Presyo ng baboy, mataas pa rin dahil kulang sa supply

ni Mary Gutierrez Almirañez | February 12, 2021

Posibleng manatiling mataas ang inflation rate sa mga susunod na buwan, ayon sa Bangko Sentral ng Pilipinas (BSP) dahil sa limitadong suplay ng karne ng baboy.

Ayon pa sa Philippine Statistic Authority (PSA), bumagsak sa 24% ang imbentaryo ng baboy noong Enero at maraming babuyan ang sumailalim sa sapilitang pagpatay sa mga baboy dulot ng African Swine Flu (ASF).

Kabilang sa mga lugar sa bansa na lubhang naaapektuhan ang supply ng baboy ay ang Cordillera Administrative Region, Ilocos Region, Cagayan Valley, Gitnang Luzon, CALABARZON, Bicol Region, Central Visayas, Davao Region, SOCCSKSARGEN (dating Central Mindanao), Caraga Region, at Bangsamoro Autonomous Region in Muslim Mindano.

Kaugnay nito, maging ang presyo ng litson ay nagsitaasan na rin dulot ng kakulangan sa suplay ng baboy.

Foreign Service Officer Exams, BSP survey, puwede na!

ni Lolet Abania | November 20, 2020

Pinayagan na ng Inter-Agency Task Force for the Management of Emerging Infectious Diseases (IATF) ang pagsasagawa ng onsite 2020 Foreign Service Officer Examinations sa susunod na buwan.

Gayunman, magpapatupad pa rin ng minimum public health standards at pagkakaroon lamang ng 30 porsiyentong seating capacity sa nakalaang examination venue.

Itinakda ang nasabing exams mula December 15 hanggang 17.

Inaprubahan din ng IATF sa buong bansa ang pagsasagawa ng isang Consumer Payments Survey ng Bangko Sentral ng Pilipinas (BSP) at pagkakaroon onsite ng mga guidelines, written, oral at practical specialty, at subspecialty examinations na inisyu ng Philippine Medical Association (PMA).

Sample ng national ID card, inilabas na

ni Lolet Abania | November 6, 2020

Inilabas na ng Bangko Sentral ng Pilipinas (BSP) ngayong Biyernes ang sample ng national ID card kung saan kaya ng ahensiya na mag-imprenta nito ng 154,000 kada araw.

Ayon kay BSP Governor Benjamin Diokno, masusi niyang ininspeksiyon ang mga makina na gagamitin sa pagpi-print ng ID cards. Ipinakita rin niya ang sample nito sa publiko. “Finally, the BSP is ready to print the #NationalID. We inspected the machines that will print the IDs this morning. The machines have the capacity to print 154,000 cards per day,” sabi ni Diokno sa kanyang Twitter account.

Naatasan ng pamahalaan ang Central Bank para mag-imprenta ng ID cards na magagamit ng mamamayan sa mga transaksiyon na kanilang gagawin. Una rito, ayon sa BSP, gagastos ang gobyerno ng P30 sa bawat isang national ID card o may kabuuang halaga na P3.4 billion para sa 116 milyong Pinoy.

Nilalaman at nakalagay sa ID card ang Philippine Identification System (PhilSys) na may numero ng bawat indibidwal, buong pangalan, facial image, kasarian, petsa ng kapanganakan, blood type at address.

Gayundin, mayroon ang ID card ng biometric information tulad ng iris scan, fingerprints at photograph.

“The national ID system has been decades in the making. We look forward to bringing it to the Filipino people to promote financial inclusion and digitalization,” sabi ni Diokno. Samantala, target na simulan ang nationwide registration para sa national ID system sa January 2021.