Dine-in sa mga resto, fast food puwede na sa MGCQ

Pinayagan na ng Inter-Agency Task Force on Emerging Infectious Diseases ang dine-in services sa mga fast food outlets sa mga lugar na nakasailalim sa modified general community quarantine pero hindi pa rin ito full capacity.

"Pinayagan na po ang dine-in operations pero hindi po nangangahulugang piyesta at inuman na. At sa ngayon po ang dine-in ay para lamang sa MGCQ," sabi ni Presidential Spokesman Harry Roque.

"Sa mga lugar na dineklara na nasa ilalim ng modified general community quarantine, dine-in restaurants ay pinapayagang mag-operate nang 50% capacity simula June 1, 2020. Pero sa lugar na nasa ilalim ng GCQ, pakihintay po ang announcement para sa mga date ng reopening. So nag-hihintay pa po tayo kung kailan puwedeng magkaroon ng dine-in sa GCQ areas," wika pa ni Roque.

Aniya, kailangan pa rin sumunod sa minimum public health standards protocol at nagbantang ipasasara ang outlet na hindi susunod sa itinakda ng Department of Trade and Industry at Department of Tourism na siyang maglalagay ng post audit mechanism.

Inilahad din ni Roque ang health protocols na itinakda ng DTI para sa pagbubukas ng dine-in services tulad ng pagbabawal sa buffet, at regular sanitation sa mga high contact areas.

Matatandaang ang mga lugar na nakasailalim sa MGCQ simula June 1 hanggang June 15 ay ang Cordillera Administrative Region, Regions I (maliban sa Pangasinan), IV-B, V, VI, VIII, IX (pwera sa Zamboanga City), X, XI (maliban sa Davao City) at XII, CARAGA, at ang Bangsamoro Autonomous Region in Muslim Mindanao.

Habang ang Metro Manila naman at nalalabing bahagi ng bansa ay nakasailalim na sa GCQ.

Palugit sa pagbabayad ng upa, in-extend pa

Magsisimula na sa araw na binawi ang enhanced community quarantine (ECQ) o sa araw nang magbukas ng negosyo o magbalik sa trabaho ng empleyado ang 30-araw na palugit o grace period sa pagbabayad nito ng upa.

Ipinalabas ng Department of Trade and Industry (DTI) ang bagong memorandum circular 20-29 kahapon na nag-aamiyenda sa naunang abiso nito patungkol sa grace period sa mga nangungupahan sa residential o commercial unit.

Sa lumang memorandum circular, magsisimula ang 30-day grace period sa huling due date ng pagbabayad ng renta na pasok sa panahon ng pagdedeklara ng ECQ.

Pero ayon kay DTI Undersecretary Ruth Castelo, binago na ito at pinasisimulan ang palugit sa petsa na naalis ang community quarantine.

Hindi rin umano dapat patawan ng interest o tubo, multa o iba ang charges ang hindi nabayarang upa noong panahon ng ECQ.

May opsyon din aniya ang tenant na magbayad ng anim na buwang installment matapos ang 30-day grace period.

Kinakailangan lamang na lumagda ito ng promisory note na nagpapahayag na handang magbayad ng installment sa upa sa loob ng anim na buwan.

Dagdag-bawas sa presyo ng gas

Magpapatupad ng price adjustment ang mga kumpanya ng langis sa kanilang produktong petrolyo ngayong araw, Hunyo 2.

Tinatayang 20 sentimos ang bawas sa kada litro ng gasolina.

Habang may dagdag naman na 80 sentimos sa kada litro ng kerosene at 25 sentimos ang dagdag sa kada litro ng diesel.

Ang kumpanyang Shell at Seaoil ay kapwa nag-anunsiyo na ng price adjustment epektibo ngayong alas 6:00 ng umaga.