PhilHealth benefits para sa kababaihan

ni Fely Ng - @Bulgarific | March 19, 2022

Hello, Bulgarians! Bilang pagdiriwang ng Buwan ng Kababaihan ngayong Marso, inanunsiyo ng Philippine Health Insurance Corporation (PhilHealth) ang mga benepisyong maaaring ma-avail ng mga kababaihan mula sa ahensiya.

Una na ang benepisyo sa panganganak sa ilalim ng Maternity Package na kinabibilangan ng pre-natal check-up na hindi bababa sa apat (4) na beses na panganganak, hanggang sa postpartum period.

Nagkakahalaga ito ng P6,500 kung sa ospital at P8,000 naman kung sa mga lying-in clinics.

Kung sakaling hindi naisagawa ang mga pre-natal check-up, maaari pa ring ma-avail ang Normal Spontaneous Delivery package kung saan kasama ang postpartum care na may halagang P5,000 sa ospital at P6,500 naman sa mga lying-in clinics.

Samantala, P19,000 naman ang benepisyo para sa caesarean section delivery sa mga level 1 hanggang 3 na ospital.

Ipinaalala ng PhilHealth na dapat ay accredited ang mga pasilidad na pupuntahan para siguradong maka-avail ng benepisyo.

Para naman sa mga kababaihang may breast o cervical cancer, sila ay maaaring maka-avail ng Z Benefit Packages sa mga piling contracted hospitals ng PhilHealth sa buong bansa. Ang Z Benefit para sa breast cancer stage 0-111A ay nagkakahalaga ng P100,000 kung saan sagot ang kumpletong serbisyo kasama ang operasyon, professional at hospital fees at chemotherapy.

P125,000 hanggang P175,000 naman ang pakete para sa cervical cancer depende sa treatment options.

Nilinaw din ng PhilHealth na may selections criteria na itinakda ang ahensiya sa nasabing Z Benefit Packages upang matiyak ang mataas na posibilidad ng paggaling ng pasyente.

Sa kasalukuyan ay mayroong 19 contracted na ospital para sa Z package sa breast cancer; at anim (6) na ospital naman para sa cervical cancer package sa buong bansa.

Covered din ng PhilHealth ang gamutan sa ilang gynecological disorders gaya ng ovarian cystectomy (P23,300), vaginal hysterectomy (P30,300), dilatation at curettage o raspa (P11,000) at mastectomy (P22,000).

Para sa karagdagang impormasyon, mag-text sa 09216300009 para matawagan ng PhilHealth Action Center o mag-post ng komento, feedback, at suhestiyon sa PhilHealth Facebook page (www.facebook.com/PhilHealthOfficial).

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City

Pinay entrepreneurs, kabalikat sa pagbangon sa pandemya

ni Fely Ng - @Bulgarific | March 12, 2022

Hello, Bulgarians! Sa ginanap na webinar noong Marso 11, mahigit 15,000 ang dumalo sa pagtitipon, at sumali sa Facebook livestreaming ng Go Negosyo at mga partners nito. Ayon kay Presidential Adviser for Entrepreneurship Joey Concepcion, kayang ibangon ng mga Pinay entrepreneur ang ekonomiya ng bansa, dahil kababaihan ang bumubuo ng halos 90 porsiyento ng micro at small entrepreneurs sa bansa, ang pagpapalakas ng bahaging ito ng populasyon ay isang malaking hakbang para maibangon ang Pilipinas mula sa COVID-19 pandemic.

“We need to inspire and motivate our women entrepreneurs, napapanahon ang Women 2022 Entrepreneurship Summit dahil nakita natin kung paano maaaring maging puwersa ang mga kababaihang negosyante sa pagpapalakas ng ating ekonomiya, marami sa kanila ang humarap sa mga hamon sa panahon ng pandemya, lalo na sa muling pagpundar ng kanilang mga negosyo. Sa kabila nito, nagpakita sila ng katatagan,” sabi ni Concepcion.

Maraming negosyanteng Pinay ang dati nang aktibo sa e-commerce, ngunit dahil sa COVID-19 pandemic, nalantad ang kakulangan nila sa pondo at sapat na pagsasanay sa e-commerce. Umaasa si Concepcion na sa pamamagitan ng Women’s Summit, mas maraming Pinay entrepreneur ang mai-inspire sa tagumpay ng mga babaeng mentor at leader. Ang summit ay paraan din para matuklasan ng mga nagnanais na magnegosyo ang iba't ibang modelo at pamamaraan ng pagnenegosyo.

