3rd booster vs. COVID, ubos na

ni Mylene Alfonso @News | August 14, 2023

Ubos na ang 390,000 doses ng COVID-19 bivalent vaccine na ipinagkaloob ng Department of Health (DOH) sa Lungsod ng Maynila.

Ayon sa Manila Health Department (MHD), hinihintay pa ang susunod na ibibigay na supply ng DOH.

Inihayag ng city government na naipamahagi na nilang lahat ang COVID-19 bivalent vaccine sa mga kuwalipikadong residente ng Maynila.

Batay sa datos ng MHD, may 8,233 indibidwal ang tumanggap ng Pfizer bivalent vaccines.

Ibinibigay ang bivalent vaccines upang magkaroon ng immunity laban sa original at Omicron variants ng COVID-19 ang mga health workers, senior citizens at residente sa Maynila na may comorbidities.

3rd booster sa senior, start na

ni Mylene Alfonso @News | July 10, 2023

Aarangkada na ngayong araw ang pabibigay ng Bivalent COVID-19 vaccines para sa senior citizen o A-2 group.

Ayon kay Manila Mayor Honey Lacuna, sabay na rin nilang tuturukan ng bivalent vaccines ang A1 group o mga health workers sa mga senior citizens (A2).

Ayon sa advisory, pangungunahan ni Lacuna at Manila Health Department (MHD) chief Dr. Arnold ‘Poks’ Pangan ang pagbabakuna ng Pfizer COVID-19 na bivalent vaccines sa nasabing priority groups.

Gayunman, nilinaw ni Dr. Pangan na maaari lamang mabakunahan ang priority groups kung sila ay nakatangap na o nakapagpabakuna na ng 2nd booster sa nakalipas na apat hanggang anim na buwan.

Isasagawa ang pagbabakuna aa 44 health centers sa buong lungsod.

Kinakailangan naman na dalhin ang mga vaccination card habang ang iba naman ay hinihimok na magparehistro via online.

Patuloy na nananawagan ang Manila LGU sa ibang health workers at maging sa mga senior citizens na sumalang na sa pagbabakuna para dagdag-proteksyon sa kanila at maging sa mga kapamilya.

Nabatid na nakahanda ang lungsod na bakunahan kahit na hindi residente ng Maynila

3rd booster vs. COVID, matumal

ni Mylene Alfonso | June 30, 2023

Dismayado si Manila Mayor Honey Lacuna-Pangan sa mababang turnout ng mga healthcare workers na nagpaturok ng bivalent COVID-19 vaccine.

Ayon kay Lacuna na isa ring doktor, mababa ang bilang ng mga nagpabakuna kahit na 32,000 doses na bivalent vaccine lamang ang ipinagkaloob ng national government makaraang pangunahan ang rollout ng bivalent vaccines sa Sta. Ana Hospital.

"Medyo mababa, I have to be honest mababa po. A1 pa lang and kagaya po sa ibang ospital natin hindi pa po kasi tayo puwede magpabakuna ng bivalent vaccine hangga't hindi tayo nakaka-two booster doses. Marami pa po na kahit medical health workers ang wala pa ring second booster," pahayag ni Lacuna sa ginanap na pulong balitaan ng Manila City Hall Reporters' Association sa Harbor View Restaurant.

Ipinaliwanag ni Lacuna na itinuturing bilang third booster ang bivalent at dahil dito, kailangang magkaroon muna ng first at second booster shots bago maturukan ng third booster.

"Halimbawa sa isang ospital 600 ang dapat na magpabakuna eh ang nagpapa-second booster pa lang sa kanila ay 400. So, 'yung 400 lang 'yung puwedeng mag-avail nu'ng bivalent vaccine," wika pa ng alkalde.

Ayon pa sa lady mayor, siya at ang mga health cluster ng lungsod ay nag-uusap na magbibigay sila ng palugit na isang linggo at pagkatapos ay ibibigay na nila ito sa senior citizens na kabilang din sa priority groups.

Ang pagluwag ng restriksyon sa health protocols ang dahilang itinuturo ng alkalde sa kawalan ng interes na magpaturok ng bivalent shots kabilang na rito ang tuluyang pag-alis ng public health emergency status ng World Health Organization.

"Hindi na kasi siya requirement, tapos kung magkakaroon man ng symptoms ng COVID, hindi na ganu'n kalala. Siguro rin hindi na po ganu'n katakot ang mga tao," saad niya.