6 rehiyon, binabantayan ng DOH sa biglang pagtaas ng COVID

ni Lolet Abania | July 26, 2021

Anim na rehiyon ang mino-monitor ngayon ng Department of Health (DOH) matapos na magpakita ng tinatawag na “trend reversal”, mula sa negatibo ay naging positibo sa 2-linggong case growth rate na nagresulta sa pagtaas ng COVID-19 infections.

Ayon kay DOH Undersecretary Maria Rosario Vergeire, ang anim na region na kanilang mino-monitor ay Metro Manila, Cagayan Valley, Central Luzon, Calabarzon, Central Visayas, at Northern Mindanao.

Paliwanag ni Vergeire, ang reproduction number ay bilang ng mga tao na bawat isang kaso nito na maaaring maka-infect, kung saan nakapagtala ng 1.009 sa Metro Manila, 0.95 sa Cagayan Valley, 1.12 sa Central Luzon, 0.98 sa Calabarzon, 1 sa Central Visayas, at 0.91 sa Northern Mindanao.

Kapag ang reproduction number ay 1 o mas mataas pa, ibig sabihin, nagpapatuloy ang COVID-19 transmission.

Sa buong bansa, lumabas na tumaas ang mga kaso ng COVID-19 ng 1% nito lamang Hulyo 11 hanggang 24, subalit aniya, dapat na maging maingat sa paggamit ng salitang “surge” para ilarawan ang pagtaas ng infections.

“Ang surge, meron ‘yang definition sa epidemiology which is not what’s happening right now. Tumataas mga kaso — that, we can verify,” paliwanag ni Vergeire.

Ayon din kay Vergeire, ang Cordillera at Ilocos regions ay nakapagtala naman ng isang positive 2-linggong case growth rate nitong anim na linggo lamang, habang ang Northern Mindanao at Davao region ay maingat nilang binabantayan dahil sa mataas na ICU utilization rate.

Mino-monitor din ng DOH ang 26 probinsiya na nakapagtala ng mataas na average daily attack rate at low-risk hanggang moderate-risk sa 2-linggo case growth rate subalit hindi na binanggit ng ahensiya ang mga lugar.

Nakaalerto naman ang mga awtoridad matapos na kumpirmahin ng DOH ang local transmission ng mas nakahahawang Delta variant.

Sa ngayon, nasa 119 kaso na ang tinamaan ng Delta variant, habang 12 ang nananatiling active case.

Bagong COVID-19 testing laboratory, binuksan sa Isabela

ni Lolet Abania | November 22, 2020

Binuksan ng Philippine Red Cross (PRC) ang isang Coronavirus testing laboratory sa lalawigan ng Isabela para magserbisyo sa buong rehiyon ng Cagayan Valley.

Ayon kay PRC Chairman Sen. Richard Gordon, kayang magproseso sa laboratoryo ng 2,000 tests araw-araw. Umabot sa P30 million ang halaga ng pasilidad at natapos na magawa nang isang buwan lamang.

"Importante ‘yung binabayaran kami. 'Pag nababayaran kami, iniikot namin, nire-reinvest namin ang pera," sabi ni Gordon. Matatandaang noong November 5, nagbayad ang Philippine Health Insurance Corporation (PhilHealth) ng P700 million sa naturang non-government organization, subali’t may P377 million pang utang ang ahensiya na kailangang i-settle para sa COVID-19 testing services, ayon sa datos ng Red Cross.

Gayunman, noong May, pumirma sa isang kasunduan ang PhilHealth at PRC para sa itinakdang COVID-19 tests fee na P3,500 ang halaga bawat isa.

Samantala, namahagi ang PRC ng relief goods sa 250 residente sa Barangay Sipay, Ilagan City sa Isabela na sinalanta ng Bagyong Ulysses, ayon kay Gordon.

Patay kay 'Ulysses', 67 na

ni Ronalyn Seminiano Reonico | November 15, 2020

Umakyat na sa 67 ang bilang ng mga nasawi sa bansa dahil sa Bagyong Ulysses, ayon sa National Disaster Risk Reduction and Management Council (NDRRMC).

Mula umano sa Cagayan Valley ang 22 sa mga nasawi, 3 naman ang mula sa Central Luzon, 17 sa Calabarzon, 8 sa Bicol Province, 10 sa Cordillera Administrative Region, at ang iba pa at mula sa Metro Manila.

Ayon sa tala ng NDRRMC, 21 ang sugatan at 12 ang nawawala. Samantala, tinatayang aabot sa P1.19 billion agricultural losses at P270 million infrastructure damages ang idinulot ng pananalasa ng Bagyong Ulysses sa bansa, ayon kay Public Works Secretary Mark Villar.

Pahayag naman ni NDRRMC Spokesperson Mark Timbal, "NDRRMC is working closely with all member-agencies. There is no discrepancy in the figures. The figures provided by the good DPWH is their agency's estimate of the possible damages to infrastructure incurred in all affected areas.

"The figures that NDRRMC reports po are the actual computed damages as reported by the NDRRMCs from their ongoing damage assessment.”