125 pang Immigration personnel, gumaling sa COVID-19

Karagdagan pang 125 Immigration personnel ang nagnegatibo sa COVID-19.

Ayon kay BI Commissioner Jaime Morente, nakatalaga ang 125 Immigration personnel sa Ninoy Aquino International Airport (NAIA).

Nagsagawa aniya ng ikalawang batch ng rapid antibody-based testing para sa mga nakatalagang Immigration personnel sa NAIA noong Biyernes, May 15, para maiwasan ang pagkalat ng COVID-19

sa ahensiya.

Una aniyang isinagawa ang pagsusuri sa mga nakatalaga sa NAIA at sa main office ng BI.

Plano na rin aniya nilang magsagawa ng pagsusuri sa iba pang tanggapan ng BI sa buong bansa.

Matatandaang noong Abril, 206 Immigration officers sa NAIA at 150 personnel sa main office ng BI ang negatibo rin sa nakahahawang sakit.

COVID-19 cases 'pag tumaas, total lockdown ulit — DOH

Nagbabala ang Department of Health (DOH) ng muling pagpapatupad ng lockdown kung muling tataas ang mga kaso ng covid-19 sa bansa.

Ang babala ay ginawa ni Health Usec. Ma Rosario Vergeire kasunod ng pagdagsa ng marami nating kababayan sa mga mall nitong weekend matapos magsimula ang implementasyon ng modified enhanced community quarantine kahapon, Mayo 16.

Paalala ni Vergeire sa publiko, kahit nasa MECQ o GCQ na ay nananatili pa ring umiiral ang community quarantine.

Binigyang-diin ng opisyal na bawat isa ay may responsibilidad at obligasyon na sumunod sa panuntunan upang hindi na dumami pa ang kaso ng covid-19 sa bansa.

Ayon kay Vergeire, bago lumabas ng bahay dapat isipin kung kailangan ba talagang magpunta sa mall sa panahong ito.

Nagpalabas na aniya ng guidelines ang Department of Trade and Industry para sa mall owners na dapat sundin upang hindi sila dagsain ng tao.

Umaasa aniya ang DOH na susunod ang mall owners at mga lokal na pamahalaan para maipatupad ang mga health standards upang maiwasan na ang dagsa ng tao sa mga mall.

Paliwanag ni Vergeire, nasa transition period na tayo ngayon upang mapababa pero kung biglang

tataas o magkakaroon ng surge ng mga kaso ng covid-19 sa bansa ay asahan ang posibilidad na magkaroon ng total lockdown.

Quarantine rules kapag 'di nasunod... Mga mall, ipasasara — DILG

Nagbabala ang Department of the Interior and Local Government (DILG) na maipasasara ang mga mall kung mabibigong masunod ang mga health protocol sa ilalim ng modified enhanced community quarantine.

Ayon kay DILG Secretary Eduardo Año, kailangang mahigpit na sumunod ang mga mall sa pagpapatupad ng physical distancing at crowd control sa kanilang mga establisimyento.

Inatasan na ng kalihim ang lahat ng local government units (LGUs) at pulisya na mag-inspeksiyon sa mga mall at ipatiyak sa mga may-ari na dapat ay nasusunod ang minimum health standards ng Department of Health (DOH) at quarantine protocols.

Diin ni Año, kung hindi susunod ay pupuwedeng ipasara ng Philippine National Police ang mall at kasuhan ang mga may-ari nito ng paglabag sa Bayanihan to Heal As one Act.

Sinabi naman ni Joint Task Force Covid Shield Commander Police Lt. Gen. Guillermo Eleazar na naibigay na sa mga police commander ang listahan ng mga mall at iba pang business establishments kung saan may paglabag sa physical distancing.

“These commanders were instructed to warn the management of these malls and make sure that the warning be personally relayed to the mall management and other similar establishments,” ayon kay Eleazar.

Kinalap na rin ng task force ang mga larawan at video sa social media na sinasabing paglabag sa physical distancing rules upang magamit na ebidensiya.

Batay sa regulasyon, isang tao lang ang pupuwede sa dalawang square meters na common area sa mall para matiyak ang tamang distansiya ng mga tao.

Regular ding pinagpapatrulya sa loob ng mall ang mga guwardiya o empleyado upang maipaalala sa mga kustomer ang mga regulasyon ng social distancing at pagsusuot ng face mask. Kapag umabot na sa limitasyon ng maximum na mga taong pinapayagan sa loob ng mall, papipilahin ang mga ito sa labas at paghihintayin na mabawasan ang mga nasa gusali.