Bishop Bacani inalmahan ang pag-endorso ni Bro. Mike kay BBM

ni Jasmin Joy Evangelista | February 15, 2022

Nanindigan si Most Rev. Teodoro Bacani, spiritual adviser ng El Shaddai, na hindi nila sinusuportahan ang pag-endorso ni El Shaddai leader Bro. Mike Velarde kay presidential candidate Bongbong Marcos Jr. at vice presidential candidate Davao City Mayor Sara Duterte.

“Yung endorsement na yun ay hindi endorsement ng buong El Shaddai. Ito po ay personal endorsement ni Bro. Mike Velarde. Si Bro. Mike Velarde po ang founder at servant leader ng El Shaddai ngunit hindi siya ang El Shaddai DWXI Partners Fellowship International Incorporated. Ito po ay mas malawak at mas malaki sa kanya,” pahayag ni Bacani sa isang Facebook video nitong Lunes, Pebrero 14.

Ayon pa rito, mali umano na iendorso si Marcos

"Gusto kong sabihin rin, tignan nyo si Bongbong Marcos ay naghahanap daw ng pagkakaisa ngunit ni hindi pinagsisisihan at ng kanyang pamilya hindi pinagsisisihan ang kanilang ginawa noong nakaraang martial law at yung pandarambong na naganap noon na hindi maipagkakaila," ani Bacani.

"Bilyon ang mga nadambong noong panahon na yun, hindi lamang milyon at marami nang nakuhang muli ang gobyerno kaya mali po 'yun," dagdag niya.

Ayon pa kay Bishop Bacani, hindi umano kinonsulta ni Velarde ang mga elders maging ang ilang pinuno ng religious group.

“At sa kanya pong pag-endorso kay BBM, hindi po nya kinonsulta ang mga elders. Hindi rin niya kinonsulta si Bishop Jess Mercado, na bishop ng Paranaque na sumasakop sa spiritual center ng El Shaddai. ‘Di niya kinunsulta si Sonny de Claro, spiritual director ng El Shaddai. Hindi niya ako kinonsulta, spiritual adviser ng El Shaddai. Kaya po yun ay personal endorsement niya,” paglilinaw niya.

“Kanya, sa lahat ng mga kasapi ng El Shaddai, malaya kayong pumili ng inyong gustong piliin para Presidente.”

Wala pang pahayag si Velarde at ang kampo ni BBM hinggil dito.

Marcos, ‘umaasa’ sa endorsement ni P-Du30 — spox

ni Lolet Abania | February 11, 2022

Umaasa umano si presidential aspirant Ferdinand “Bongbong/BBM” Marcos Jr. na matatanggap ang pag-endorso ni Pangulong Rodrigo Duterte para sa May 9 elections, ayon sa kanyang spokesperson.

Sinabi ni Atty. Vic Rodriguez na ang makuha ang suporta ni Pangulong Duterte ay “big boost” o malaking tulong para mailuklok si Marcos sa Malacañang.

“Well, kami ay hopeful. Kagaya ng sinabi rin naman I think ng nakararami kundi man lahat ng presidential candidate, it could be a big boost to get the endorsement of President Rodrigo Roa Duterte,” sabi ni Rodriguez sa isang interview ngayong Biyernes.

“Hindi kami inosente sa ganu’n. Gusto rin namin makuha ang endorsement ni Pangulong Duterte but hanggang nga sa ngayon eh, siguro nag-iisip pa ang ating Pangulo.”

“Maghihintay kami at patuloy na aasa na makuha namin ang kanyang matamis na oo,” sabi pa ni Rodriguez. Una nang binanggit ng anak ni Pangulo Duterte, na si Davao City Mayor Sara Duterte-Carpio, na umaasa siya na makukuha ang suporta ng kanyang ama sa kanilang kandidatura.

Si Mayor Sara ang running mate ni BBM para sa UniTeam. Ang Marcos-Duterte tandem ang nangunguna umano sa kanilang mga katunggali, batay sa mga isinagawang surveys.

Sa isang taped public briefing na ipinalabas nitong Lunes, ipinahayag ni Pangulong Duterte na wala pa siyang napipisil na susuportahan na presidential candidates para sa darating na national elections.

Subalit, sa kabila ng hindi pagsuporta sa sinuman, naniniwala ang Pangulo na kuwalipikado ang lahat ng mga kandidato na tumakbo sa eleksyon.

Disqualification cases ni Marcos, ibinasura na ng Comelec First Division

ni Lolet Abania | February 10, 2022

Bumoto para i-dismiss ang Commission on Elections (Comelec) First Division sa tatlong consolidated disqualification cases na inihain laban kay presidential candidate dating Senador Ferdinand “Bongbong/BBM” Marcos Jr., ito ang kinumpirma ni Commissioner Aimee Ferolino ngayong araw.

Ayon kay Comelec spokesman James Jimenez, ibinasura na ng division ang mga petisyon nina Bonifacio Ilagan, Abubakar Mangelen, at Akbayan dahil aniya, “for lack of merit.”

Batay sa mga petitioners, hindi dapat payagan si Marcos na tumakbo sa pagka-pangulo dahil siya ay na-convict sa paglabag sa Internal Revenue Code, kung saan anila, “carried a penalty of perpetual disqualification from holding any public office.”

Ipinunto nila na noong 1995, “a Quezon City court convicted Marcos for not filing his income tax return from 1982-1984. The conviction was upheld by the Court of Appeals but removed the imprisonment sentence.”

Ayon pa sa kanila si Marcos ay hindi umapela sa ruling.

Samantala, ang resolution ng First Division ay ipinahayag ilang sandali bago mag-alas-5:00 ng hapon ngayong Huwebes, ang ikatlong araw ng national election campaign period.