Halos 4k lumikas sa pagsabog ng Bulkang Kanlaon

ni Angela Fernando @News | Dec. 10, 2024

Photo: Bulkang Kanlaon - Phivolcs

Ikinagulat ng mga residente ng Negros Island ang biglaang pagsabog ng Bulkang Kanlaon dahil sa malalakas na pagyanig at pagbagsak ng abo.

Simula sa pagsabog noong Lunes, humigit-kumulang 3,940 pamilya ang inilikas mula sa Negros Occidental at Negros Oriental, ayon sa mga opisyal ngayong Martes.

Sa Negros Oriental, sinabi ni Edgar Posadas, tagapagsalita ng Office of Civil Defense (OCD), na sapilitang inilikas ang humigit-kumulang 1,800 pamilya mula sa limang barangay na nasa loob ng anim na kilometrong danger zone ng bulkan.

Samantala, iniulat ni Irene Bel Poteña, pinuno ng provincial disaster risk reduction and management offices (PDRRMO) ng Negros Occidental, na 2,140 pamilya ang inilikas sa lalawigan, kabilang ang 1,132 mula sa La Castellana, ang pinakamalubhang naapektuhan.

Kasama rin sa mga apektadong lugar ang La Carlota City (673 pamilya), Pontevedra (200 pamilya), Bago City (131 pamilya), at Moises Padilla (4 na pamilya).

Bulkang Taal, tumaas ang seismic activity

ni Eli San Miguel - Trainee @News | November 23, 2023

Nakapagtala ng mas mataas na seismic activity ang Bulkang Taal, ayon sa Philippine Institute of Volcanology and Seismology (Phivolcs) ngayong Huwebes.

Ngayong Nobyembre 23, naitala ng aktibong bulkan sa Batangas ang 66 na volcanic tremors na may tagal mula isa hanggang limang minuto, isang pagtaas mula sa 48 na naitala noong Nobyembre 22.

Ayon din sa Phivolcs, umabot ang paglabas ng sulfur dioxide sa average na 4,991 tonelada bawat araw hanggang Nob. 20.

Napansin rito ang "moderate" emission of plume na may taas na 1,000 metro bago ito lumutang pa-southwest.

Kasalukuyan pa ring nasa Alert Level 1 ang Bulkang Taal na nangangahulugang nasa low-level unrest ang kalagayan nito.

Binabalaan ang publiko sa mga posibleng panganib na maaaring maganap, kabilang ang explosions, volcanic earthquakes, minor ashfall, at lethal accumulations o expulsions of volcanic gas.

Ipinagbabawal din ang pagpasok sa Taal Volcano Island na isang permanenteng danger zone, lalo na sa Main Crater at Daang Kastila fissures, pati na rin ang pagtambay at pamamangka sa Taal Lake.

Bulkang Kanlaon, tumaas ang seismicity

ni Eli San Miguel - Trainee @News | November 22, 2023

Nakapagtala ng mas mataas na seismic activity ang Bulkang Kanlaon na may 15 volcano-tectonic earthquakes mula 3:58 a.m. hanggang 5 a.m., ayon sa Philippine Institute of Volcanology and Seismology (Phivolcs) ngayong Miyerkules.

"These earthquakes ranged in energy from magnitude 1.4 to 4.2 and occurred at depths of zero to 2 kilometers beneath the northern flank of the Kanlaon range," sabi ng Phivolcs sa isang advisory sa ganap na alas-8 ng umaga.

Napansin din ang pagtaas ng volcanic sulfur dioxide (SO2) emission mula 570 tonelada kada araw noong Mayo 1 hanggang 1,017 tonelada kada araw noong Nobyembre 14.

Pinayuhan ng Phivolcs ang publiko at mga lokal na pamahalaan na mag-ingat at iwasang dumaan sa permanent danger zone na may layong apat na kilometro dahil sa mas mataas na posibilidad ng bigla at delikadong phreatic eruptions na maaaring maganap "nang walang abiso" sa Bulkang Kanlaon, na nananatiling nasa Alert Level 1.

"Should the above uptrend in monitoring parameters persist, the volcano status may be raised to Alert Level 2 to warn of increasing unrest," saad ng Phivolcs.