Bongbong Marcos, inendorso ng KBL bilang standard bearer sa eleksyon 2022

ni Jasmin Joy Evangelista | September 24, 2021

Pormal nang inendorso ng Kilusang Bagong Lipunan (KBL) ang kandidatura ni dating Senador Ferdinand “Bongbong” Marcos Jr. sa pagka-pangulo sa eleksiyon 2022.

Ang KBL ay isang political party na itinaguyod ng ama ni Bongbong na si dating pangulong Ferdinand Marcos.

Sa isang resolusyon, inihayag ng KBL na si Marcos ay “highly nominated as the party's official candidate for President and was unanimously approved by the officers and members of the party.”

"Resolved, as it is hereby resolved, to approve the nomination and endorsement of the candidacy of Former Senator Ferdinand 'Bongbong' Romualdez Marcos, Jr. as the Party's official candidate for the position of President in the National and Local Elections on May 9, 2022," ayon sa resolusyon ng partido.

Ayon kay Bongbong, siya ay tatakbo sa susunod na halalan ngunit wala pa siyang pinal na desisyon kung sa anong puwesto.

"If they endorsed me, I also thank them for that expression of support and trust they have bestowed upon me. (My recorded message aired during the national assembly) is a message of appreciation and thanks on my part. I don't know that you can interpret that as an acceptance," ani Marcos.

Dagdag pa niya, sasagutin niya sa takdang panahon ang lahat ng katanungan hinggil sa kanyang pagkandidato sa 2022.

.

SC ibinasura ang election protest ni Marcos vs VP Robredo

ni Lolet Abania | February 17, 2021

Dinismis na ng Supreme Court (SC), tumatayo bilang Presidential Electoral Tribunal (PET) ngayong Martes, ang election protest na inihain ni dating Senador Ferdinand “Bongbong” Marcos Jr. laban kay Bise-Presidente Leni Robredo sa naging resulta noong 2016 na halalan.

Ayon kay SC Spokesperson Brian Hosaka, nagkakaisa ang naging desisyon ng korte na ibasura ang naturang protesta kung saan halos umabot ng limang taon matapos na i-file ito ni Marcos noong June 29, 2016.

Sinabi ni Hosaka na sa 15 justices na dumalo sa meeting, pitong magistrates ang “fully concurred” sa dismissal habang ang natitira naman ay “concurred” ang kanilang boto.

Ang lumabas na desisyon ay nakatakdang i-upload sa website ng high court. Gayunman, hindi masabi ni Hosaka kung ang naging desisyon ay maaari pang iapela.

“I cannot answer the question because I only have the information which I read,” ani Hosaka sa isang news conference ngayong Martes.

Ayon sa election lawyer ni Robredo na si Romulo Macalintal, hindi pa nila natatanggap ang kopya ng desisyon subalit magsasagawa ang kanilang kampo ng press conference kapag hawak na nila ito.

“Hindi pa kami nakakatanggap ng desisyon, nakinig lamang kami sa presscon. Ngayon lang kami magkakausap mula nu’ng magkaroon ng pandemya tungkol sa bagay na ito,” ani Macalintal.

Sinabi naman ng abogadong si Vic Rodriguez, spokesperson ni Marcos, wala pa rin sila natatanggap na kopya ng desisyon.

"The information that we have are primarily sourced from our media friends and not from any official notice or information emanating from the Presidential Electoral Tribunal," ayon sa emailed statement ni Rodriguez.

"We shall issue our statement on the matter as soon as we have established the facts based on official document or pronouncement coming from the PET," dagdag ni Rodriguez.

Sa pahayag ng Palasyo, nirerespeto nila ang desisyon ng Supreme Court subalit maaari pa umanong mag-file ng appeal si Marcos.

“‘Yan ay desisyon ng Kataas-taasang Hukuman. We respect that,” ani Presidential Spokesperson Harry Roque sa isang press conference sa Davao City.

“We respect also that the camp of (former) senator Bongbong Marcos has a further remedy of moving for reconsideration,” dagdag ni Roque.