15M Pinoy bakunado na kontra-COVID-19 – Galvez

ni Lolet Abania | September 9, 2021

Mahigit sa 15 milyon indibidwal ang nabakunahan na kontra-COVID-19, ayon kay Vaccine Czar Secretary Carlito Galvez, ngayong Huwebes.

Ito ang sinabi ni Galvez hinggil sa updates ng vaccine rollout ng gobyerno sa ginanap na pagdinig sa House committee on economic affairs patungkol sa multi-party agreements na inihain ng mga local government units (LGUs) at pribadong sektor sa pagkuha ng mga COVID-19 vaccines.

Paliwanag ni Galvez na sa kabila ng mga hamon at umano’y hadlang na nararanasan, patuloy pa rin ang pagbabakuna ng gobyerno sa bawat Pilipino.

Ayon kay Galvez nasa kabuuang 52,792,130 doses ng COVID-19 vaccine na ang natanggap ng bansa, kung saan may kabuuang 37,176,513 doses ang na-administer sa mga kababayan.

Nasa kabuuang 15,837,799 indibidwal aniya naman, ang fully vaccinated kontra-COVID-19.

Inaasahan na rin ng Pilipinas na makatatanggap ng mahigit sa 61 milyong COVID-19 vaccines ngayong buwan at sa Oktubre habang ang mga deliveries ng bakuna ng Sinovac, Pfizer at ang US-COVAX donations ay mas naging matatag sa ngayon.

Sinabi pa ni Galvez na layon ng gobyerno na makamit ang 70% fully-vaccinated na populasyon sa Metro Manila, Central Luzon, Calabarzon, Metro Cebu, Metro Davao, Cagayan de Oro City, at iba pang risk areas hanggang sa katapusan ng Oktubre.

Dagdag pa ng kalihim, nais din ng pamahalaan na maabot ang tinatayang 50% para sa first dose ng bakuna sa natitirang rehiyon sa katapusan din ng Oktubre.

COVID vaccine booster sa health workers, oks — Galvez

ni Lolet Abania | September 1, 2021

Pabor si vaccine czar Carlito Galvez, Jr. na mabigyan ng COVID-19 vaccine booster shots ang mga healthcare workers at mga indibidwal na may comorbidities.

“I don’t have any problem with it. Our healthcare workers must be given full protection,” ani Galvez ngayong Miyerkules sa Kapihan sa Manila Bay online forum, na ayon pa sa kanya, ang Chinese biopharmaceutical company na Sinovac ay handang mag-donate ng 500,000 booster doses para sa mga medical workers.

Gayunman, ayon kay Galvez, hinihintay pa ng gobyerno ang rekomendasyon ng World Health Organization (WHO) at ng vaccine expert panel. Hiniling naman ng administrasyong Duterte ang tinatawag na standby authority mula sa Kongreso para sa pagbili ng P45.367 bilyong halaga ng booster doses sa susunod na taon.

Noong nakaraang linggo, sinabi ni Department of Health (DOH) Undersecretary Maria Rosario Vergeire na ang ebidensiya na magbibigay-suporta para sa pagbabakuna ng booster doses ay nananatiling “minimal and incomplete,” subalit aniya, “We already have saved money for our booster shots for 2022 if ever it is approved.”

Target matapos sa Disyembre... Memorial wall sa Libingan ng mga Bayani, tribute sa mga frontliners

ni Lolet Abania | August 31, 2021

Target ng gobyerno na matapos bago mag-Disyembre ang konstruksiyon ng isang memorial wall bilang pagkilala sa mga sakripisyong ginawa ng mga nasawing medical frontliners.

Ayon kay National Task Force Against COVID-19 chief implementer Secretary Carlito Galvez, Jr., matatagpuan sa Libingan ng mga Bayani sa Taguig City ang memorial wall, kung saan nakasaad ang kabayanihan ng mga doktor, nars at iba pang medical personnel.

“We will do it [for] maybe 41 days or more or less two months or even less than three months. Before December po tatapusin po namin,” ani Galvez sa Cabinet briefing ni Pangulong Rodrigo Duterte na ipinalabas ngayong Martes.

Una nang sinabi ni Galvez na nakikipag-ugnayan na siya kay Department of National Defense Secretary Delfin Lorenzana at iba pang stakeholders para sa disenyo at lokasyon ng naturang memorial.

Pinasalamatan naman ni Pangulong Duterte ang Armed Forces of the Philippines sa suportang ibinigay nila para sa proyekto.