Magpapatupad ng price adjustment ang mga kumpanya ng langis sa kanilang produktong petrolyo ngayong araw, Hunyo 2.
Tinatayang 20 sentimos ang bawas sa kada litro ng gasolina.
Habang may dagdag naman na 80 sentimos sa kada litro ng kerosene at 25 sentimos ang dagdag sa kada litro ng diesel.
Ang kumpanyang Shell at Seaoil ay kapwa nag-anunsiyo na ng price adjustment epektibo ngayong alas 6:00 ng umaga.
Ipinapanukala ni Department of the Interior and Local Government (DILG) Secretary Eduardo Año ang paggamit ng mga sidecar sa motor ngayong hindi pa rin pinapayagan ang pag-angkas sa motorsiklo.
Aniya, lagyan na lang ng sidecar ang motor o bisikleta para masunod pa rin ang physical distancing.
"Lagyan na lang ng sidecar ang motor puwede na niya isama ang kanyang misis, ganu’n na lang po solution habang andiyan pa ang virus," ani Año.
Maaari naman umanong maglagay ng ruta kung saan puwedeng bumiyahe ang mga nakamotor o bisikleta na may sidecar.
Samantala, inaayos na umano ng gobyerno ang transportasyon sa ilalim ng “new normal”.
Hinimok ang publiko na i-report ang anumang anomalya o korupsiyon partikular sa pagbili at pagbebenta ng mga medical supplies at equipment sa gitna ng COVID-19 pandemic.
Sa pagdinig sa Senado, hinikayat ni Sen. Bong Go ang taumbayan na ipaalam sa mga awtoridad ang anumang matutuklasang korupsiyon sa kanilang mga lugar.
Hindi umano papayagan ng administrasyong Duterte ang anumang iregularidad lalo na sa pagbili at pagbebenta ng mga medical equipment at supplies.
“Kung makikita nating may korupsiyon na nangyari, dapat papanagutin natin ang mga ahensiya at lalong-lalo na ang mga opisyal nito. Wala tayong palalampasin at wala tayong pipiliin. Pera ng bayan po ito. Gamitin natin sa tama at wasto lalo na’t nakakatakot ang kinakaharap natin,” dagdag ng senador.
Nanawagan din sa mga pribadong kumpanya partikular sa mga business group na tulungan ang pamahalaan na masawata ang korupsiyon lalo na ngayong panahon ng COVID-19.
