Operasyon kontra employer na 'di sumusunod sa Social Security law

ni Fely Ng - @Bulgarific | April 21, 2022

Hello, Bulgarians! Inihayag ng Pangulo at CEO ng Social Security System (SSS) na si Michael G. Regino na ang mga operasyon ng Run After Contribution Evaders (RACE) ay ipinagpatuloy sa National Capital Region (NCR) simula Abril 1, 2022.

Sumasailalim sa mga unang operasyon sa NCR ang 10 hindi sumusunod na employer sa Lungsod ng Maynila na may pinagsamang mga delingkuwensya sa kontribusyon na tinatayang nasa P26.26 milyon na binubuo ng P9.12 milyon na past-due na kontribusyon at P17.14 milyon na multa.

Ang kampanya sa Maynila ay bahagi ng isang serye ng mga operasyon ng RACE sa buong bansa, na naglalayong tiyakin ang patuloy na pagsunod ng mga delingkwenteng employer sa kanilang mga obligasyon ayon sa batas sa ilalim ng Republic Act No. 11199 o ang Social Security Act of 2018, tiyaking saklaw ng social security ang mga miyembro, at dagdagan ang kahusayan sa pagkolekta.

Kabilang sa mga programang ito ay ang PRRP 2, isang social security contribution penalty condonation program para sa mga employer, na sumasaklaw sa naaangkop na buwan ng Marso 2020 at pataas.

Maaaring ayusin ng mga kwalipikadong tagapag-empleyo ang kanilang mga pagkadelingkuwensya sa pamamagitan ng buong pagbabayad o installment na may pagsang-ayon sa mga naipon na multa. Ang programang ito ay tatakbo hanggang Mayo 19, 2022.

Ang isa pa ay ang PRRP 3 o ang Enhanced Installment Payment Program, na nagpapahintulot sa mga kwalipikadong employer na bayaran ang kanilang SS past-due at Employees’ Compensation na kontribusyon nang installment na may mga termino sa pagbabayad na mula siyam hanggang 60 buwan, depende sa kabuuang halaga ng delingkuwensya. Ito ay tatakbo hanggang Nobyembre 22, 2022.

Maaaring ma-access ang kumpletong detalye ng PRRPs 2 at 3 sa https://bit.ly/SSSCI2021-015, at https://bit.ly/SSSPRRP3, ayon sa pagkakabanggit.

Sa ngayon, nakapagsagawa na ang SSS ng 15 RACE operations sa iba't ibang lugar sa buong bansa ngayong taon. Plano nitong magsagawa ng higit pa sa mga susunod na araw at buwan dahil layunin nitong magsagawa ng hindi bababa sa tatlong operasyon para sa bawat Branch Operations Division nito. Ang iba pang mga hakbang upang matiyak ang pagsunod ng mga employer sa Social Security Law ay patuloy ding ipinapatupad.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Vax card out, booster card in

ni Fely Ng - @Bulgarific | April 11, 2022

Hello, Bulgarians! Kamakailan sinuportahan ng pinakamalalaking grupo ng mga negosyante ang panukalang palitan ang mga vaccination card ng booster card simula Hunyo.

Sinang-ayunan nila ito dahil kailangang manatiling malusog ang ekonomiya at makaiwas sa mga bagong variant ng SARS-Cov2 virus. Laman ng panukala ang pagtatakda ng expiry date sa vaccination cards at pagpalit nito ng booster card.

Naunang inihain ni Presidential Adviser for Entrepreneurship Joey Concepcion, kabilang sa mga grupong hayagang sumuporta sa panukala ay ang Philippine Franchise Association, Philippine Retailers Association, Philippine Marketing Association, Philippine Association of Legitimate Service Contractors, Federation of Filipino Chinese Chambers of Commerce and Industry, Makati Business Club, Financial Executives Institute, American Chamber of Commerce, European Chamber of Commerce, Indian Chamber of Commerce, at ang Nagkakaisang Samahan ng Nangangasiwa ng Panlalawigang Bus sa Pilipinas, pati na rin ang mga grupong kumakatawan sa mga salon/spa, amusement park, at mga concert venues at organizers.

Samantala, ang mga airlines at restaurants ay magsusulong ng mga insentibo para magpa-booster na ang mga tao.

Pinag-aaralan din ng ilan pang mga grupo ang kanilang pagsuporta.

Ayon sa panukala, binibigyan ang mga tao ng 60 araw matapos maglabas ng resolusyon ang IATF.

Papayagan din nito ang lahat, anuman ang priority group, upang makuha ang kanilang mga booster shot.

Ang panukala ay naunang sinuportahan ni Dr. Ted Herbosa, tagapayo ng National Task Force. Ayon kay Dr. Herbosa, ngayong may higit sa 65 milyong Pilipino na ang ganap nang nabakunahan, 11.8 milyon pa lamang ang nakatatanggap ng kanilang booster. Naunang naging isyu ang booster kasunod ng balita na 27 milyong bakuna ang mag-e-expire na sa Hulyo.

