Sunog na sunog ang mga labi 19 sa 49 sundalo sa bumagsak na eroplano, nakilala na — AFP

ni Lolet Abania | July 7, 2021

Inilabas na ng Armed Forces of the Philippines ngayong Miyerkules ang mga pangalan ng 19 na sundalo na kabilang sa mga nasawi sa pagbagsak ng C-130 aircraft sa Sulu. Sa 49 servicemen na namatay sa insidente, kinilala ng AFP ang 19 sa mga namatay kung saan ilan sa kanila ay sunog na sunog ang katawan at halos hindi na makilala.

Sila ay sina Major Emmanuel Makalintal, Major Michael Vincent Benolerao, First Lieutenant Joseph Hintay, Technical Sergeant Mark Anthony Agana, Technical Sergeant Donald Badoy, Staff Sergeant Jan Neil Macapaz, Staff Sergeant Michael Bulalaque, Sergeant Jack Navarro.

Mula sa AFP Medical Corps ay si Captain Higello Emeterio at mula sa AFP Nurse Corps ay si First Lieutenant Sheena Alexandria Tato. Mula sa Philippine Army ay sina Sergeant Butch Maestro, Private First Class Christopher Rollon, Private First Class Felixzalday Provido, Private Raymar Carmona, Private Vic Monera, Private Mark Nash Lumanta, Private Jomar Gabas, Private Marcelino Alquisar at Private Mel Mark Angana.

Sa ulat ng AFP, tinatayang nasa 11 na mga labi ay dinala na sa kanilang bayan, kabilang dito ang kina Emeterio, Maestro, Agana, Rollon, Provido, Gabas, Alquisar, Lumanta, Angana, Carmona, at Monera. Ang labi naman ni Sheena Alexandria Tato ay dadalhin pa lamang via C295 aircraft habang pito sa mga nakilalang bangkay ay inihahanda nang i-transport sa kanilang bayan.

Ayon kay AFP Chief General Cirilito Sobejana, nakatuon sila sa pagkilala sa 30 pang mga bangkay na nananatili sa Zamboanga City habang patuloy ang imbestigasyon sa pagbagsak ng eroplano.

Itinama na rin ni Sobejana ang naunang report na 50 ang kabuuang namatay sa hanay ng AFP personnel na aniya, nagkaroon ng dobleng bilang sa mga ito.

Sa ngayon, ang kabuuang nasawi sa mga servicemen sa pagbagsak ng military plane ay 49. “This is a very hard task since the cadavers were beyond recognition but we have experts supporting our efforts. We are doing our best to expedite the identification and the ongoing investigation without compromising its credibility,” ani Sobejana.

Hiniling din ng opisyal sa publiko ang kanilang pang-unawa habang patuloy ang investigating teams sa paghahanap ng mga ebidensiya para malaman ang tunay na naging dahilan ng trahedya.

“Our people can be assured of the AFP’s transparency however the investigation process takes time. All factors are being considered in our deliberate efforts to ensure the accuracy of the findings,” sabi pa ni Sobejana.

Black box ng bumagsak na eroplano, paiimbestigahan sa US

ni Lolet Abania | July 7, 2021

Nakatakdang ipadala ng Armed Forces of the Philippines sa United States ang black box o flight data recorder ng Philippine Air Force (PAF) C-130 plane na bumagsak sa Sulu nitong Linggo upang makatulong sa imbestigasyon sa insidente.

“Hawak na nila (mga imbestigador ang black box) subalit wala tayong kakayahan locally na buksan at tingnan kung ano ‘yung nilalaman. Ipapadala natin ito sa Amerika,” ani AFP Chief General Cirilito Sobejana sa isang interview ngayong Miyerkules.

“Nakausap na rin natin ‘yung counterpart. Sila naman ay nag-commit na kung matatanggap na nila ay bubuksan nila kaagad upang basahin kung ano ang nilalaman nito at ipasa kaagad sa atin para makatulong nang malaki sa pag-imbestiga kung ano ang sanhi ng pagbagsak ng C-130,” dagdag ni Sobejana.

