Taas-singil sa ATM transaction, tuloy!

ni Lolet Abania | February 14, 2021

Ilang mambabatas ang nanawagan na ipagpaliban na muna ang pagtataas ng mga bangko sa tinatawag na interbank charges para sa mga transaksiyon sa automated teller machine (ATM).

"Lalong magpapabigat ito sa ating consumers na hindi pa nakabangon ngayon dahil sa matinding krisis na ito na dinala ng pandemya ng COVID-19," ayon kay Bayan Muna Rep. Carlos Isagani Zarate.

Sinabi naman ni Senior Citizen Party-list Rep. Rodolfo Ordanes na huwag na sanang pahirapan pa ang mga empleyado ng gobyerno maging ang mga senior citizens dahil sa isasagawa ng mga bangko na taas-singil sa ATM sakaling sa ibang bangko magwi-withdraw ang mga ito.

Idiniin ni Ordanes na dapat sagutin na lamang ng bangko ang dagdag na singil na ito sa halip na ikarga sa mga kliyente.

Inaasahang sa Abril 7 na ipapatupad ang pagtataas ng interbank ATM transaction fees.

Aabot sa P10 hanggang P18 ang magiging singil kada withdrawal transaction ng isang kliyente habang ang balance inquiry naman ay P1.50 hanggang P2, kapag ang terminal o machine ay hindi ang iyong bangko.

Ayon sa director ng payment system oversight department ng Bangko Sentral ng Pilipinas (BSP) na si Raymond Estioko, noong 2018 pa nakakuha ng approval ang mga bangko tungkol sa taas-singil sa interbank ATM transaction fees.

Gayundin, binanggit ni Estioko na pinag-aralan umano ito ng BSP at nagkaroon ng mga konsultasyon.

Ipinaliwanag naman ng managing director ng Bankers Association of the Philippines (BAP) na si Ben Castillo na mayroong nagiging gastos ang interconnections ng mga bangko.

Sinabi pa ni Castillo, kailangan din ang pagtataas ng singil upang mapalakas ang banking system ng bansa.

"Wala pong choice ang mga bangko because system-wide application po iyan," sabi ni Castillo.

"Ngayon, tumama tayo sa panahon ng pandemic. Iyan po ay unfortunate," dagdag niya.

Bagong COVID-19 facility sa Malabon, pinailawan ng Meralco

by Meralco - @Brand Zone | February 4, 2021

Bilang suporta sa gobyerno at sa pribadong sektor sa laban kontra COVID-19, pinailawan ng Meralco ang bagong treatment center na ipinatayo ng Department of Public Works and Highways (DPWH). Ito ay matatagpuan sa C4 Road, Barangay Tanong, Malabon City.

Bahagi ng proyektong ito ay ang paglalagay ng bagong pasilidad na paglalagyan ng metro, pagtatayo ng apat na konkretong poste, at paglalagay ng dalawang 75-kVa na distribution transformer.

Ang ginamit na materyales sa tatlong (3) haba ng wire na ikinabit sa pagitan ng apat na poste ay overhead conductor na may balot. Kaugnay ng nasabing proyekto ay naglipat din ang Meralco ng isang pasilidad ng elevated metering center (EMC) at distribution transformer.

Gaya sa iba pang naunang treatment center para sa COVID-19, sinisiguro ng Meralco ang maaasahang supply ng koryente para rito. Sa kasalukuyan, nasa 90 na ang bilang ng mga pasilidad para sa COVID-19 na pinailawan ng Meralco.

Kabilang dito ay mga ahensya ng gobyerno, mga pampubliko at mga pribadong ospital, laboratoryong ginagamit sa testing, pasilidad para sa quarantine, at mga treatment center.

Pagbebenta ng baboy sa labas ng Cebu, bawal

ni Ronalyn Seminiano Reonico | January 30, 2021

Ipinagbawal ng Cebu provincial government ang transportasyon ng mga buhay na baboy mula sa probinsiya patungo sa ibang lugar sa loob nang 6 na buwan dahil sa kakulangan sa suplay. Nilagdaan ni Cebu Governor Gwendolyn Garcia noong Biyernes ang Executive Order No. 8 Series of 2021 upang masiguro ang sapat na suplay ng baboy sa probinsiya sa kabila ng mataas na demand nito sa iba pang lugar sa bansa dahil sa African Swine Fever.

Saad din sa naturang order, “There is an urgent need to strictly regulate the [transport] of live hogs and sows to other areas of the country in order to protect the pig supply in the province of Cebu.”

Samantala, epektibo ang naturang order simula sa February 1 ngayong taon.