Bodega ng paputok sumabog, 18 nadale

ni Mai Ancheta | June 16, 2023

Sugatan ang 18 katao dahil sa insidente ng sunog na may kasamang pagsabog ng mga paputok sa Bgy. Bundukan, Bocaue, Bulacan, kahapon ng madaling-araw.

Batay sa inisyal na report ni Fire Marshal Inspector Carlo Mariano, ng Bocaue Bureau of Fire Protection, nagtamo ng bahagyang pinsala ang mga biktima at dinala sa pagamutan dahil ang iba sa kanila ay inatake ng hypertension.

Ang mga biktima ay mga residente malapit sa isang warehouse na kinalalagyan umano ng mga paputok.

Bago naganap ang pagsabog, nakita umano ng mga residente na nagkaroon ng pagsiklab ng kable ng kuryente sa labas ng isang bahay at inabot ang warehouse na pinaniniwalaang pinagtaguan ng mga paputok.

Ayon kay Bulacan Police Director Colonel Relly Arnedo, ang sumabog na warehouse ay ilegal na itinayo sa nabanggit na lugar.

2 todas, 1 nawawala sa gumuhong istraktura sa Bulacan

ni Lolet Abania | June 1, 2022

Dalawang bangkay ang narekober habang isa ang nawawala matapos na isang bahagi ng establisimyento ang gumuho sa Meycauayan, Bulacan, ayon sa Bureau of Fire Protection (BFP) ngayong Miyerkules.

Sa isang Facebook post, sinabi ng BFP Central Luzon na tinatayang nasa apat na katao ang naapektuhan sa insidente sa kahabaan ng Silver St., Moralla Industrial Park, Barangay Libtong, Meycauayan, Bulacan.

“Per recent status update, two were found dead upon retrieval, one has been found alive, and one still missing as operation continues,” pahayag ng BFP.

Patuloy naman ang BFP na nagsasagawa ng search, rescue, at retrieval operations sa pinangyarihang lugar. Inaalam na rin ng mga awtoridad ang dahilan at sanhi ng pagguho ng istraktura.

Pulse Asia ginawang source... Nagpakalat ng false survey ng 2 kandidatong mayor sa Bocaue, mananagot

ni Zel Fernandez | May 9, 2022

Mariing itinanggi ng public opinion polling body na Pulse Asia Research, Inc. ang lumabas na mayoralty survey sa bayan ng Bocaue, Bulacan kahapon ng Linggo, kulang isang araw bago ang eleksiyon ngayon.

Taliwas sa kumalat na Facebook post mula sa Bocaue, mariing itinanggi ng Pulse Asia na sila ang nagsagawa ng naturang survey na nagpakita ng voter preference sa pagitan ng dalawang magkatunggaling mayor sa bayan nito.

Batay sa larawan ng art card na naka-post sa social media, tinukoy na source ng naturang survey ang Pulse Asia, kung saan makikitang nakakuha umano si Bocaue incumbent mayor candidate JJS Santiago ng 77% kontra kay running mayor JJV Villanueva na mayroong 15%, habang nasa 8% naman umano ang mga undecided.

Ayon sa pahayag ng polling firm, "Pulse Asia Research, Inc. did not conduct a survey in Bocaue."

"We will take the requisite legal action to hold the party that posted this fabricated liable," dagdag pa nito.

Ang mga magkatunggaling kandidato sa pagka-mayor ng Bocaue, Bulacan ay nasa katauhan nina Jose Cruz Santiago, Jr. (JJS Santiago) ng PDP-Laban at Eduardo Jose Villanueva, Jr. (Jonjon JJV Villanueva) ng National Unity Party at anak ni Jesus Is Lord Church president-founder Bro. Eddie Villanueva.

Samantala, kasunod ng pahayag ng Pulse Asia tungkol sa lumabas na pekeng survey, kapansin-pansing burado na ang pagkaka-post nito sa Facebook page na Team Bocaue Support GROUP, ngunit nakarating na sa kinauukulan ang mga screenshots nito.

Kasalukuyan pang inaalam ng pamunuan ng Pulse Asia Research, Inc. ang pinagmulan at kung sino ang may pananagutan sa naturang false survey sa nabanggit na bayan.