PAGCOR nag-release ng P15.5M para sa Kidney Transplant Center at PNP Patrol Jeep

ni Fely Ng - @Bulgarific | March 26, 2022

Hello, Bulgarians! Sa wakas ang kauna-unahang kidney transplant center sa Cabanatuan City ay magkakatotoo na matapos makatanggap ang Dr. Paulino J. Garcia Memorial Research and Medical Center (DPJGRMMC) ng P13.27 milyong grant mula sa Philippine Amusement and Gaming Corporation (PAGCOR) noong Marso 11.

Pinangunahan ni Chairman at CEO Andrea D. Domingo, kasama ang mga miyembro ng PAGCOR Board ang turnover ng grant sa DPJGRMMC para sa pagbili ng Electro-Mechanical Operating Room Tables na may mga espesyal na accessories para sa Urology Department ng ospital (P4.42 million) at Kidney Transplant Donor Section (P8.85 milyon).

Sinabi ni Medical Center Chief Dr. Huberto Lapuz na pinlano nila ang pagtatayo ng kidney transplant center tatlong taon na ang nakararaan, ngunit natigil ang mga plano dahil sa kakulangan ng budget, bukod sa iba pang hamon na nararanasan ng ospital na resulta ng pandemya.

Ibinahagi ni Lapuz na kapag naitatag na ang kidney center sa DPJGRMMC ay hindi lamang mga residente ng Cabanatuan kundi pati na rin ang mga pasyente sa Central Luzon at mga karatig probinsiya tulad ng Aurora, Bulacan, Tarlac at Nueva Viscaya ay makikinabang.

“We are very fortunate that our hospital became the recipient of PAGCOR’s donation. Malaking tulong na ma-establish namin ito dahil wala namang transplant center dito na malapit. Ang mga pasyente pumupunta pa sa Manila para magpagamot sa National Kidney Transplant Institute (NKTI). Once built, this will truly help many patients. Dito na sila ooperahan,” pahayag ni Lapuz.

Bukod sa kidney transplant center, ina-upgrade ng DPJGRMMC ang kapasidad nito mula 400 hanggang 1,000 na kama at magtatatag din sila ng heart center. “Hopefully this year or next year, our plans for the hospital will all materialize. We would like to thank PAGCOR for providing financial assistance for our kidney transplant center,” dagdag pa ni Lapuz.

Samantala, nag-donate din ang PAGCOR ng P2.5 milyon sa Philippine National Police – Aviation Security Group (PNP-AVSEGROUP). Ang halaga ay gagamitin para sa pagbili ng dalawang patrol jeep (single cab).

“The two vehicles that will be procured will be used in our mobility assets so we will be more effective in managing police operations. With this additional mobility, we can deliver better performance. It will be a big asset because we will be more effective,” saad ni PNP-AVS Director Police Brigadier General Ysmael Salonga Yu.

Ang AVSEGROUP ay isang unit na sumasaklaw sa kaligtasan at seguridad ng lahat ng mga paliparan sa bansa.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City

PhilHealth benefits para sa kababaihan

ni Fely Ng - @Bulgarific | March 19, 2022

Hello, Bulgarians! Bilang pagdiriwang ng Buwan ng Kababaihan ngayong Marso, inanunsiyo ng Philippine Health Insurance Corporation (PhilHealth) ang mga benepisyong maaaring ma-avail ng mga kababaihan mula sa ahensiya.

Una na ang benepisyo sa panganganak sa ilalim ng Maternity Package na kinabibilangan ng pre-natal check-up na hindi bababa sa apat (4) na beses na panganganak, hanggang sa postpartum period.

Nagkakahalaga ito ng P6,500 kung sa ospital at P8,000 naman kung sa mga lying-in clinics.

Kung sakaling hindi naisagawa ang mga pre-natal check-up, maaari pa ring ma-avail ang Normal Spontaneous Delivery package kung saan kasama ang postpartum care na may halagang P5,000 sa ospital at P6,500 naman sa mga lying-in clinics.

Samantala, P19,000 naman ang benepisyo para sa caesarean section delivery sa mga level 1 hanggang 3 na ospital.

Ipinaalala ng PhilHealth na dapat ay accredited ang mga pasilidad na pupuntahan para siguradong maka-avail ng benepisyo.

Para naman sa mga kababaihang may breast o cervical cancer, sila ay maaaring maka-avail ng Z Benefit Packages sa mga piling contracted hospitals ng PhilHealth sa buong bansa. Ang Z Benefit para sa breast cancer stage 0-111A ay nagkakahalaga ng P100,000 kung saan sagot ang kumpletong serbisyo kasama ang operasyon, professional at hospital fees at chemotherapy.

P125,000 hanggang P175,000 naman ang pakete para sa cervical cancer depende sa treatment options.

Nilinaw din ng PhilHealth na may selections criteria na itinakda ang ahensiya sa nasabing Z Benefit Packages upang matiyak ang mataas na posibilidad ng paggaling ng pasyente.

