Bebot na naka-2-pc sumasayaw.. 'Live show' sa NBI conference, buking

ni Mai Ancheta | July 7, 2023

Paiimbestigahan ng Department of Justice (DOJ) ang viral video kung saan may babaeng nagsasayaw ng "sexy dance" bilang intermission number sa command conference ng National Bureau of Investigation (NBI) sa isang hotel.

Ayon kay Justice Secretary Crispin Remulla, hindi magandang tingnan sa mata ng publiko ang mga ganitong aksyon kaya dapat lamang na maimbestigahan ito.

“Definitely, we do not like this to happen, no. We will investigate it also,” ani Remulla.

Walang puwang aniya sa bansa ang mga ganitong asal at aksyon kaya walang sasantuhin kung sino man ang may pakana nito.

"These are the forms of misbehavior that we don’t need in the country,” dagdag ni Remulla.

Batay sa viral video, makikita ang isang babae na nakasuot umano ng panty at crop top habang sinasayawan ang mga naroon sa event.

Sa ngayon, wala pang pahayag ang NBI hinggil sa naturang isyu.

Pagbabayad ng buwis, extended

ni Mylene Alfonso | March 28, 2023

Inanunsyo ng Bureau of Internal Revenue (BIR) na pinayagan nito ang paghahain at pagbabayad ng annual income tax return (AITR) noong 2022 kahit saang lugar nang walang penalty para mapalawig ang kanilang serbisyo.

Ito ay kasunod ng inilabas na Revenue Memorandum Circular (RMC) No. 32-2-2023 na nagpapahintulot sa taxpayers na mabayaran ang kanilang dues saan mang lugar sa mismo o bago ang Abril 17, 2023 nang walang ipinapataw na penalty para sa maling venue filing.

Ipinaliwanag ni BIR Commissioner Romeo D. Lumagui, Jr. na layunin nito na mabigyan ang bawat taxpayer ng panahon na makapaghain at mabayaran ang tamang buwis sa kanilang most convenient time at lugar nang walang ipinapataw na penalties.

Ayon sa BIR, kailangang gamitin ng taxpayers ang Electronic Filing and Payment System (eFPS) sakaling maghain ng kanilang annual tax returns electronically at magbayad ng kanilang taxes due sa pamamagitan ng Electronic Filing and Payment System-Authorized Agent Banks (AABs) kung saan sila naka-enroll.

Subalit maaari namang gamitin ng mga taxpayer ang eBIRForms sa paghahain ng kanilang annual ITR.

Para sa taong 2023, target ng BIR na makakolekta ang ahensiya ng P2.6 trilyong buwis

De Leon sa NICA at Guillermo sa BIR, kabilang sa Marcos’ Cabinet

ni Lolet Abania | June 18, 2022

May napili na si President-elect Ferdinand “Bongbong” Marcos Jr. na mamumuno sa National Intelligence Coordinating Agency (NICA) at sa Bureau of Internal Revenue (BIR) sa ilalim ng kanyang administrasyon.

Ayon kay incoming Press Secretary Rose Beatrix Cruz-Angeles, in-appoint ni P-BBM si Lilia Guillermo bilang susunod na head ng BIR, kung saan siya rin ay naging dating deputy commissioner ng ahensiya.

Si Guillermo ay kasalukuyang assistant governor ng Bangko Sentral ng Pilipinas (BSP), at head ng technology and digital innovation unit habang nangangasiwa rin sa IT modernization plan ng central bank.

“Guillermo is cited for successfully implementing the Philippines Tax Computerization Project, which established a modern tax collection system for the BIR and the Bureau of Customs,” saad ni Angeles. Napili rin ni Marcos ang tax lawyer na si Romeo “Jun” Lumagui Jr. bilang incoming deputy commissioner ng ahensiya. Dati nang pinamunuan ni Lumagui ang regional investigation division ng Revenue Region No. 7B East NCR.

Samantala, napiling italaga ni P-BBM si retired Philippine National Police (PNP) Deputy Director General Ricardo de Leon bilang incoming NICA director-general upang pamunuan ang intelligence gathering ng bansa.

Nagsisilbi rin ang NICA bilang secretariat sa Anti-Terrorism Council ng bansa at one cluster ng anti-insurgency task force.

Si De Leon ay kasalukuyang pangulo ng Philippine Public Safety College, na siyang humahawak ng training ng mga police officer cadets, police rookies, fire at jail personnel.

Miyembro rin si De Leon ng Philippine Military Academy (PMA) Matatag Class of 1971. Noong 2004, sa ilalim ni dating Pangulo Gloria Macapagal-Arroyo, siya ay na-designate na commander ng Anti-Illegal Drugs Special Operations Task Force.