Bulkang Bulusan, muling nag-alburoto — PHIVOLCS

ni Lolet Abania | June 12, 2022

Muling sumabog ang Bulkang Bulusan sa Sorsogon madaling-araw ngayong Linggo, ayon sa Philippine Institute of Volcanology and Seismology (PHIVOLCS). Batay sa PHIVOLCS, naganap ang phreatic eruption ng bulkan ng alas-3:37 ng madaling-araw at tumagal ito ng 18 minuto.

Sa isang radio interview kay PHIVOLCS Director at Science Undersecretary Renato Solidum Jr., sinabi nitong na-monitor nila ang pagtaas uli ng plume na nagmumula sa crater. “Alert Level 1 ay maintained,” saad ni Solidum.

Ayon sa PHIVOLCS, “a phreatic eruption refers to a steam-driven explosion that occurs when water beneath the ground or on the surface is directly heated by hot rocks or new volcanic deposits (e.g. pyroclastic density currents, lava) or indirectly by magma or magmatic gas.”

Sa kanilang volcano bulletin, binanggit ng PHIVOLCS na umabot na sa 136 volcanic earthquakes ang report na naganap sa Bulusan Volcano sa nakalipas na 24 oras.

Naglabas din ang bulkan ng 613 tonnes o tonelada ng sulfur dioxide noong Hunyo 10. Habang nasa 150-metrong taas ng plume ang ibinuga ng Bulkang Bulusan na kumikilos sa bahaging kanluran-hilagang kanluran at hilagang-kanluran.

Sinabi rin ni Solidum, nai-report na ang ashfall sa ilang bahagi ng munisipalidad ng Juban. Ayon naman kay Juban, Sorsogon Municipal Disaster Risk Reduction Management Office (MDRRMO) Public Information Officer Arian Aguallo, ang buong munisipalidad ng Juban ay apektado na ng ashfall.

“Medyo scattered po ngayon ang bagsak ng ashfall, hindi lang concentrated sa isang barangay. As of now, buong munisipyo po may traces of ashfall. Pero may mga selected barangays na heavily affected,” sabi ni Aguallo.

Tiniyak naman ni Aguallo na walang adverse events na nai-report sa ngayon, habang ang mga residente ay hindi pa inabisuhan ng lokal na gobyerno na lumikas sa kanilang tirahan.

Gayunman, pasado alas-9:00 ng umaga, ayon sa National Disaster Risk Reduction and Management Council (NDRRMC), sinimulan na ang evacuation ng mga residente sa ilang mga barangay sa Juban.

“Ongoing din po ang evacuation sa oras na ito. May natanggap po kaming report na 103 families/438 pax ang bilang na nag-evacuate mula sa Juban,” pahayag ng NDRRMC sa mga reporters.

“Ongoing po ang aming coordination with the regional counterpart. As of this moment ay we received a report na may ashfall incident sa Casiguran, Juban, Irosin,” dagdag ng NDRRMC.

Una nang sinabi ni Sorsogon Governor at incoming Senator Francis “Chiz” Escudero na siyam na barangay sa munisipalidad ng Juban, Casiguran, at Magallanes ay nakararanas na ng ashfall.

Dahil sa ashfall ng Bulusan Volcano.. Patubig sa Sorsogon, kontaminado na — NDRRMC

ni Lolet Abania | June 7, 2022

Kontaminado na ang pinagmumulan ng tubig sa Juban, Sorsogon sanhi ng ashfall na mula sa Bulusan Volcano, ayon sa National Disaster Risk Reduction and Management Council (NDRRMC) ngayong Martes.

“Nagkaroon ng problema sa patubig ‘yung community na spring water ang pinagkukunan dahil exposed ito at nalagyan ng abo,” saad ni NDRRMC spokesperson Mark Timbal sa Laging Handa public briefing.

Ayon kay Timbal, nag-deploy na ang local government unit (LGU) ng mga water tankers upang magbigay ng suplay ng tubig sa mga apektadong komunidad. Ang pribadong sektor ay nagpamahagi na rin ng mga bottled water. Gayundin, ang Philippine Red Cross (PRC) ay nagkaloob ng katulad na mga supplies sa mga komunidad ng lugar.

