Herb Cebu FC, sakalam vs. FC 1991 sa Copa Cup

ni Anthony E. Servinio - @Sports | May 4, 2022

Dumurugo at balot ng benda ang ulo, nagtala ng dalawang goal sa second half si forward Arda Cinkir upang itulak ang Dynamic Herb Cebu FC sa 3-1 panalo laban sa Mendiola FC 1991 sa pagpapatuloy ng 2022 Copa Paulino Alcantara, Lunes nang gabi sa PFF National Training Center sa Carmona, Cavite. Sa unang laro, literal na naging bakbakan ang 3-2 tagumpay ng defending champion Kaya FC Iloilo sa Stallion Laguna FC.

Nag-umpugan ang mga ulo nina Cinkir at Alassane Wade ng Mendiola sa ika-49 minuto kaya napilitan silang umupo upang lapatan ng lunas. Bumalik agad si Cinkir at ipinasok ang nagpatablang goal gamit ang ulo sa ika-58 at ang nagpalamang ng goal sa ika-73 minuto.

Nagdagdag ng isa pang goal sa ika-93 minuto si midfielder Mert Altinoz upang mabuo ang tagumpay. Nakaunang goal ang Mendiola matapos ang penalty kick ni Hamed Hajimedhi sa ika-42 minuto subalit hindi ito tumagal at mas mabagsik na Dynamic Herb ang lumabas para sa second half.

Namayani ang beteranong si Jhan Melliza sa first half kung saan pinasahan niya sina Carlyle Mitchell at Shirmar Felongco para sa mga goal sa ika-10 at ika-19 na minuto. Matapos tulungan ang iba, tinulungan ni Melliza ang sarili at sumipa ng isa pang goal sa ika-28 minuto para sa 3-0 lamang.

Dahil sa panalo ng Dynamic Herb, tumalon sila sa ikalawang puwesto na may perpektong siyam na puntos buhat sa tatlong tagumpay. Haharapin nila ang mga Cebuano sa kanilang nalalabing laro sa Mayo 12, ang huling araw ng elimination bago ang semis sa Mayo 16 at finals sa Mayo 22.

Gov. Remulla sa 800,000 votes para kay Marcos: ‘Yabang lang ‘yun!’

ni Jasmin Joy Evangelista | March 23, 2022

“Yabang lang ‘yun!”

Ito ang pahayag ni Cavite Governor Jonvic Remulla habang tumatawa nang tanungin hinggil sa 800,000 votes sa kanyang probinsiya para kay presidential candidate Ferdinand “Bongbong” Marcos nitong Martes.

Sinabi ito ni Remulla sa muling pagbisita nina Marcos at running mate nito na si Davao City Mayor Sara Dterte-Carpio sa vote-rich Cavite.

Nagsagawa ng grand rally ang Uniteam sa bayan ng General Trias kung saan ayon kay Remulla ay dinaluhan ng nasa 100,000 katao.

Ito ay bukod pa sa estimated na 40,000 katao na ayon sa gobernadora ay nasa labas ng venue.

“I asked them to come back,” ani Remulla sa mga reporters nang tanungin kung bakit muling bumisita ang Uniteam sa Cavite.

“Cavite has something to prove… Cavite is the epicenter of Philippine politics. Where Cavite goes, the country goes,” dagdag pa niya.

Caloocan at Cavite, patuloy na walang suplay ng tubig – Maynilad

ni Lolet Abania | March 14, 2022

Patuloy na makararanas ang mga kostumer ng Maynilad Water Services Inc. ng water service interruption dahil sa mabilis na pagkonsumo ng tubig at tinatawag na high turbidity level ng suplay nito.

Sa interview ngayong Lunes kay Maynilad spokesperson Jennifer Rufo, sinabi nitong apektado ang mga residente sa Caloocan sa bahagi ng norte hanggang Cavite sa bahagi ng south, mula alas-10:00 ng gabi hanggang alas-6:00 ng umaga.

“Yes po. Tuloy-tuloy po siya. Bale pinipilit po nating gawing off-peak lang po ‘yung interruptions para bigyan po tayo ng pagkakataon na punuin ‘yung ating mga reservoir in time for peak demand the following day,” paliwanag ni Rufo.

Ayon kay Rufo, tumataas ang kinokonsumong tubig ngayon dahil sa mainit na panahon, habang ang tubig sa reservoirs ay mas madaling maubos kaysa karaniwan.

Aniya pa, sa southern part gaya ng Muntinlupa, ang suplay ng tubig mula sa Laguna Lake ay limitado na rin dahil sa spikes naman ng turbidity.

Gayunman, sinabi ni Rufo na nagsasagawa na ang Maynilad ng mga treatment facilities at naglalagay na rin ng mga deep wells para makadagdag ng suplay ng tubig sa kanilang mga kostumer.

Nitong Sabado, nag-anunsiyo ang Maynilad ng water service interruptions ng hanggang Marso 16, kung saan ayon kay Rufo, posibleng ma-extend pa ito.

Ang Maynilad ay nagseserbisyo sa mga kostumer na nasa mga lungsod ng Caloocan, Las Piñas, Makati, Malabon, Manila, Muntinlupa, Navotas, Parañaque, Pasay, Quezon, Valenzuela.

Gayundin, sa ilang lugar sa Cavite gaya ng mga lungsod ng Bacoor, Cavite, at Imus, at sa mga bayan ng Kawit, Noveleta at Rosario.