Cash ayuda, extended hanggang Agosto 31 — DILG

ni Lolet Abania | August 25, 2021

Inianunsiyo ng Department of the Interior and Local Government ngayong Miyerkules na pinalawig pa ang deadline ng pamamahagi ng cash aid sa Metro Manila hanggang Agosto 31.

Sa isang pahayag ng DILG, tinatayang nasa 80% o P9.1 bilyon pa lamang mula sa P11.2 bilyon pondo ang naibigay sa mga low-income individuals at pamilya nito sa National Capital Region hanggang nitong Martes.

“We have decided to give the LGUs in the NCR until the end of the month to complete the distribution of ayuda,” ani DILG Secretary Eduardo Año. Sinabi pa ng DILG, nasa kabuuang 9,101,999 benepisyaryo ang nakatanggap ng kanilang ayuda sa NCR mula Agosto 11 hanggang 24. Ayon kay Año, ginawa ang pagpapalawig ng pamamahagi ng ayuda dahil na rin sa kahilingan ng mga local government units (LGUs), na sinang-ayunan nina Department of Social Welfare and Development Secretary Rolando Bautista at Department of National Defense Secretary Delfin Lorenzana.

Gayundin, binanggit ng DILG chief na may ilang LGUs na hiniling na i-extend ang kanilang payout para sa kanilang nasasakupan sa dahilang limitado ang kanilang galaw at manpower.

Aniya, “The mayors also need more time to process appeals and grievances so it is justified for us to give an extension.” Dagdag ni Año, ang Caloocan City lamang ang nakakumpleto ng distribusyon ng kanilang social assistance fund. Natapos naman ng Pateros, Pasay, Manila, at Mandaluyong ang kanilang payout na nasa 97.34%, 95.16%, 91.57%, at 85.84%, batay sa pagkakasunod.

Una nang binigyan ng 15-araw ang mga Metro Manila LGUs para makumpleto ang pamamahagi ng cash aid, na nagsimula noong Agosto 11 at magtatapos sana ngayong Miyerkules, Agosto 25.

P13.1-B, ayuda para sa 10.7-M taga-NCR — Malacañang

ni Lolet Abania | August 3, 2021

Aabot sa higit P13 bilyon ang magiging gastos ng gobyerno sa pagbibigay ng cash aid sa mga mahihirap na residente sa Metro Manila para sa 2-linggong enhanced community quarantine (ECQ) na magsisimula sa Agosto 6.

Ayon kay Presidential Spokesperson Harry Roque, Jr., manggagaling ang pondo mula sa savings ng mga ahensiya ng gobyerno na nakasaad sa Administrative Order 41 na inisyu ni Pangulong Rodrigo Duterte noong Mayo at ang tinatawag na windfall of collection mula naman sa Bureau of Treasury. “This is for 10.7 million residents worth P13.1 billion.

That is the worth of the financial assistance that will be distributed,” ani Roque sa briefing ngayong Martes. Sinabi ni Roque na ang kaso ng COVID-19 sa Metro Manila ay tumaas nang 65% kumpara noong nakaraang linggo sa gitna pa ng mas nakahahawang Delta variant, kaya kinakailangan talagang ipatupad ngayon ang ECQ. “We will not impose it if it is not needed,” dagdag ng kalihim.

P4K ayuda kada pamilya sa NCR, sure na — Roque

ni Lolet Abania | August 2, 2021

Makatatanggap ang mga residente ng National Capital Region (NCR) ng P1,000 hanggang P4,000 cash aid dahil ang rehiyon ay muling isasailalim sa enhanced community quarantine (ECQ) sa gitna ng COVID-19 mula Agosto 6 hanggang 20.

“Walang ECQ kung walang ayuda,” ani Presidential Spokesperson Harry Roque sa briefing ngayong Lunes. “Sigurado, may ibibigay na P1,000 per person and maximum of P4,000 per family. Hindi pa lang sigurado saan kukunin,” dagdag ng kalihim.

Ayon kay Roque, inaasahan na ngayong Lunes nang hapon ipapabatid ng Department of Budget and Management (DBM) ang funding source para sa nasabing cash aid. “Para maibigay po ito sa lalong madaling panahon,” sabi ni Roque.

Una nang sinabi ng Malacañang na magbibigay ang gobyerno ng ayuda na P1,000 hanggang P4,000 kada pamilya sa mga lugar sa bansa na nasa ilalim ng ECQ sa gitna ng COVID-19 pandemic. Sinabi pa ni Roque na ang cash aid ay sa ilalim ng Assistance to Individuals in Crisis Situations ng Department of Social Welfare and Development (DSWD).