Nang tanungin kung may posibilidad na ideklara ang state of calamity, binanggit ni Timbal ang tugon ni Sorsogon Governor Francis ‘Chiz’ Escudero na ang sitwasyon sa lugar aniya, “still manageable at the level of local government units.”

Ani pa nito, walang tirahan ang napinsala habang ang mga government services, gayundin ang mga public utilities gaya ng tubig, power, at telecommunications ay hindi naputol o nag-interrupt.

Ayon din kay Timbal, nasa kabuuang 216 katao ang inilikas na dahil sa ashfall. Nitong Linggo, naiulat ang pagsabog o phreatic eruption ng Bulusan Volcano na tumagal ng 17 minuto na nagtulak sa lokal na gobyerno para agad na ilikas ang mga apektadong residente.

Ang mga munisipalidad ng Juban, Casiguran, at Irosin sa Sorsogon ay nakaranas naman ng ashfall. Itinaas din ng Philippine Institute of Volcanology and Seismology (Phivolcs) nitong Linggo sa Alert Level 1 ang alert status sa Bulusan Volcano mula sa dating zero.

Batay sa ulat ng Phivolcs ngayong Martes, nasa kabuuang pitong volcanic earthquakes ang kanilang na-monitor sa Bulusan Volcano sa Sorsogon sa nakalipas na 24 oras.

29 volcanic quake sa nakalipas na 24-oras, naitala sa Bulusan Volcano — PHIVOLCS

ni Lolet Abania | June 6, 2022

Umabot sa kabuuang 29 volcanic earthquakes ang na-monitor sa Bulusan Volcano sa Sorsogon sa nakalipas na 24 oras, ayon sa Philippine Institute of Volcanology and Seismology (PHIVOLCS) ngayong Lunes.

Sa kanilang 5AM volcano bulletin, sinabi pa ng PHIVOLCS na ang phreatic eruption ay nai-record ng alas-10:37 ng umaga nitong Linggo na tumagal ng 17 minuto.

Ayon sa PHIVOLCS, ang plume mula sa crater ng Bulusan Volcano ay umabot ng hanggang 150 metrong taas saka pumailanglang patungong hilagang kanluran. Ani pa ng PHIVOLCS,

“The volcano edifice was also inflated.” Nananatili ring nakataas sa Alert Level 1 ang buong Bulusan Volcano. Ipinagbawal naman ng PHIVOLCS sa publiko, ang pumasok sa 4-kilometer-radius sa Permanent Danger Zone (PDZ) gayundin, hindi maaaring pumasok ng walang pag-iingat sa Extended Danger Zone (EDZ).

Ayon kay PHIVOLCS Director at Science Undersecretary Renato Solidum Jr., na ang danger zone sa Bulusan ay kanilang in-extend ng hanggang dalawa pang kilometro.

“Nagdagdag tayo ng dalawang kilometro sa southeast sector EDZ kasi doon sa side na ‘yun may mga bitak din ng mga nakaraang eruption na nagkaroon din ng pagsabog doon,” ani Solidum sa isang interview ngayong Lunes. Sinabi pa ni Solidum na may nai-record namang “steaming” mula sa northwest vent ng bulkan kung saan maaaring magkaroon din ng pagsabog.

Ang mga munisipalidad ng Juban, Casiguran, at Irosin ay apektado ng ashfall dahil sa Bulusan Volcano, ayon pa kay Solidum.

Nagbabala naman ang opisyal sa mga residenteng naninirahan malapit sa mga ilog sa posibleng pagkakaroon ng lahar, sakaling bumuhos ang malakas na ulan.

“’Yung mga bahay po na nasa gilid ng mga ilog, kapag maulan po ay puwedeng maanod ang mga abo na nadeposito sa gilid ng bulkan at magkaroon ng lahar kaya kailangan pag-ingatan din lalong-lalo na kung malakas ang ulan,” paliwanag ni Solidum.