Sa temang "Thriving in a Changed World: Women Leading the Way", ang summit ay binubuo ng tatlong kaganapan, bawat isa ay layong magbigay ng inspirasyon sa susunod na henerasyon ng mga Pinay na negosyante na magsimula ng kanilang sariling mga negosyo.

Una ay isang virtual conference na tatalakayin ang papel ng kababaihan sa pagpapalakas ng ekonomiya; kasunod ang Inspiring Filipina Entrepreneurs Awards na kikilalanin ang 17 na natatanging Pinay na negosyante. Ikatlong kaganapan ay ang Women Enterprise Enablers Virtual Expo, isang exhibit ng mga negosyong pinamumunuan ng kababaihan at mga organisasyong kasosyo. Ito rin ay inaasahang mag-uugnay ng mga maaaring maging kasosyo ng mga negosyante. Ang Women 2022 Entrepreneurship Summit ay umaasang mag-inspire sa mga innovator at entrepreneur na magsimula ng mga negosyong may positibong epekto sa lipunan gamit ang inclusive, innovative at sustainable na pagnenegosyo.

Sinabi ni Concepcion na ang pagtulong sa mga Pinay na negosyante ay mas naging mahalaga ngayong ang Pilipinas ay nahaharap sa kabi-kabilang balakid sa pagbangon nito. Ang tumataas na presyo ng mga bilihin na dulot ng krisis sa Russia-Ukraine ay nakakaapekto sa paggalaw ng ekonomiya, habang ang patuloy na banta ng COVID ay nagdudulot pa rin ng pangamba sa ilang mga Pilipino.

Samantala, ang mga maliliit na negosyante ay umaasa na sa muling pagbubukas ng ekonomiya ay mababayaran na ang kanilang mga pagkakautang na dulot ng mga lockdown at mga paghihigpit sa nakalipas na dalawang taon. Ang gobyerno ay nahaharap din sa P12 trilyong pambansang utang. Inaasahan na sa muling pagbubukas ng ekonomiya, makakayanan ng bansa ang epekto ng mga krisis at makakuha ng sapat na kita upang mabayaran ang mga utang nito.

“Dapat nating tandaan na ang MSMEs ay higit sa kalahati ng mga kabuuang trabaho na naiaambag sa Pilipinas. Ang kanilang pagbangon ay pagbangon nating lahat,” ani Concepcion.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Ika-27 taon ng Philhealth: Lumalaban sa mga pagsubok, hindi natitinag sa anumang hamon

ni Fely Ng - @Bulgarific | March 1, 2022

Hello, Bulgarians! Ipinagdiriwang ng Philippine Health Insurance Corporation ang ika-27 taon ng kanilang pagkakatatag alinsunod sa Republic Act 7875, as amended, na isinabatas noong Pebrero 14, 1995. Ang tema ng selebrasyon sa taong ito ay “PhilHealth, Tumutugon sa Hamon ng Panahon” upang ipakilala sa madla ang katatagan ng PhilHealth sa iba’t ibang pagsubok, lalo na sa hamon na dala ng kasalukuyang pandemya; at ang patuloy na pagsusumikap nitong mabigyan ang bawat Filipino ng sapat na proteksiyong-pinansiyal laban sa magastos na pagkakasakit.

PhilHealth at COVID-19. Ang pandemya na COVID-19 ay nagdulot ng pagsasara ng maraming negosyo at malawakang pagkawala ng trabaho at pinagkakakitaan ng maraming Filipino. Gayunman, nagbigay ng malaking kapanatagan ang PhilHealth sa mga kababayan nating nahawa at nagkasakit ng COVID-19. Bilang kabahagi ng ating pamahalaan sa pangkalahatang laban sa pandemya, nagpalabas ito ng benefit packages para sagutin ang malaking bahagi ng gastos sa testing, facility-based at home isolation, hanggang sa pagpapagamot. Naglabas din ito ng vaccine injury compensation package sakaling makaranas ng masamang epekto ang sinuman na nabakunahan laban sa COVID-19. Mula nang pumutok ang pandemya noong pasimula ng 2020 hanggang January 22, 2022, ang PhilHealth ay nakapagbayad ng mahigit sa 7 milyon COVID claims na nagkakahalaga ng P36.8 bilyon, kung saan P22.2 bilyon dito ay para sa COVID testing, P13.7 bilyon naman ay sa hospitalization claims, samantalang ang P939.8 milyon ay para sa community isolation claims.

