Diokno, bilang DOF chief at Medalla, bilang BSP governor — Marcos

ni Lolet Abania | May 26, 2022

Inanunsiyo ni President-elect Ferdinand “Bongbong” Marcos Jr. ngayong Huwebes na si Bangko Sentral ng Pilipinas (BSP) Governor Benjamin Diokno ang magiging chief ng Department of Finance (DOF) sa ilalim ng kanyang administrasyon.

Sa isang press conference matapos ang kanyang proklamasyon, sinabi rin ni Marcos na papalitan ni Felipe Medalla bilang BSP governor si Diokno.

Naging BSP governor si Diokno noong Marso 2019, ang iniwang posisyon ni yumaong dating BSP Governor Nestor Espenilla Jr. na namatay dahil sa cancer. Dahil sa appointment niya bilang DOF secretary, umiksi ang termino ni Diokno bilang BSP governor na nakatakda sanang magtapos sa Hulyo 2023.

“It is an honor to serve the Filipino people in my current and any future capacity. I am grateful and humbled by the President-elect to help his administration manage the country’s fiscal affairs,” sabi ni Diokno sa isang statement.

“As Finance Secretary, I will strive to continue prudently and carefully balancing the need to support economic growth, on one hand, and to maintain fiscal discipline, on the other,” dagdag niya.

Bago pa ang pagtatalaga sa BSP sa ilalim ng Duterte administration, nagsilbi si Diokno sa kanyang ikalawang termino bilang secretary ng Department of Budget and Management (DBM). Unang nagsilbi si Diokno bilang DBM secretary sa ilalim ng Estrada administration, gayundin, naging DBM undersecretary mula 1986 hanggang 1991 sa ilalim ng yumaong dating Pangulong Corazon Aquino.

Samantala, si Medalla ay dati nang miyembro ng Monetary Board simula Hulyo 2011. Una siyang na-appoint dito ni yumaong dating Pangulong Benigno Aquino III, habang nagsilbi sa kanyang ikalawang termino sa Duterte administration noong Hulyo 2017.

Naglingkod din si Medalla bilang secretary ng Socio-Economic Planning at director-general ng National Economic and Development Authority (NEDA) mula 1998 hanggang 2001 sa administrasyon ni dating Pangulong Joseph Estrada. Wala pang tugon si Medalla hinggil sa kanyang appointment sa ngayon.

P20 at P5 coins na ibinibenta online, ‘wag bilhin – BSP

ni Lolet Abania | April 19, 2022

Nagbabala ang Bangko Sentral ng Pilipinas (BSP) sa publiko hinggil sa pagbili ng mga P20 at P5 coins sa mas mataas na presyo nito mula sa mga online sellers, habang nananatili pa sa sirkulasyon ang parehong barya.

Ayon sa central bank, mayroong 290.09 milyon piraso ng P20 new generation currency (NGC) coins at 1.90 bilyon piraso naman ng enhanced P5 coin na nasa sirkulasyon hanggang nitong katapusan ng Pebrero.

“The 20-Piso NGC and enhanced 5-Piso coins are legal tender and can be used as payments for goods and services at face value,” pahayag sa isang advisory.

Ang P20 NGC coin ay opisyal na inilunsad noong 2019, tampok ang imahe ni dating Pangulong Manuel Quezon sa bahagi ng obverse side, at ang BSP logo at ang Malacañan Palace sa bahagi ng reverse side.

Ilan sa mga naging finalists ng best new coins sa International Currency Awards ang naturang barya, kung saan nagwagi ito ng P20 commemorative coin ng Banco de México.

Inilunsad din ng central bank ang “enhanced” version ng P5 NGC coin noong Disyembre 2019, na may nonagon shape. Tampok sa obverse side ang isang portrait ng bayani ng Pilipinas na si Andres Bonifacio, habang ang reverse side naman ay nagpapakita ng isang rendition ng BSP logo at ang Tayabak o Jade vine.

Matatandaan na noong Marso 2018, orihinal na nai-released ng BSP ang mga NGC coins, kung saan maipagmamalaki ang mga enhanced aesthetics at security features na taglay nito.

Gayunman, isang mambabatas ang nanawagan para sa full recall ng mga NGC coins dahil umano sa kanilang mga design flaws, kung saan nagdulot aniya ito ng pagkalito sa publiko.

Sa paggunita ng kabayanihan ni Jose Rizal... ‘125-Piso’ commemorative coin, inilabas na ng BSP

ni Lolet Abania | March 11, 2022

Inilabas na ng Bangko Sentral ng Pilipinas (BSP) ngayong Biyernes ang limited edition ng “125-Piso” commemorative coin bilang paggunita sa ika-125 anibersaryo ng kabayanihan ni Dr. Jose Rizal.

Sa Facebook post ng BSP, ipinakikita ng coin si Rizal bilang pagkilala na isang “global Filipino hero.” “His life and legacy serve as inspiration for people from all walks of life,” pahayag ng BSP.

Ayon sa BSP, ang 34-mm commemorative coin, na gawa sa nordic gold, ay mayroong larawan at lagda ni Rizal na may bigat na 15 gramo at nagtataglay ng gold-plated finish.

“Inscriptions 125 years and Martyrdom of Jose Rizal are on the obverse side while the Rizal Monument, the BSP logo, 125 Piso and Republika ng Pilipinas are on the reverse side,” saad ng BSP.

Sinabi rin ng BSP na available ang coin sa limitadong dami lamang para sa P1,000, kung saan maaaring mag-order sa official website ng kagawaran.

Matatandaang si Rizal ay binitay noong Disyembre 30, 1896, sa pamamagitan ng firing squad sa Bagumbayan Field (Rizal Park na ngayon) sa Maynila, kung saan ipinag-utos ng mga Spanish authorities.

Ginunita naman ng Pilipinas ang ika-125 anibersaryo ng kamatayan ng Pambansang Bayani noong nakaraang Disyembre.