Sa kasalukuyan ay mayroong 19 contracted na ospital para sa Z package sa breast cancer; at anim (6) na ospital naman para sa cervical cancer package sa buong bansa.

Covered din ng PhilHealth ang gamutan sa ilang gynecological disorders gaya ng ovarian cystectomy (P23,300), vaginal hysterectomy (P30,300), dilatation at curettage o raspa (P11,000) at mastectomy (P22,000).

Para sa karagdagang impormasyon, mag-text sa 09216300009 para matawagan ng PhilHealth Action Center o mag-post ng komento, feedback, at suhestiyon sa PhilHealth Facebook page (www.facebook.com/PhilHealthOfficial).

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City

Pinay entrepreneurs, kabalikat sa pagbangon sa pandemya

ni Fely Ng - @Bulgarific | March 12, 2022

Hello, Bulgarians! Sa ginanap na webinar noong Marso 11, mahigit 15,000 ang dumalo sa pagtitipon, at sumali sa Facebook livestreaming ng Go Negosyo at mga partners nito. Ayon kay Presidential Adviser for Entrepreneurship Joey Concepcion, kayang ibangon ng mga Pinay entrepreneur ang ekonomiya ng bansa, dahil kababaihan ang bumubuo ng halos 90 porsiyento ng micro at small entrepreneurs sa bansa, ang pagpapalakas ng bahaging ito ng populasyon ay isang malaking hakbang para maibangon ang Pilipinas mula sa COVID-19 pandemic.

“We need to inspire and motivate our women entrepreneurs, napapanahon ang Women 2022 Entrepreneurship Summit dahil nakita natin kung paano maaaring maging puwersa ang mga kababaihang negosyante sa pagpapalakas ng ating ekonomiya, marami sa kanila ang humarap sa mga hamon sa panahon ng pandemya, lalo na sa muling pagpundar ng kanilang mga negosyo. Sa kabila nito, nagpakita sila ng katatagan,” sabi ni Concepcion.

Maraming negosyanteng Pinay ang dati nang aktibo sa e-commerce, ngunit dahil sa COVID-19 pandemic, nalantad ang kakulangan nila sa pondo at sapat na pagsasanay sa e-commerce. Umaasa si Concepcion na sa pamamagitan ng Women’s Summit, mas maraming Pinay entrepreneur ang mai-inspire sa tagumpay ng mga babaeng mentor at leader. Ang summit ay paraan din para matuklasan ng mga nagnanais na magnegosyo ang iba't ibang modelo at pamamaraan ng pagnenegosyo.

Sa temang "Thriving in a Changed World: Women Leading the Way", ang summit ay binubuo ng tatlong kaganapan, bawat isa ay layong magbigay ng inspirasyon sa susunod na henerasyon ng mga Pinay na negosyante na magsimula ng kanilang sariling mga negosyo.

Una ay isang virtual conference na tatalakayin ang papel ng kababaihan sa pagpapalakas ng ekonomiya; kasunod ang Inspiring Filipina Entrepreneurs Awards na kikilalanin ang 17 na natatanging Pinay na negosyante. Ikatlong kaganapan ay ang Women Enterprise Enablers Virtual Expo, isang exhibit ng mga negosyong pinamumunuan ng kababaihan at mga organisasyong kasosyo. Ito rin ay inaasahang mag-uugnay ng mga maaaring maging kasosyo ng mga negosyante. Ang Women 2022 Entrepreneurship Summit ay umaasang mag-inspire sa mga innovator at entrepreneur na magsimula ng mga negosyong may positibong epekto sa lipunan gamit ang inclusive, innovative at sustainable na pagnenegosyo.

Sinabi ni Concepcion na ang pagtulong sa mga Pinay na negosyante ay mas naging mahalaga ngayong ang Pilipinas ay nahaharap sa kabi-kabilang balakid sa pagbangon nito. Ang tumataas na presyo ng mga bilihin na dulot ng krisis sa Russia-Ukraine ay nakakaapekto sa paggalaw ng ekonomiya, habang ang patuloy na banta ng COVID ay nagdudulot pa rin ng pangamba sa ilang mga Pilipino.

Samantala, ang mga maliliit na negosyante ay umaasa na sa muling pagbubukas ng ekonomiya ay mababayaran na ang kanilang mga pagkakautang na dulot ng mga lockdown at mga paghihigpit sa nakalipas na dalawang taon. Ang gobyerno ay nahaharap din sa P12 trilyong pambansang utang. Inaasahan na sa muling pagbubukas ng ekonomiya, makakayanan ng bansa ang epekto ng mga krisis at makakuha ng sapat na kita upang mabayaran ang mga utang nito.

“Dapat nating tandaan na ang MSMEs ay higit sa kalahati ng mga kabuuang trabaho na naiaambag sa Pilipinas. Ang kanilang pagbangon ay pagbangon nating lahat,” ani Concepcion.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.