1 patay, 2 pa nasugatan sa sunog sa Manila

ni Lolet Abania | April 3, 2022

Isa ang patay at dalawa ang nasugatan matapos na sumiklab ang sunog sa isang residential area sa Sta. Cruz, Manila, ngayong Linggo ng umaga.

Ayon sa Bureau of Fire Protection (BFP), nagsimula ang sunog bandang-alas-7:00 ng umaga sa dalawang palapag na lumang apartment habang nadamay ang ilang bahay na nasa kanto ng Leonor Rivera at Antipolo Streets.

Sa ulat, may makakapal na itim na usok pang makikita sa itaas ng nasusunog na mga kabahayan.

Pasado alas-7:00 ng umaga, itinaas ng BFP ang sunog sa ikalawang alarma.

Habang idineklarang under control ang sunog pasado alas-9:22 ng umaga.

Gayunman, hindi pa binanggit ng mga awtoridad ang pagkakakilanlan ng nasawing biktima.

Nasa tinatayang 80 pamilya ang apektado dahil sa sunog. Pansamantala namang nananatili ang mga residenteng naapektuhan sa barangay center, habang ang iba ay nagtungo sa kanilang mga kaanak.

Iniimbestigahan na rin ng mga awtoridad ang sunog na posible anilang anggulo ito ng arson, habang ang isang suspek ay nasa kostudiya na ng pulisya at mga barangay officials.

Patuloy pang inaalam ng mga awtoridad ang halaga ng napinsala sa mga ari-arian matapos ang sunog.

4 natusta, 5 nasugatan sa sunog sa Manila

ni Lolet Abania | February 20, 2022

Nasa apat ang nasawi habang lima ang nasugatan matapos na sumiklab ang sunog sa isang residential area sa Sta. Cruz, Manila ngayong Linggo ng umaga.

Batay sa ulat, napag-alaman na dalawa sa mga biktima ay isang 15-anyos, at isang 21-anyos na babae na nai-report na buntis.

Ayon sa Bureau of Fire Protection (BFP), unang ini-report ang sunog ng alas-9:45 ng umaga sa isang bahay sa M. Natividad Street corner Mayhaligue Street sa Barangay 316, Maynila.

Itinaas naman ng BFP sa ikalawang alarma ang sunog ng alas-9:48 ng umaga, habang mabilis na kumalat ang apoy sa mga kalapit na bahay, kung saan gawa ang mga ito sa light materials.

Alas-10:26 ng umaga, naapula na ang apoy, ayon sa BFP.

Patuloy naman ang imbestigasyon ng BFP sa dahilan at pinagmulan ng sunog.

16-anyos na PWD, na-trap sa sunog, patay

ni Lolet Abania | February 12, 2022

Patay ang 16-anyos na PWD (person with disability) matapos na ma-trap sa nasusunog na vulcanizing shop sa Valenzuela City bago magmadaling-araw ngayong Sabado.

Ayon sa Bureau of Fire Protection (BFP), hindi na nakalabas ang PWD na naiwan sa kanyang kuwarto na nasa itaas ng vulcanizing shop sa Barangay Ugong, Valenzuela.

Batay sa nai-post sa Twitter ng Valenzuela City Command, Control and Communication Center, alas-2:50 ng madaling-araw itaas sa unang alarma ang sunog sa nasabing vulcanizing shop.

Nadamay naman sa sunog ang junk shop na katabi lamang ng vulcanizing shop.

Gayunman, alas-3:33 ng madaling-araw idineklara ng BFP na fire under control habang anila, tuluyang naapula ang apoy ng alas-4:19 ng madaling-araw.

Patuloy na iniimbestigahan ng mga awtoridad ang naging sanhi at halaga ng pinsalang idinulot matapos ang sunog.