Akala may droga.. Laruang dala ng OFW winasak, Customs na-wow mali

ni Madel Moratillo | April 5, 2023

Matapos mapaghinalaang may lamang ilegal na droga, sinira ng mga tauhan ng Bureau of Customs sa Ninoy Aquino International Airport ang isang laruang eroplano.

Sa isang post sa social media, ikinuwento ito ng OFW na si Rachell Anne Ramos, galing sa Hong Kong, at may connecting flight pauwi sa Laoag, Ilocos Norte.

Habang naghihintay umano siya ng biyahe, may lumapit sa kanyang empleyado dahil may nakita umano sa kanyang bagahe.

Dalawang beses umanong dumaan sa x-ray machine ang kanyang bagahe at ipinaamoy din sa K-9 dog.

Kaya para matapos na umano ang hinala sa laruan ay ipinasira na niya ito para magkaalaman.

Pero matapos ito, wala namang nakita na kontrabando sa loob.

Humingi naman ng paumanhin ang BOC sa nasabing OFW dahil sa pangyayari.

Kasabay nito, iginiit naman ni BOC spokesperson at Assistant Commissioner Vincent Maronilla na bago lang ang kanilang scanning machine.

Pinag-aaralan na rin aniya nila kung posibleng mabigyan ng kompensasyon si Ramos para sa nasirang laruan.

Cocaine sa sabon, buking sa NAIA

ni Jenny Rose Albason (OJT) | March 23, 2023

Nasabat ang tatlong kilo ng hinihinalang cocaine sa Ninoy Aquino International Airport (NAIA) nitong Martes.

Ayon sa Bureau of Customs, galing Dubai ang isang Turkish national at papuntang Brazil, nang makitaan sa bagahe ng cocaine na nakasilid sa sabon.

Natagpuan din ang liquid cocaine na tinatayang nasa 1,500 ml.

Aabot sa P28 milyon ang kabuuang halaga ng mga nasabat na ilegal na droga.

Mahaharap ang Turkish sa kasong paglabag sa Comprehensive Dangerous Drugs Act at Customs Modernization And Tariff Act.

Iniimbestigahan na rin ng mga awtoridad kung may grupo bang sangkot dito at kung saan ibabagsak ang mga nakumpiskang cocaine.

P120M frozen products, nasabat

ni BRT | March 20, 2023

Aabot sa P120 milyong halaga ng umano’y smuggled na poultry at seafood products ang nasabat ng Bureau of Customs sa Navotas nitong Biyernes.

Sa isang pahayag, sinabi ng BOC na nakuha ang umano’y smuggled products matapos ang raid sa 7 cold storage facilities.

Galing umano sa China ang karamihan sa mga frozen seafood. Habang sa Brazil at Australia naman ang umano’y smuggled na beef at galing naman umano sa United States at Russia ang pork products.

Kabilang sa mga nasabat na produkto ay frozen pork legs, chicken drumsticks, pork spareribs, squid rings, crayfish, pork ears, pork hinges, balone, brawley beef, pork aorta, chicken feet, pork riblets, golden pampano, pangasius fillet, boneless pork ham, fish tofu, at pork ears.

Ipatatawag ang mga may-ari ng mga frozen goods at kailangang magpresenta ng importation documents o patunay na hindi smuggled ang mga produkto.