P32.8 bilyon, kita ng PhilHealth sa taong 2021

ni Fely Ng - @Bulgarific | May 12, 2022

Hello, Bulgarians! Inanunsyo ng Philippine Health Insurance Corporation (PhilHealth) na isinara nito ang taong 2021 na may netong kitang P32.84 bilyon, mas mataas ng P2.8 bilyon o siyam na porsyento kumpara noong 2020. Dahil sa mas pinalakas na koleksyon at paglunsad ng payment facility sa Member Portal, nakakolekta ang PhilHealth ng P171.17 bilyong halaga ng health insurance contributions. Ito ay mas mataas ng 15% dahil na rin sa pagtaas ng koleksyon mula sa self-paying/earning members.

Bukod dito, tumanggap din ang korporasyon ng subsidiyang nagkakahalaga ng P71.24 bilyon mula sa National Government para sa Indirect Contributors. Ang pinaigting na koleksyon ay nakatulong para malampasan ng PhilHealth ang collection target nito ng 10%.

Samantala, umabot naman ng P140.16 bilyon ang benefit claims expense ng PhilHealth noong 2021 at nakapagtala ng dagdag claims na may halagang P20 bilyon. Ito ay mas mataas ng 16% sa P120.9 bilyong naitala noong 2020.

Malaking bahagi ng pagtaas ng benefit claims expense ay dahil sa mas mataas na kamalayan ng mga Filipino tungkol sa iba’t ibang benepisyo ng PhilHealth.

Noong nakaraang taon, bukod sa pagbabayad ng COVID-19 benefits, malaking halaga rin ang ibinayad ng PhilHealth sa claims para sa inpatient at outpatient care, primary care benefits, at Z Benefits.

Sa kabuuan, ang naging koleksyon ng PhilHealth noong 2021 ay mas mataas pa rin ng P31.01 bilyon kumpara sa benefit payments nito para sa parehong panahon.

Lumalabas na nagbabayad ng P0.82 sentimo ang PhilHealth para sa benepisyo ng mga miyembro sa kada pisong nakokolekta nito.

Nagkaroon din ng pagtaas sa investment income ng PhilHealth matapos itong kumita ng P9.5 bilyon, lampas ng 40% sa target nito para sa nakaraang taon.

Ang total assets naman nito ay umarangkada ng 27% o P347.48 bilyon, mas malaki sa P274.46 billion noong 2020. Malaking bagay dito ang pagtaas ng pamumuhunan kung saan ang National Government subsidies at maturities ay ipinuhunan matapos isaalang-alang ang kinakailangang panggastos.

Ang investment portfolio ng PhilHealth na nagkakahalaga ng P331 bilyon ang nagbunsod ng nasabing paglago ng investments nito na kinabibilangan ng special savings deposits (SSD) at time deposits na may pinagsamang halagang P70 bilyon.

Ang mga ito ay itinuturing na madaling i-liquidate at i-convert sa cash sa mga pagkakataong may hindi inaasahang pangyayari sa cash flow ng PhilHealth. Ang iba namang pamumuhunan nito ay nasa government at corporate bonds. May hawak ngayong P177 bilyon reserve fund ang PhilHealth o 25% na mas mataas noong 2020 – dahilan upang magarantiyahan nito ang tuluy-tuloy na benefit payouts para sa mga miyembro sa kanilang mga pangangailangang medikal.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Dagdag-security sa My.SSS Portal

ni Fely Ng - @Bulgarific | May 9, 2022

Hello, Bulgarians! Ayon kay Social Security System (SSS) President at CEO Michael G. Regino, ang pension fund ay nagdagdag ng mga hakbang sa seguridad sa My.SSS Portal nito upang maprotektahan ang mga account ng mga miyembro, employer, at mga pensioner.

Kabilang sa mga bagong hakbang sa seguridad na ipinapatupad ay ang mas mahigpit na mga alituntunin kapag nag-enroll ng disbursement account sa Disbursement Account Enrollment Module (DAEM) na nangangailangang mag-upload ang mga miyembro ng proof of disbursement account, katulad ng valid government-issued identification card at chest-level selfie/larawan na hawak ang ID card/dokumento bilang patunay ng disbursement account.

