Tatakbo sana ulit sa 2022… Dating vice mayor sa Cavite, patay sa pamamaril

ni Jasmin Joy Evangelista | November 17, 2021

Patay ang isang dating vice mayor ng bayan ng Maragondon matapos pagbabarilin ng kainuman umano sa lungsod ng General Trias, Cavite.

Kinilala ang biktima na si Nolito Magallanes, 54, na hindi na umabot nang buhay sa ospital.

Kakandidato siya ngayong Mayo para sa muling pagka-vice mayor.

Batay sa paunang ulat ng mga awtoridad, nag-ugat ang pamamaril sa sagutan sa inuman.

Sa pahayag ng pulisya, umuwi ng bahay si Magallanes pagkatapos ng inuman pero sinundan siya ng suspek at pinagbabaril bago tumakas.

Patuloy na iniimbestigahan ng pulisya ang nangyari at hinahanap ang itinuturong gunman.

Nanungkulan si Magallanes bilang bise-alkalde ng Maragondon mula 2004 hanggang 2007. Nagsilbi rin siyang konsehal at barangay official.

Bago maghain ng kandidatura para sa muling pagkabise-alkalde sa Halalan 2022, nagsilbi siyang executive assistant sa tanggapan ni Cavite governor Jonvic Remulla.

11-buwang gulang na sanggol at 9-anyos, patay sa diarrhea

ni Lolet Abania | November 7, 2021

Isang 9-anyos at isang 11-buwang gulang na sanggol ang namatay matapos mai-report ang isang diarrhea outreak sa tatlong barangay sa Tanza, Cavite noong nakaraang buwan, pahayag ng isang local health official ngayong Linggo.

Ayon kay Dr. Ruth Punzalan, municipal health officer ng naturang lugar, ang apektadong mga barangay ng diarrhea outbreak ay Calibuyo, Punta 1, at Sahud Ulan.

Bukod dito, sinabi ni Punzalan na dalawang kaso pa ng cholera ang kanilang na-detect.

Umabot na sa 20 mga kaso ng diarrhea ang kanilang nai-record habang aniya, nagsimula ang outbreak isang linggo bago mag-Oktubre 19.

“Total of 20 cases ang tinamaan ng diarrhea outbreak at may isa kaming death na 9-year-old,” sabi ni Punzalan sa isang interview ngayong Linggo.

Ayon pa sa opisyal, ang mga pasyente ay agad na dinala sa ospital para gamutin subalit namatay din kinabukasan dahil sa severe dehydration.

Paliwanag ni Punzalan at base na rin sa kanilang imbestigasyon, sa pitong water sources sa Tanza, lima rito ay kontaminado.

Aniya, ang tubig na mula rito na ginagamit at posibleng iniinom ng mga residente ay nanggaling sa mga shallow wells.

Gayunman, ang mga apektadong komunidad ay agad naman nilang binigyan ng assistance para makakuha at magkaroon ng malinis na tubig.

P1.28 B halaga ng shabu, nakumpiska, 3 arestado

ni Lolet Abania | October 1, 2021

Nakakumpiska ang Philippine Drug Enforcement Agency (PDEA) ng 149 kilo ng hinihinalang shabu na nagkakahalaga ng P1.28 bilyon mula sa tatlong naarestong indibidwal sa isang buy-bust operation sa Bacoor City, Cavite, ngayong Biyernes.

Batay sa initial report, kinilala ng PDEA ang mga suspek na sina Jorlan San Jose, 26; Joseph Maurin, 38; at Joan Lumanog, 27. Alas-6:40 ng umaga, ikinasa ng pinagsanib na puwersa ng PDEA at ng Philippine National Police (PNP) ang operasyon sa Barangay Molino 3, Bacoor City, Cavite.

Maliban sa shabu, nasamsam din ng mga awtoridad sa mga suspek ang P1,000 buy-bust money, isang bundle ng boodle money, at isang cell phone sa naturang operasyon.

Nakadetine na ang mga suspek habang sasampahan ang mga ito ng paglabag sa Comprehensive Dangerous Drugs Act.