China Telecom bilang 3rd telco, pinalagan

Pinalusot ang House Bill No. 78 para makakawala ang telcos mula sa 60 percent Filipino ownership requirement ng Konstitusyon, ayon kay dating Supreme Court Justice Antonio Carpio.

Ang HB No. 78 ay inaprubahan ng Mababang Kapulungan ng Kongreso noong Marso 10, 2020. “That House bill, if approved by the Senate, will amend the Public Service Act to exclude telcos as public utilities which, under the Constitution, must at least be 60 percent Filipino-owned,” ayon sa retired SC magistrate.

Aniya, ang pagsususog ay magpapahintulot sa foreign investors na magmay-ari ng 100 percent ng telco companies, na nagpapahiwatig na ang China Telecom ay maaaring maging 100 percent owner ng third telco na inudyukan umano ni Pangulong Rodrigo Duterte noong November 21, 2017.

Sa kasalukuyan, ang third telco sa bansa ay iginawad sa Dito Telecommunity, isang partnership ng Davao-based Udenna consortium at ng China’s state-owned telecom.

Subalit sinabi ng dating SC justice na “Apparently China Telecom wants to come in as a majority, or even 100 percent owner, of the third telco.”

Lugi sa COVID-19 Ilang branch ng Victoria Court, isasara na

Kinumpirma ng hotelier at car racer na si Angelina Mead King ang pagsasara ng ilang mga branch ng Victoria Court na kanyang pag-aari.

Si Angie ang nagmamay-ari sa southern branches ng Victoria Court habang ang kapatid niyang si Atticus King naman ang sa northern branches.

Sa kanyang video, binanggit ni Angie ang pagkalugi na ng negosyo dahil sa COVID-19 pandemic.

Kaugnay nito, sa kanyang mensahe para sa mga empleyado ng hotel, sinabi ni Angie na naging mahirap para sa kanya ang pagdedesisyon.

Ihahanda na rin aniya ang retirement at retrenchment packages para sa mga empleyado na makatutulong sa kanila sa susunod na mga buwan.

Pagmamay-ari ng isang dual citizen ng mass media, naungkat sa hearing ng ABS-CBN franchise

Naungkat ang isyu ng legalidad ng pagmamay-ari ng isang dual citizen ng mass media sa Pilipinas sa pagpapatuloy ng pagdinig ng joint committee on Legislative Franchises at Good Government sa inihihirit na prangkisa ng ABS-CBN.

Sa pagdinig kahapon ay kinumpirma ni Atty. Ayo Bautista, ang legal counsel ni Eugenio Lopez III, ang dual citizenship ni ABS-CBN Chairman Emeritus Eugenio Lopez III na isang Pilipino at isa ring Amerikano.

Tinanong ni Ako Bicol Partylist Rep. Alfredo Garbin, Jr., kung pupuwedeng magmay-ari ng mass media ang hindi purong Pilipino o dual citizen tulad ni Lopez na sinagot naman ni Atty. Bautista na hindi malinaw na isinaad sa Konstitusyon na bawal ang dual citizen sa pagmamay-ari.

“Kasi nakalagay sa Constitution, dapat Pilipino ka. Wala namang nakalagay doon na dapat Pilipino ka lang,” ayon kay Atty. Bautista.

Iginigiit din ni Sagip Partylist Rep. Rodante Marcoleta na dapat ay Pilipino ang humawak ng mass media ownership ngunit sinagot ito nina Lopez at Bautista na nananatiling Pilipino ang chairman emeritus ng ABS-CBN.

Wala rin umano sa record ng Department of Justice na nag-renounce o itinakwil ni Lopez ang pagka-Pilipino bagamat ipinanganak sa Amerika.

“Wala pong ebidensiya pang napipresenta para ipakita na naging naturalized American siya, na ni-renounce niya ang kanyang Filipino citizenship. So ang kanyang Filipino citizenship ay nananatili,” pahayag ni Justice Undersecretary Emmeline Aglipay-Villar.

Isa sa mga argumento o isyu laban sa pagbibigay ng prangkisa sa ABS-CBN ay ang citizenship ni Lopez nang pangasiwaan nito ang broadcast network noong 1996.

“All my life I have considered myself a Filipino citizen. I grew up in the Philippines. We are 7 generations of Lopezes living in the Philippines,” ani Lopez.

Ipagpapatuloy ang hearing ng joint committee sa Lunes, Hunyo 8.