Bivalent vaccines, kayang magbigay ng malawak na proteksyon laban sa COVID

ni Fely Ng - @Bulgarific | November 12, 2022

Hello, Bulgarians! Ang mga pribadong ospital ay maaaring italaga ng gobyerno upang bumili at mangasiwa ng mga bivalent vaccines laban sa COVID-19. Ito ay iminungkahi ni Go Negosyo founder Joey Concepcion. Natatayang limitado lamang ang mga bivalent vaccines na maipamimigay ng gobyerno kung isasaalang-alang nito kung magkano ang mabibili at ilan ang maihahatid na bakuna. Ang bivalent vaccine ay kayang magbigay ng malawak na proteksyon laban sa COVID-19 at mas mahusay na proteksyon laban sa omicron variant.

“Ang 10 milyong dosis, o gaano man kalaki ang bilhin ng gobyerno ay unang ilalaan sa matatanda, immunocompromised at may comorbidities; ngunit maaaring may iba pa sa labas ng mga prayoridad na sektor na ito na nais ding mabakunahan ng bivalent vaccines," sabi ni Concepcion. Aniya, lahat ng pribadong ospital ay may kayang mag-handle ng mga bakuna at lahat ay maaaring makipagkasundo sa gobyerno upang makabili ng bivalent vaccines.

Si Dr. Benjamin Co, Chief Medical Officer ng Metro Pacific Hospital Holdings ay sumang-ayon sa panukala ni Concepcion. “I think the best option is to make it available for a fee or at cost. For those who can very well afford it, they can get it from private clinics that offer this and we can charge an administration fee plus the cost of the vaccine," sabi niya.

Ayon kay Vaccine Experts Panel member Dr. Rontgene Solante, na siya ring tagapangulo ng Adult Infectious Diseases at Tropical Medicine sa San Lazaro Hospital, maiibsan ng pagtulong ng mga pribadong ospital ang pasanin sa gobyerno upang mas matutukan nito ang mga sektor na mas nangangailangan. "Private sector involvement is another important layer to achieve higher vaccine accessibility and coverage," sabi ni Dr. Solante.

"This is critical especially with waning interest in booster doses of COVID-19 vaccines. Government should always find ways to engage with the private sector, which has been an important partner of DOH during the pandemic.”

"Kung wala pang CPR, ang pagbabakuna ng bivalent vaccines ay maaari pa ring gawin sa pamamagitan ng tripartite agreement, tulad ng ginawa namin noon, ngunit sa pagkakataong ito ay mga pribadong ospital ang kasali," sabi ni Concepcion.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

COVID-19 testing sa balikbayang OFWs, sagot ng PhilHealth

ni Fely Ng - @Bulgarific | October 1, 2022

Hello, Bulgarians! Tiniyak ng Philippine Health Insurance Corporation (PhilHealth) na sagot pa rin nito ang COVID-19 test para sa mga nagbabalik na OFWs sa bansa, alinsunod sa IATF Resolution No. 168, s. 2022. Sa Advisory No. 2022-0026 ng PhilHealth kamakailan, inaprubahan sa isang Special Meeting ng PhilHealth Board na pinangunahan ng Officer-in-Charge ng Department of Health at Board Chair Dr. Maria Rosario S. Vergeire ang nasabing benepisyo bilang pagkilala na rin sa mahalagang bahaging ginagampanan ng mga OFWs sa bansa.

Magpapalabas naman ng Circular ang PhilHealth para sa kumpletong guidelines para rito na may bisa mula Agosto 31, 2022. Kamakailan ay inilabas ang PhilHealth Circular No. 2022-0018, kung saan nakabatay ang COVID-19 testing coverage sa DOH Memorandum No. 2022-013 o “Updated Guidelines on Quarantine, Isolation and Testing for COVID-19 Response and Case Management for the Omicron Variant.”

