Pamimigay ng ayuda sa Bacoor, stop muna

ni Mary Gutierrez Almirañez | April 7, 2021

Sinuspinde ng Bacoor, Cavite ang pamimigay ng ayuda sa mga indibidwal at pamilyang naapektuhan ng enhanced community quarantine (ECQ) matapos magpositibo sa COVID-19 ang isang kawani ng lungsod na naging dahilan upang isarado ang city hall.

Ayon kay Mayor Lani Mercado-Revilla ngayong umaga, Abril 7, “Naalarma lang kami kagabi nang tumawag ang department head ng City Treasurer’s Office dahil may isa kaming empleyado na nagkaroon ng senyales na COVID positive.”

Ipinaliwanag niyang kasado na ang pamimigay nila ng ayuda ngayong araw, ngunit nagpasya silang ipagpaliban muna dahil sa posibleng pagkalat ng virus, lalo na sa tanggapan ng nangangasiwa sa ayuda.

Giit pa niya, “Aayusin po muna namin ang sitwasyon sa City Treasurer’s Office. Sana po, maintindihan ng ating mga kababayan ‘yung proseso. Hindi po ganu'n-ganu'n na ibang tao na lang magdi-distribute ng pera. May mga sistema po. May proseso kaya umaapela po kami sa ating mga kababayan.”

Sa ngayon ay pumalo na sa 1,367 ang aktibong kaso ng COVID-19 sa lungsod. Puno na rin aniya ang mga ospital at mahaba pa ang listahan ng mga nasa waiting list.

“We will be writing a letter to the DSWD 4A para banggitin na suspendido muna for the next few days ang atin pong pagbibigay ng ayuda and we will appeal for an extension dahil po talagang ‘di po biro ito,” sabi pa ni Mayor Lani.

Lumabag sa curfew, pinag-push-up nang 300 beses, namatay

ni Mary Gutierrez Almirañez | April 6, 2021

Iimbestigahan ang pagkamatay ng isang curfew violator sa Cavite matapos mag-pumping exercise ng 300 beses, ayon kay Department of the Interior and Local Government (DILG) Undersecretary Jonathan Malaya ngayong umaga, Abril 6.

Aniya, “Lumalabas sa report, diumano, itong tao raw na ito ay inaresto ng mga village guards at inilipat sa barangay at ‘yung barangay naman ay ibinigay sa pulis. So, meron pong dalawang ahensiya dito na involved. Unang-una, 'yung local government unit. Pangalawa, ‘yung ating kapulisan.”

Kuwento pa ni Reichelyn Balce, live-in partner ng yumaong si Darren Peñaredond, lumabas ng bahay si Darren nitong Sabado para sana bumili ng mineral water ngunit hinuli at dinala ito sa General Trias Police Station kung saan unang ipinagawa rito ang 100 beses na pumping exercise. Ipinaulit pa iyon hanggang umabot nang 300 beses.

Nilinaw ni Reichelyn na may sakit sa puso si Darren. Nang gabi ring iyon ay isinugod nila sa ospital ang lalaki ngunit namatay din kalaunan.

Itinanggi naman ng General Trias Police na si Chief Police Lieutenant Colonel Marlo Solero ang ipinagawa kay Darren at iginiit na pinag-community service lamang nila ito.

Paliwanag ni Malaya, “Nakipag-ugnayan na po tayo sa Kampo Crame, kay Lt. Gen. Cesar Hawthorne Binag, at nagbigay na po tayo ng direktiba na imbestigahan kaagad-agad kung mayroon bang mga paglabag sa protocol o kaya naman nagkaroon ng iregularidad ‘yung ating mga kapulisan. We can assure the public na kung meron mang pagkukulang ang ating kapulisan, sisiguraduhin po natin na sila ay mananagot dito. Ito naman pong LGU ay meron ding imbestigasyon at hinihintay po namin ang report mula naman sa city government of General Trias.”

Samantala, inirekomenda naman ni Department of Justice Secretary Menardo Guevarra na palitan na lamang ng community service ang parusa sa mga quarantine violators sa halip na ikulong o pagmultahin ang mga ito.

Aniya, “I also recommended that in the enforcement, the stricter enforcement of the ordinances, that LGUs consider the possibility of imposing na lamang the penalty of community service for those who will continue to violate our ordinances rather than imprison or rather than putting them in jail or fining them, eh, kasi talaga ngang mahirap na ang buhay sa ECQ.”

50 nag-swimming sa Cavite, hinuli

ni Mary Gutierrez Almirañez | April 5, 2021

Limampung residente ang nahuling lumalangoy at naglalaro sa Bacoor Bay, Cavite simula nitong Sabado at Linggo, batay sa isinagawang pagpapatrolya ng Bacoor City Agriculture Office-Deputy Fish Warden (DFW) at ng Philippine Coast Guard (PCG).

Ayon sa ulat, dinampot ang 40 na menor de edad at 10 nasa tamang gulang na mga nahuli mula sa iba’t ibang bahagi ng Bacoor Bay. Ang ilan ay dinala sa Barangay Zapote 5, Zapote 1 at Digman upang ipaubaya sa mga opisyal ang pagdidisiplina sa kanila.

Paliwanag pa ni Joshua Villaluz ng Agricultural Technologist-Fishery law enforcement Agriculture Office, balak lamang sana nilang mag-abiso sa mga residente na iwasang maligo sa dagat habang naka-lockdown, ngunit ikinagulat nila nang makita ang mga naliligo at naglalaro na karamihan ay walang suot na face mask at magkakadikit pa.

Kabilang ang Cavite sa NCR Plus Bubble na kasalukuyang isinasailalim sa enhanced community quarantine (ECQ) dahil sa mataas na kaso ng COVID-19, kung saan tanging mga mangingisda lamang ang pinapayagang bumiyahe sa dagat.