Ang C-130 plane na nanggaling sa Cagayan de Oro City at magdadala sa mga tropa ng militar sa Sulu ay bumagsak bago magtanghali nitong Linggo matapos na mawala sa runway ang eroplano sa Barangay Bangkal, Patikul, Sulu.

Limampung mga sundalo at 3 sibilyan ang namatay habang 46 servicemen at 4 na sibilyan naman ang nasugatan. Kaugnay nito, sinabi ni Sobejana na 16 sa 50 sundalo na namatay sa pagbagsak ng eroplano ay nakilala na. Gayundin, ang black box ay narekober na sa naturang lugar.

Una nang sinabi ni Sobejana na ang mga pag-uusap at naging sitwasyon bago ang pagbagsak ay mare-retrieve mula sa black box na makakatulong upang malaman ang naging sanhi ng insidente. “Malalaman natin kung ano ‘yung magiging conversation doon sa cockpit,” saad ni Sobejana.

Nilinaw ng AFP nitong Lunes na wala namang naganap na foul play sa insidente. Kahapon, itinanggi naman ng PAF ang espekulasyong nagkaroon ng overloading sa mga pasahero ng naturang eroplano.

Ayon pa kay Sobejana, nais ni Pangulong Rodrigo Duterte na ang nasabing insidente ang huling magaganap na pagbagsak na kasasangkutan ng military aircraft. “Very clear po ang instruction ng ating Presidente na, our air assets and other military equipment should be in good shape all the time, and you cannot afford to have similar incident in the future. That (C-130 crash) should be the last,” sabi ng opisyal.

17 patay, 40 sugatan sa bumagsak na eroplano ng PAF

ni Lolet Abania | July 4, 2021

Nasa 17 katao ang nasawi habang 40 iba pa ang nasugatan matapos bumagsak ang C-130 aircraft ng Philippine Air Force (PAF) sa Sulu bago magtanghali ngayong Linggo. Sa isang pahayag ni Department of National Defense Secretary Delfin Lorenzana, ang mga nasawi ay kabilang sa 92 personnel na lulan ng naturang eroplano.

Sa 92 pasahero, 3 ang piloto at 5 ay mga crewmen. “The rest were Army personnel reporting for duty,” ani Lorenzana. Nagmula ang eroplano sa Lumbia Airport sa Cagayan de Oro City na nakatakda sanang lumapag sa Jolo port sa Sulu nang maganap ang insidente bandang alas-11:30 ng umaga.

Ayon sa PAF, patuloy na nagsasagawa ng rescue operations sa lugar. Kinumpirma naman ni Armed Forces of the Philippines (AFP) Chief General Cirilito Sobejana na nasa 40 personnel ang nasagip bago tuluyang nagliyab ang military cargo plane.

“Responders are at the site now. We are praying we can save more lives,” ani Sobejana sa isang phone interview. “So far, meron na tayong 40 na na-rescue at kasalukuyang ginagamot sa 11th ID Hospital sa Busbus, Sulu,” ani pa Sobejana.

Karamihan sa mga pasahero ng eroplano ay military personnel na itatalaga sa 11th Infantry Batallion’s Joint Task Force Sulu ng Philippine Army matapos na maka-graduate kamakailan mula sa kanilang basic military course.

“One of our C-130s while transporting our troops from Cagayan de Oro, na-miss niya ‘yung runway trying to regain power, at hindi nakayanan. Bumagsak doon sa may Barangay Bangkal, Patikul, Sulu,” sabi ni Sobejana sa mga reporters.

“We are doing our best effort to rescue the passengers… ‘Yung ating ground commander, nandu’n na. Si General Gonzales, doing his best effort na maapula ‘yung apoy at ma-rescue safely ‘yung mga passengers,” saad ng opisyal.

Matatandaang noong Enero ngayong taon, pito katao ang namatay matapos na isang PAF UH-1H helicopter ang bumagsak malapit sa Barangay Bulonay sa Bukidnon.