Magbebenta ng overpriced swab test, suspendido ang lisensiya

ni Lolet Abania | November 25, 2020

Naglabas ng anunsiyo si Department of Health (DOH) Sec. Francisco Duque III ngayong Miyerkules na ang halaga ng RT-PCR (nasal swab) test para sa COVID-19 infection ay P3,800 hanggang P5,000 maximum.

Ayon kay Duque, papatawan ng suspensiyon sa lisensiya na mag-operate ang negosyo kapag lumabag ito sa itinakdang price cap para sa first at second offense habang sa third offense ay nangangahulugan ng revocation ng lisensiya.

“Ito ang nabuo from market study. Meron itong batayan at hindi binunot lang from thin air,” sabi ni Duque.

“Ginawa nating price range kasi maraming variables. This gives laboratories leeway to consider variables,” sabi pa ng kalihim.

Kinokonsidera bilang gold standard ang test ng RT-PCR o real-time reverse transcription polymerase chain reaction para sa posibleng COVID-19 infection. Umabot din sa halos walong buwan bago naitakda ang price cap ng RT-PCR test simula ng COVID-19 transmission na nai-record sa bansa noong March.

Ilang lugar sa Metro Manila, mawawalan ng tubig

ni Thea Janica Teh | October 29, 2020

Makararanas ng water interruption ang ilang lugar sa Metro Manila kabilang ang Pasig, Taguig at Makati ngayong Huwebes upang maisagawa ng Manila Water ang kanilang maintenance activity.

Ilan sa mga gagawin ng Manila Water ay pipe maintenance at pressure reducing valve (PRV) installation sa AV Cruz Cor. Elisco Road, PAE at Bagong Tanyag Street sa Taguig.

Mawawalan ng tubig mamayang alas-10 ng gabi hanggang alas-4 ng madaling-araw ng Biyernes ang Barangay Ibayo-Tipas, Central Bicutan at Tanyag.

Samantala, mawawalan din o hihina ang supply ng tubig sa ilang barangay sa Pasig kabilang ang Barangay Kalawaan mamayang alas-10 ng gabi hanggang alas-4 ng madaling-araw ng Biyernes upang maisagawa ang pagpapalit ng line meter.

Mawawalan din ng tubig ang Barangay Pembo sa Makati mamayang alas-11 ng gabi hanggang alas-3 ng madaling-araw ng Biyernes.

Kaya naman pinaalalahanan ng Manila Water ang lahat ng mga residenteng naninirahan sa mga nabanggit na lugar na mag-imbak na bago ang itinakdang oras na mawawalan ng tubig upang may magamit.