53 Patient Transport Vehicle, donasyon ng PCSO sa ilang LGU sa bansa

ni Thea Janica Teh - @Bulgarific | September 24, 2020

Hello, Bulgarians! Namahagi ng 53 Patient Transport Vehicle (PTV) ang Philippine Charity Sweepstakes Office (PCSO) sa pangunnguna ni PCSO Vice Chairperson at General Manager Royina Garma nitong Lunes, Setyembre 21 sa Nissan North Edsa, Quezon City.

Ayon kay GM Garma, ito na umano ang pinakamaraming naipamahagi ng ahensiya ngayong 2020.

Ilan sa mga nabigyan ng PTV ay ang City of Manila, NCR, Munisipalidad ng Bataan, Isabela, Quirino, Pampanga, Bulacan, Batangas, Cavite, Laguna, Sorsogon, Bulan, Capiz province, Iloilo, Negros Occidental, Bohol, Negros Oriental, Southern Leyte, Northern Samar, Zamboanga del Sur, Bukidnon, Misamis Oriental, Davao del Norte, Davao Oriental, Davao del Sur, Agusan del Norte, Surigao del Norte at marami pang iba.

Ito ay 100% donasyon ng ahensiya sa lahat ng benepisaryo. Ang halaga ng isang Nissan Urvan Patient Transport Vehicle ay P1,585,063 kasama na ang detachable patient bed.

Ilan pa sa mga programa ng ahensiya ay ang Medical Access Program (MAP), Calamity Assstance Program, Medicine Donation Program at marami pang iba na nagbibigay ng tulong hindi lang sa LGU at ospital kundi sa lahat ng Filipino sa buong bansa.

9 na iskolar ng Prestone Philippines, nakatanggap ng laptop

ni Thea Janica Teh - @Bulgarific | September 19, 2020

Hello, Bulgarians! 9 na estudyante ang nakatanggap ng laptop mula sa Prestone Philippines, isa sa mga nangungunang innovator ng coolant at brake fluid na kasama sa kanilang Anak Ng Mekaniko Scholarship Program.

Dahil sa COVID-19 pandemic, minabuti ng Department of Education na gawing online class sa darating na school year upang maiwasan ang pagkalat ng virus. Kaya naman, isa ang laptop sa mga kailangan ng mga estudyante sa panahon ngayon.

Ayon kay Monique Gonzales, Brand Manager ng Prestone Philippines, three years ago, nangako sila sa 9 na iskolar ng Prestone na tutulungan nila ito upang maabot ang kanilang mga pangarap. Sa ganitong sitwasyon, mas prayoridad ang kaligtasan at kalusugan ng lahat kaya naman minabuti nilang magbigay ng laptop na magagamit nila sa kanilang distance learning.

Bukod sa laptop, handog din sa programa ng Prestone ang additional benefits kasama ang tuition para sa 4-year course at allowance. Sa pakikipagtulungan sa J&T Express, naipamahagi na ang mga laptop sa 9 na iskolar na nag-aaral sa STI Colleges.

“As a delivery service provider, J&T Express believes in the power of “Bayanihan.” May this simple act of helping Prestone deliver these important learning tools inspire the nine Anak ng Mekaniko scholars as they journey towards their academic success despite the current challenges posed by the pandemic,” sabi ni Zoe Chi, Vice President ng J&T Express Philippines.

Kinilala ang siyam na iskolar na sina Edmajea Aguinaldo mula sa Makati City, Anna Dela Cruz at Harvey Plazo mula sa Camarines Sur, Christian Diamante mula sa Misamis Oriental, Aulinda Buban at Keith Perez mula sa Antipolo City, Joselito Peñada mula sa Leyte, Melver Masangkay mula sa Batangas at Jaime Abesamis mula sa Davao City.

Nagsimulang maghanap ng iskolar ang Prestone noong 2017 bilang pagbabalik-tanaw sa mga local auto mechanics sa buong bansa.

8 sunud-sunod na taon… Pag-IBIG Fund, nasungkit ang highest opinion ng COA

ni Thea Janica Teh - @Bulgarific | September 11, 2020

Hello, Bulgarians! Sa nakalipas na 8 taon, nakamit muli ng Pag-IBIG Fund ang highest opinion mula sa Commission on Audit (COA) para sa presentasyon ng financial statement.

Pormal na ibinigay ang parangal noong August 28, sa isang sulat na nagsasabi na muling nasungkit ng ahensiya ang highest rating o unmodified opinion pagdating sa presentasyon ng financial statement sa taong 2019.

“Ito ay isa na namang milestone para sa kasaysayan ng Pag-IBIG Fund. Ang 8 taong sunud-sunod na pagtanggap ng ganitong parangal mula sa COA ay isa ng patunay ng pagtupad namin sa mga pangako sa mga miyembro sa pagbibigay ng magandang serbisyo at bahagi ng adhikain ng Pangulong Duterte na maging corruption-free ang bawat ahensiya,” sabi ni Secretary Eduardo D. del Rosario, Chairman ng Department of Human Settlements and Urban Development (DHSUD) at ika-11 miyembro ng Pag-IBIG Fund Board of Trustees.

Mula 2012 hanggang 2017, nakapagbigay ang COA ng unqualified opinion sa financial statement ng Pag-IBIG Fund at unmodified opinion mula 2018 hanggang 2019. Ginagamit ng mga auditor ang unqualified at unmodified opinion bilang highest opinion sa mga government agency o korporasyon na nakapagpapasa ng financial statement ng kumpleto at nasa oras.

“Lagi nating sinasabi na nakamit na natin ang best year ever, pero ang 2019 ang masasabi nating pinaka-special. Pagdating sa performance, naabot natin ang highest net income na P34.37 bilyon. Bukod pa rito, nakamit din natin ang record-high take-out ng housing loan na P86.74 bilyon na nakatulong sa 2.59 milyong miyembro. Sa pagbibigay ng COA ng parangal na ito, napatunayang 2019 ang best year ever ng ahensiya. Sa taong 2020, dahil sa pandemya, bumaba ang ating ekonomiya ngunit hindi natin hahayaan na maging hadlang ito sa pagbibigay ng tulong at pagiging transparent sa mga operasyon at serbisyo ng ahensiya,” sabi ni Pag-IBIG Fund Chief Executive Officer Acmad Rizaldy P. Moti.