Ayon sa nasabing Circular, babayaran ng PhilHealth ang RT-PCR tests, plate-based man o cartridge-based, ng mga sumusunod na priority groups: A1 o healthcare workers, A2 o senior citizens, A3 o persons with comorbidities at high risk para sa malubhang sakit at iba pang may sintomas ng COVID-19 maliban sa A1, A2 at A3.

Binigyang-diin sa nasabing Circular na hindi inirerekomenda ang COVID-19 testing para sa screening ng mga taong walang sintomas ng COVID-19 maging ang kanilang asymptomatic na close contact. Sa halip ay inirerekomenda ang pag-monitor sa mga may sintomas. Kung sakali namang kailanganin ang testing, ito ay dapat isagawa limang araw mula sa huling araw ng exposure sa COVID-19. Sagot ng PhilHealth ang plate-based RT-PCR test mula P800 hanggang P2,800 samantalang ang cartridge-based PCR naman ay mula P500 hanggang P2,450 depende sa pinanggalingan ng test kit.

Ipinaalala rin na binabayaran nito ang facility-based rapid antigen test (RAT) sa halagang P500. Ito ay magagamit ng mga pasyenteng may sintomas ng COVID-19 sa mga accredited Community at Home Isolation Benefit Package providers. Maaari rin itong ma-avail ng mga pasyente na naka-admit sa mga accredited hospitals at infirmaries/dispensaries.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

TechConnectPH at Suki Trading Corporation, joint force sa mas easy na paggamit ng teknolohiya

ni Fely Ng - @Bulgarific | September 29, 2022

Hello, Bulgarians! Isang Memorandum of Agreement (MOA) ang nilagdaan ng isang bagong technology firm at kompanyang nakabase sa Cebu City, upang isulong ang lubos na paggamit ng teknolohiya sa iba’t ibang sektor ng lipunan. Napagkasunduan ng ITechConnectPH at Suki Trading Corporation mula sa Cebu City, na palakasin ang pagpatupad ng teknolohiya sa iba’t ibang larangan. Napansin ni Undersecretary Sancho Mabborang ng Department of Science and Technology (DOST), ang umano’y mahina o mababang implementasyon ng teknolohiya kaya’t sa pamamagitan ng ITech… ni Francisco “Popoy” Pagayon, presidente ng Filipino Inventors Society Producers Cooperative (FIPC) ay inaasahang magkaroon ng high rate of adoption.

Batay sa nilagdaang MOA sa pagitan nina Pagayon at Victoriano Ocon, presidente ng Suki Trading, napagkasunduang ang kompanya ng una ang magsasagawa ng marketing ng intellectual property (IP) ng korporasyong Suki. Magbebenta ng IP ng kompanya ni Ocon, ang ITech. Ang pagsulong sa IP ay isasagawa sa maraming rehiyon ng bansa, tulad ng sa Regions 1, 2, 3, 4A, 4B, 5 at CAR. Ang promosyon ay maaaring sa pagbenta ng technology at technical information; intellectual property rights na kinabibilangan ng patents, trademarks, copyrights, system designs at iba pang may kinalaman sa IP. Ang iba pang IP na isusulong ay mga dokumentong may kinalaman sa impormasyon, tulad ng hinggil sa technology, technical know-how at technical knowledge.

“Dito ay matitiyak natin na tataas ang adoption rate sa DOST dahil hindi lamang limitado ’yong pakikipag-ugnayan sa mga inventor, kundi sa mga researchers, scientists, engineers na mayroong technology na puwedeng ibenta, puwedeng i-commercialize or for public good,” ani Mabborang.

Ang Suki Trading Corp. ay nagbebenta rin ng agri-industrial machinery at construction equipment.

Napagkasunduang magbabayad ng P1-M ang Suki Trading Corporation sa ITechConnectPH bilang signing fee. Bibigyan din ng karapatan ang kompanya na ma-access ang anumang technology, intellectual property rights, documents at technical information mula sa Suki Trading.

Ang ITechConnectPH at Suki Trading Corporation ay parehong miyembro ng DOST Small Enterprise Technology Upgrading Program (DOST-SETUP).

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.