Sinabi ni Concepcion noong nakaraang linggo na nanganganib na magkaroon ng mataas na kaso ng COVID sa ikalawang bahagi ng 2022 kung hindi dadami ang mga nababakunahan at nabu-booster.

Nagbabala ang Go Negosyo founder ng patung-patong na problema sa ikalawang bahagi ng taon kung ang krisis sa Russia-Ukraine ay magtatagal pa at magdudulot ng pagtaas ng presyo ng mga bilihin at pag-antala sa pandaigdigang daloy ng mga produkto.

“Right now there is no danger. The danger is in the next semester when the waning immunity might be felt already. And this is not counting the possibility that new variants might emerge," aniya.

Ayon kay Concepcion, ang Pilipinas ay kasalukuyang isa sa iilang bansa sa Asya na mababa ang kaso ng COVID. Gayunpaman, may pag-aalala na sa pagbukas ng bansa sa dayuhang turista, maaari itong makadagdag sa pagtaas ng mga kaso. Tila nakakalimutan na din daw ng ilan ang physical distancing at tamang pagsusuot ng face mask.

Kamakailan ay lumagpas na sa P12 trilyon ang pambansang utang ng Pilipinas dahil sa paghiram para sa pagtugon sa pandemya. Ayon kay Concepcion, magsasayang ang bansa ng US$200 milyon kung hahayaan lang mag-expire ang mga bakuna. “That’s money we can’t afford to waste,” aniya.

Sa kabila nito, pinuri ni Concepcion ang pagsisikap ng gobyerno na mailapit ang pagbabakuna sa mga tao. Ang problema, aniya, ay ang mga taong pinagpapaliban o tinatanggihan ang pagpapabakuna.

"We already know what might happen if we don’t act, and we know what needs to be done. If we close down again in the second semester, we risk losing our gains in the last two years. This can be entirely preventable if we act now," sabi niya.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Libreng lotto ticket para sa mga ‘Super Pinay’

ni Fely Ng - @Bulgarific | April 7, 2022

Hello, Bulgarians! Sa natapos na National Women’s Month Celebration (NWMC) ay inilunsad ng Philippine Charity Sweepstakes Office (PCSO) ang “SUPER TICKET PARA KAY SUPER PINAY” kung saan may LIBRENG TICKET ng Super Lotto 6/49 na may halagang P100 ang mga kababaihan na masugid na sumusuporta at tumataya sa PCSO kapalit ng halagang P10 na taya sa PCSO digit games (2D, 3D, 4D at 6D) o halagang P20 na taya sa iba’t ibang laro ng lotto (Lotto 6/42, Mega Lotto 6/45, Super Lotto 6/49, Grand Lotto 6/55 at Ultra Lotto 6/58).

Ito ay bilang pagbibigay-pugay sa mga kababaihan at pagsusulong ng pagkapantay-pantay ng kasarian ng bawat isa maging ikaw man ay lalaki o babae. Ang proyektong ito ng PCSO ay pinangunahan ng Product Standard and Development Department (PSDD) sa pangunguna ng kanilang Department Manager na si Gng. Laila D. Galang.

Ayon sa kanya, ito ay pagbibigay halaga at inspirasyon sa mga “SUPER PINAY” ng bansa na nagpapakita ng walang patid na tapang at husay sa abot ng kanilang makakaya lalo na sa panahon ng pandemya. Nagpasalamat din siya sa mga sumusuporta sa PCSO, “Maraming salamat po sa patuloy po ninyong pagtangkilik sa mga produkto at laro ng PCSO. Kayo po ang inspirasyon namin sa pagtulong. Mabuhay po ang mga kababaihan, mabuhay ang mga Pilipino.”

Sabay-sabay na isinagawa ang proyektong ito sa lahat ng branch offices ng PCSO sa buong bansa.

Samantala, nakibahagi at nagpakita rin ng suporta ang Sweepstakes Employees Union (SEU) sa selebrasyon. Namahagi ng libreng taho para sa mga tumatangkilik sa PCSO.

Hinihikayat naman ni PCSO Vice Chairperson and General Manager Royina Marzan Garma na patuloy na suportahan ang PCSO sa pamamagitan ng pagtangkilik sa mga produkto at laro ng PCSO dahil dito nanggagaling ang 30% na ipinantutulong sa medical at iba pang programa na may kinalaman sa kawanggawa ng PCSO.

Ipinaalala rin ng PCSO sa publiko ang tungkol sa Tax Reform Acceleration and Inclusion (TRAIN) Law na nagsasaad na ang lahat ng panalo na higit sa halagang P10,000 ay may 20% na buwis.

Ayon naman sa batas (RA 1169) ang nanalong tiket ay puwede lamang kubrahin sa loob ng isang (1) taon mula sa petsa ng bola nito, pagtapos nito ay mawawalan na ito ng bisa.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.