Ilan sa mga dumalo sa campaign rally ng Uniteam sa Bulacan, nawalan ng wallet at cellphone

ni Jasmin Joy Evangelista | March 9, 2022

Ilan sa mga dumalo sa campaign rally ni presidential aspirant Ferdinand “Bongbong” Marcos Jr. sa Sta. Maria, Bulacan ang umakyat sa stage upang ianunsiyo ang nawalang cellphone at wallet at nakiusap na maibalik ang mga ito.

Matapos ang rally noong Martes ng hapon, umakyat ang isang lalaki sa stage at nakiusap na maibalik ang kanyang cellphone.

"Parang awa niyo na po, pakisauli na lang po, babayaran ko po. Please lang po," pakiusap ng lalaki.

Umakyat din sa stage ang isang overseas Filipino worker upang ipanawagan ang Nawala niyang wallet. Sinabi nito na kailangan niya ang mga identification card na laman nito at ayos lang kahit hindi maibalik ang laman nitong pera.

"Hello po, sino po nakakita ng wallet? May OFW ID po 'yun, pakisauli na lang po... Kailangang-kailangan ko po 'yun, kahit hindi na sauli 'yung pera," aniya.

Sa ngayon ay wala pang pahayag ang kampo ni BBM hinggil sa insidente.

Kampo ni BBM wala raw alam sa pamamahagi ng food stub sa campaign rally sa Bulacan

ni Jasmin Joy Evangelista | March 9, 2022

Itinanggi ng kampo ni presidential aspirant Bongbong Marcos na may kinalaman sila sa umano’y distribusyon ng stubs kapalit ng pagkain malapit sa venue ng kanilang campaign rally sa Guiguinto, Bulacan.

Ayon sa report ni Sandra Aguinaldo sa “24 Oras”, nakuhanan ng video ng isang reporter mula sa isang foreign news agency ang pagkakagulo ng mga tao malapit sa gate ng Guiguinto oval.

Sa kanyang mga tweet, sinabi ni Camille Elamia na ipinapalit ng mga tao ang kanilang stubs para sa pagkain. Ibinahagi rin niya ang larawan ng stub na may picture nina Marcos at running mate nito na si Sara Duterte.

"None at all. We have no idea," ani spokesman ni Marcos na si Atty. Vic Rodriguez nang tanungin kung mayroong alam sa naturang distribusyon ng food stubs.

Sa ngayon ay wala pang komento sina Marcos at Duterte hinggil dito.

BBM nangako ng taas-suweldo kapag nakarekober na ang ekonomiya ng bansa

ni Jasmin Joy Evangelista | March 6, 2022

Nangako si presidential aspirant Ferdinand “Bongbong” Marcos na sa sandaling makabangon ang ekonomiya ng bansa ay magpapatupad ito ng pagtaas ng sahod ng mga manggagawang Pinoy, kung maluluklok na pangulo.

Ayon kay Marcos nitong Sabado, posibleng tutulan ng mga negosyante ang pagbibigay ng mas mataas na suweldo ngayong panahon ng pandemya.

“Alam natin ang pangangailangan ng sektor ng paggawa na kailangan ding taasan ang sahod, pero dahil nga hindi pa tayo nakakabangon mula sa pandemya ay siguraduhin muna nating pasiglahin ang kalakalan,” ani Marcos.

“Tiyakin muna natin ang pagbubukas ng mga kumpanya at ang pagbabalik sa trabaho ng ating mga kababayan. Mula sa ganoong konsepto ay titiyakin natin ang kaluwagan at pagbibigay ng maaaring mga benepisyo sa ating mga manggagawa,” dagdag niya.

Parte umano ng pagbangon ng ekonomiya ang mga mamimili at business investment. Aniya, “it is, therefore, necessary for people to have jobs to be able to spend and pump up the economy.”

“Alam ng management (ng mga kumpanya), ng pamahalaan, at mga manggagawa ang kalagayan ng ekonomiya kaya lahat ay nagtitiis. Kahit nakikita na natin ang unti-unting pagbangon ay kailangan pa ding patatagin muna ang kalakalan at iyan ang ating pagsisikapang gawin,” pahayag pa ng dating senador.

Iginiit din ni Marcos na ang mga micro, small at medium enterprises ang siyang magiging backbone ng kanyang economic program, dahil karamihan umano sa mga manggagawa ay galing sa sektor na ito. Sinabi rin niya na malaki ang ambag ng trade and commerce sa bansa upang makamit ang economic viability.