P800K ari-arian natupok...National Archives sa Manila, nasunog

ni Lolet Abania | September 5, 2021

Sumiklab ang sunog sa tanggapan ng National Archives sa UN Avenue, Manila ngayong Linggo nang madaling-araw.

Ayon sa Bureau of Fire Protection-National Capital Region (BFP-NCR), nagsimula ang sunog bandang ala-1:04 ng madaling-araw sa chief administrative office na matatagpuan sa ika-6 na palapag ng PPL Building.

Itinaas sa ikalawang alarma ang sunog bago tuluyang naapula ang apoy ng alas-3:13 ng madaling-araw.

Gayunman, wala namang naitalang nasaktan o nasugatan matapos ang sunog.

Sinabi pa ng BFP-Manila, wala nang iba pang opisina sa naturang gusali ang nadamay habang wala ring mahahalagang dokumento ang nasira dahil sa sunog.

Umabot sa tinatayang P800,000 na ari-arian ang napinsala matapos ang sunog.

Mega Tower sa Mandaluyong nasunog, mga empleyado na-trap

ni Lolet Abania | September 2, 2021

Hindi pa mabatid ang bilang ng mga taong nai-report na na-trap sa loob ng isang ginagawang building nang sumiklab ang sunog sa Mandaluyong ngayong Huwebes nang umaga.

“Actually, meron na tayong rescuer sa itaas na nagbabasag ng salamin. ‘Yung ating sunog, kontrolado na siya, makikita natin, visible, ‘yung usok ay kulay puti na. Since may na-trap, hindi pa natin alam kung empleyado ‘yan, ina-assist ng ating special rescue force na maibaba,” sabi ni Fire Superintendent Alberto de Baguio, Mandaluyong City Fire Marshall, sa isang interview kanina.

Ayon sa Bureau of Fire Protection (BFP), nagsimula ang sunog sa 27th floor ng Mega Tower sa Barangay Highway Hills, Mandaluyong City bandang alas-10:26 ng umaga na umabot sa unang alarma.

Isang reporter mula sa Super Radyo dzBB ang nagsabing kitang-kita nilang may mga kumakaway pang mga tao mula sa gusali.

Ayon kay De Baguio, malaking problema para sa mga bumbero nang oras na iyon kung paano sila agad makakaakyat sa gusali.

“May self-contained breathing apparatus ‘yung team para maalalayan ‘yung mga biktima o ‘yung mga na-trap pero hindi pa ma-identify (kung ilan ang na-trap) kasi una sa lahat, ang problema natin, wala pang means of travel paakyat ng 27th floor,” paliwanag ni De Baguio.

Sa report nitong tanghali, idineklarang under control ang sunog bandang alas-1:52 ng hapon, habang tinatayang nasa 15 construction workers ang nailigtas mula sa nasunog na gusali.

Lima sa mga biktima na nagtamo ng minor injuries ang ginagamot na. Patuloy din ang mga bumbero na inililikas ang iba pang empleyado mula sa nasunog na gusali.

Storage area ng FDA sa Muntinlupa, nasunog

ni Ronalyn Seminiano Reonico | August 24, 2021

Nasunog ang bahagi ng storage area ng Food and Drug Administration (FDA) sa Muntinlupa City noong Lunes nang gabi.

Ayon sa Bureau of Fire Protection-Muntinlupa, itinaas ang unang alarma bandang alas-7:35 at idineklarang under control na bandang alas-7:55 nang gabi. Alas-8 naman nang ideklarang fire out na.

Wala naman umanong nasugatan o nasaktan sa insidente ngunit patuloy pa ring iniimbestigahan ng BFP Muntinlupa ang pinagmulan ng sunog.