mga open spaces — Cebu gov

ni Lolet Abania | June 9, 2022

Isang executive order ang inisyu ni Cebu Governor Gwen Garcia hinggil sa pagbawi sa mandato ng pagsusuot ng face mask sa mga open spaces sa lalawigan.

Sa Executive Order 16 na inisyu nitong Miyerkules, ayon kay Garcia ang mga face masks ay kakailanganin na lamang sa mga closed at air-conditioned areas.

“The use of face masks shall be optional in well-ventilated and open spaces,” nakasaad sa order.

Gayunman aniya, ang mga indibidwal na may sintomas ng COVID-19 gaya ng lagnat, ubo o runny nose ay required pa rin na magsuot ng mask kapag aalis ng kanilang bahay. Binanggit naman ni Garcia na ang pag-improve ng probinsiya sa sitwasyon ng COVID-19, ang dahilan kaya pinaluwag na ang mandato ng face mask.

“Other countries, including Singapore, have already directed the wearing of masks and other personal protective equipment be optional in outdoor settings,” ani Garcia sa kanyang order.

Batay sa latest health bulletin na ini-release ng Central Visayas health office, nakapag-record ang Cebu ng average na 36 kaso ng COVID-19 kada araw mula Mayo 29 hanggang Hunyo 4, habang tinatayang 4 milyong mamamayan sa rehiyon ay fully vaccinated na.

Una nang sinabi ng Department of Health (DOH) na ang mandatory na paggamit ng face masks ang magiging anila, “last to go” o huling aalisin sa transition ng bansa sa new normal.

Marami na ring beses na hinimok ni Pangulong Rodrigo Duterte at ng Inter-Agency Task Force (IATF) ang probinsiya na sumunod sa national mandates ng COVID-19 response.