Ospital ng Imus bubuksan muli ang outpatient, scheduled operations services

ni Jasmin Joy Evangelista | September 23, 2021

Nasa 38 virus patients ang naka-admit sa Ospital ng Imus, habang okupado ang 80 porsyento ng intensive care unit nito, ayon kay chief of clinics Dr. Jennifer Roamar.

Kung hindi na raw madadagdagan ang COVID-19 patients ng ospital ay bubuksan na nito ang outpatient services at scheduled operations nito sa Lunes.

"Napansin po namin wala na pong pasyente sa parking lot unlike before. Ang emergency room atsaka ang aming ward puno pa rin lagi," pahayag ni Roamar.

"Sa Monday po ibabalik na ang outpatient service at scheduled operation, wag na lang po sana madagdagan ang positive [cases]."

Nakabalik na rin ang 75% ng 34 health workers na nagpositibo sa COVID-19, dagdag niya.

May 6 na bagong kaso ng Covid sa medical staff at 4 dito ay naka-quarantine at pending ang resulta ng test, ayon kay Roamar.

Samantala, sapat daw ang gamot ng ospital kontra COVID-19 tulad ng remdesivir dahil may consignment agreement ang ospital sa isang pharmaceutical company.

Sapat din daw ang oxygen supply, ngunit nagkukulang naman sa mga makina tulad ng high-flow machine, BiPAP, at mechanical ventilator dahil ito ay isang level 1 hospital lamang, ani Roamar.

Nakasilid sa pakete ng tsaa... P331 M shabu nakumpiska, mag-asawa kulong

ni Lolet Abania | September 10, 2021

Arestado ang mag-asawa matapos na makuhanan ng higit sa P331 milyong halaga ng umano’y shabu sa ikinasang buy-bust ng mga awtoridad sa lalawigan ng Cavite, nitong Huwebes nang gabi.

Ayon sa Philippine Drug Enforcement Agency (PDEA), nakumpiska ang bulto-bultong mga pakete ng hinihinalang shabu sa bahay ng mag-asawa sa Imus, Cavite.

Nakasilid sa mga pakete ng tsaa ang nasa 48 kilo ng umano’y shabu na may standard drug price na mahigit sa P331 milyon.

Gayunman, hindi binanggit ng PDEA ang pagkakakilanlan ng mag-asawang suspek. Itinanggi naman ng mag-asawa na sa kanila ang nasabing kontrabando dahil anila, ipinatago lamang umano ito sa kanila ng 2 lalaki na parokyano nila sa negosyong pagpaparenta ng sasakyan.

Hindi rin umano nila batid kung ano ang laman ng mga kahon na iniwan sa kanila.

Duda naman ang mga tauhan ng PDEA sa paliwanag ng mga suspek.

Ayon pa sa PDEA, ilang buwan na silang nagsasagawa ng surveillance sa mag-asawa at nang magpositibo, saka nila isinagawa ang entrapment operation.

Batay rin sa impormasyon ng PDEA, nakatakdang dalhin sa Mindanao ang mga nasamsam na hinihinalang shabu.

Mayor Echevarria ng Cavite, suko na, nagbitiw

ni Lolet Abania | August 3, 2021

Opisyal na nagbitiw sa puwesto si Mayor Walter D. Echevarria, Jr. ng General Mariano Alvarez, Cavite dahil umano sa kanyang kalusugan. “Nais kong ipaalam sa inyong lahat na simula sa araw na ito (Agosto 3), akin pong binibitawan ang aking puwesto sa pagka-alkalde ng bayan ng Gen. Mariano Alvarez.

Buhat ng pagbabago sa aking kalusugan, ako po ay lubos na nagpapakumbabang iwan ang aking puwesto upang kayo po ay mapaglingkuran ng mas tapat at nararapat,” ani Echevarria sa isang statement sa Facebook.

Ayon kay Echevarria, kinakailangan ng kanilang bayan ng isang lider na kayang mamuno sa kabila ng COVID-19 pandemic. Hinimok naman ni Echevarria ang kanyang mga kababayan na patuloy na suportahan ang mga proyekto at programa ng lokal na pamahalaan at naniniwala siyang ang papalit na mayor ay maipagpapatuloy na gawin ang kanyang mga naiwang tungkulin.

Nagsimula si Echevarria na maglingkod sa gobyerno bilang barangay secretary ng Area J noong 1972. Sumunod siyang nagsilbi bilang councilor ng bayan sa loob ng 6 na taon at naging vice-mayor ng 3 taon. Naging mayor naman siya mula 2001 hanggang 2010 at reelected noong 2013.