46 empleyado, nagka-COVID-19, Call Center sa Davao, ini-lockdown

ni Ronalyn Seminiano Reonico | May 29, 2021

Isinailalim sa lockdown ang isang call center office sa Davao City noong Biyernes matapos magpositibo sa COVID-19 ang 46 empleyado nito.

Ayon kay Dr. Michelle Schlosser ng COVID-19 Task Force, dumami ang bagong kaso ng COVID-19 sa naturang call center office sa Ecoland, Davao City.

Saad pa niya, “Davao City monitors active cases through our contact tracers. The company failed to provide and declare an honest and comprehensive close contact line list to the District Health Officer Contact Tracer where the office is located.”

Ang District Health Officer, Sanitation Team, Philippine National Police, at barangay council ang naghain ng lockdown notification sa naturang kumpanya sa loob ng 14 araw.

Nagpaalala rin ang awtoridad sa mga pampribado at pampublikong opisina na sumunod sa mga ipinatutupad na health protocols upang maiwasan ang pagdami ng kaso ng COVID-19.

Nagsasagawa na rin ng contact tracing sa mga nakasalamuha ng mga empleyado ng naturang kumpanya at isinailalim na rin sa isolation ang mga ito.

Samantala, noong Biyernes ay naiulat ang 173 karagdagang kaso ng COVID-19 sa Davao City at sa kabuuang bilang ay nakapagtala ng 16,561 total cases sa naturang lugar kung saan 1,381 ang aktibong kaso.

Covid patients na nagpapasaklolo sa One Hospital Command Center, dumarami

ni Mary Gutierrez Almirañez | March 19, 2021

Dumami ang natatanggap na tawag ng One Hospital Command Center (OHCC) kasabay ng paglobo ng kaso ng COVID-19 sa bansa, ayon kay Health Undersecretary Leopoldo Vega nitong Miyerkules. Aniya, "'Yung mga tawag namin sa ospital, talagang tumataas ngayon.

Ang average, 250 to 300 calls a day." Inilunsad ng Department of Health (DOH), Inter-agency Task Force on Emerging Infectious Diseases (IATF-EID), Department of Interior Local Government (DILG), Department of Tourism (DOT), Metro Manila Development Authority (MMDA) at Bases Conversion and Development Authority (BCDA) ang One Hospital Command Center (OHCC) na matatagpuan sa MMDA Arena, Makati City para sa mga COVID-19 patients o indibidwal na nahihirapang makahanap ng medical attention, referral hospitals, quarantine facilities at medical transportation.

Bukas ang tanggapan ng OHCC na maaaring tawagan sa 02-886-505-00, 0915-777-7777 at 0919-977-3333 o i-scan ang Quick Response (QR) code.

Dagdag ni Vega, "Pati returning overseas Filipinos, hinahanapan namin ng isolation at quarantine facilities. ‘Pag minsan, meron kaming mga 'falls', hindi namin kaagad magampanan. Mabuti na lang meron kaming call center.”

Ayon naman kay DOH Epidemiology Bureau Director Alethea De Guzman, karamihan sa mga natatanggap na tawag ng OHCC ay mga nanghihingi ng advice o counseling.

“In one way, we don’t want more calls because that means more people are getting sick, but I’d like to take a positive (view) that many people are becoming aware that they should not self-medicate,” giit pa ni De Guzman.