“We are continuously monitoring our systems to make necessary improvements to protect the accounts of our stakeholders and ensure that benefit and loan proceeds are disbursed to the rightful recipients. Within this month, the Online Member Data Change Request – Updating of Contact Information will also be resumed through the My.SSS Portal with enhanced security features,” pahayag ni Regino.

“We encourage our stakeholders to refrain from sharing their login credentials and regularly change their passwords so that their accounts will not be compromised. Like we said before, these are like your ATM PIN, anyone with this information could use your account without your authorization,” dagdag pa niya.

Kung ang mga miyembro, employer, at pensioner ay makakita ng anumang hindi awtorisadong transaksyon sa kanilang My.SSS account, o online fraud activity, pinapayuhan silang mag-ulat sa pinakamalapit na sangay ng SSS o magpadala ng e-mail sa Special Investigation Department ng SSS sa fid@sss. gov.ph o tumawag sa (02) 8924-7370. Nakahanda ang SSS na magsampa ng mga kinakailangang kaso laban sa mga indibidwal na nanloloko sa mga miyembro nito.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Operasyon kontra employer na 'di sumusunod sa Social Security law

ni Fely Ng - @Bulgarific | April 21, 2022

Hello, Bulgarians! Inihayag ng Pangulo at CEO ng Social Security System (SSS) na si Michael G. Regino na ang mga operasyon ng Run After Contribution Evaders (RACE) ay ipinagpatuloy sa National Capital Region (NCR) simula Abril 1, 2022.

Sumasailalim sa mga unang operasyon sa NCR ang 10 hindi sumusunod na employer sa Lungsod ng Maynila na may pinagsamang mga delingkuwensya sa kontribusyon na tinatayang nasa P26.26 milyon na binubuo ng P9.12 milyon na past-due na kontribusyon at P17.14 milyon na multa.

Ang kampanya sa Maynila ay bahagi ng isang serye ng mga operasyon ng RACE sa buong bansa, na naglalayong tiyakin ang patuloy na pagsunod ng mga delingkwenteng employer sa kanilang mga obligasyon ayon sa batas sa ilalim ng Republic Act No. 11199 o ang Social Security Act of 2018, tiyaking saklaw ng social security ang mga miyembro, at dagdagan ang kahusayan sa pagkolekta.

Kabilang sa mga programang ito ay ang PRRP 2, isang social security contribution penalty condonation program para sa mga employer, na sumasaklaw sa naaangkop na buwan ng Marso 2020 at pataas.

Maaaring ayusin ng mga kwalipikadong tagapag-empleyo ang kanilang mga pagkadelingkuwensya sa pamamagitan ng buong pagbabayad o installment na may pagsang-ayon sa mga naipon na multa. Ang programang ito ay tatakbo hanggang Mayo 19, 2022.

Ang isa pa ay ang PRRP 3 o ang Enhanced Installment Payment Program, na nagpapahintulot sa mga kwalipikadong employer na bayaran ang kanilang SS past-due at Employees’ Compensation na kontribusyon nang installment na may mga termino sa pagbabayad na mula siyam hanggang 60 buwan, depende sa kabuuang halaga ng delingkuwensya. Ito ay tatakbo hanggang Nobyembre 22, 2022.

Maaaring ma-access ang kumpletong detalye ng PRRPs 2 at 3 sa https://bit.ly/SSSCI2021-015, at https://bit.ly/SSSPRRP3, ayon sa pagkakabanggit.

Sa ngayon, nakapagsagawa na ang SSS ng 15 RACE operations sa iba't ibang lugar sa buong bansa ngayong taon. Plano nitong magsagawa ng higit pa sa mga susunod na araw at buwan dahil layunin nitong magsagawa ng hindi bababa sa tatlong operasyon para sa bawat Branch Operations Division nito. Ang iba pang mga hakbang upang matiyak ang pagsunod ng mga employer sa Social Security Law ay patuloy ding ipinapatupad.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.