Matapang na pagharap sa pandemya. Dahil tapat sa mandato nito na siguruhin ang kalusugan ng bawat Filipino, tulad ng isinasaad sa Universal Health Care Law, ang PhilHealth ay nagpatuloy sa pagbibigay ng serbisyo sa lahat ng mga miyembro, partners at stakeholders sa kabila ng mga limitasyon bunsod ng lockdowns. Ito ay sa kabila na marami rin sa mga kawani nito ang sumailalim sa quarantine, nagpagamot at ang iba ay nasawi pa dahil sa COVID-19. Ito ay sa kabila rin ng iba’t ibang usapin na nakaapekto sa morale ng hanay nito sa buong bansa.

Sa kabila ng lahat ng ito, ang PhilHealth ay hindi tumalikod sa kanyang misyon kung ang pag-uusapan ay pagbabayad ng benefit claims sa mabilis na pamamaraan. Nabawasan man ang dami ng empleyado na pumapasok sa mga tanggapan dahil sa quarantine restrictions, tuloy ang pagpoproseso at pagbabayad ng claims alinsunod sa mga regulasyon at panuntunan. Batay sa datos, simula 2020 hanggang Enero 22, 2022 ay nakapagbayad ang PhilHealth ng kabuuang P162.6 bilyon para sa 18.5 milyon COVID at non-COVID claims mula sa iba’t ibang ospital at pasilidad sa buong bansa.

Pinabilis na pagbabayad sa health facilities. Upang makatugon sa hiling ng mga ospital na pabilisin ang pagbabayad ng COVID claims nang hindi na kokompromiso ang alin mang batas, ipinatupad ng PhilHealth ang Debit-Credit Payment Method (DCPM) noong 2021. Sa DCPM ay mabilis na nakapagbabayad at nakapagbibigay ng kinakailangang pondo ang ahensiya sa mga healthcare partners nito. Ang DCPM ay nasa third wave na sa ngayon para sa mga ospital na gumagamot sa mga pasyenteng may COVID-19 sa buong kapuluan. Batay sa pinakahuling datos (January 20, 2022), nakapaglabas na ang PhilHealth ng P12.48 bilyon sa 464 ospital na nag-apply sa DCPM. Ang DCPM ay isa lamang sa mga positibong resulta ng tuluy-tuloy na pakikipag-usap ng PhilHealth sa mga partner hospitals nito.

Walang patid na pagseserbisyo. Upang makatugon ang PhilHealth sa serbisyong kinakailangan ng mga miyembro na limitado ang paglabas dahil sa pandemya, inilunsad nito ang Member Portal na isang napapanahong inobasyon kung saan maaaring ma-access ng miyembro ang kanilang membership at contribution records, at mag-download ng Member Data Record kahit saan at kahit kailan gamit ang kanilang smartphones o laptop. Sa nasabing Portal ay maaari ring makapagbayad ng contributions ang self-paying members gamit ang kanilang credit card, debit card o sa GCash. Ang Corporate Action Center (CAC)naman ng PhilHealth ay patuloy na naglingkod sa mga miyembrong may mga katanungan o hinaing sa kanilang benepisyo sa kabila ng manipis na hanay ng agents. Bukod sa automated voice response para sa karaniwang katanungan, naglunsad ito ng Callback Channel (0921-630-0009) kung saan ang mga miyembro ay maaaring mag-text ng kanilang tanong at sila ay tatawagan ng PhilHealth agents sa loob ng 72 oras. Mahigit sa 35,000 tawag ang natanggap at natugunan ng CAC sa taong 2021.

Sa pagdiriwang ng ika-27 taong anibersaryo at bilang pagtanaw sa susunod na 27 taon ng pagseserbisyo, patuloy itong magiging tapat sa kanyang mandato na paglingkuran ang bawat Pilipino na nangangailangan ng tulong-pinansiyal sa kanilang pagpapagamot. Pangako ng PhilHeath ang patuloy na pagtugon sa lumalawak na pangangailangang pangkalusugan ng mahigit sa 110 milyong miyembro sa bansa at sa iba’t ibang panig ng daigdig.

Hindi titigil ang PhilHealth na tumugon sa anumang hamon ng panahon.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.