Darating pa ba si Santa Claus?

ni Bong Revilla @Anak ng Teteng | Dec. 20, 2024

Maraming mga bata ang nagtatanong kung darating pa ba si Santa Claus — masakit na katanungan kung ang makaririnig ay ang mga magulang partikular ang ama ng tahanan dahil sa isang mahalagang papel ang kanilang ginagampanan sa mga anak sa tuwing sumasapit ang Pasko.

Sa dinami-dami ng ating mga kababayang tila hindi pinalad sa panahong ito ng Kapaskuhan dahil sa mga pagsubok na dumaan tulad ng mga kalamidad ay mahirap ipaliwanag sa kanilang maliliit na anak kung darating pa ba si Santa Claus.

Alam naman natin na bahagi ng ating kultura na ang ama ng tahanan ay naglalaan ng panahon para makapaghanda at maibili ng laruan para pasayahin ang Pasko ng kanilang mga anak sa paniniwalang galing ito kay Santa Claus.

Sa mga lugar sa Pilipinas ay maraming mga bata ang hanggang sa kasalukuyan ay umaasang isang araw bago mag-Pasko ay dadalawin sila ni Santa Claus.

Bilang isang tatay ay damang-dama ko ang pighating nararanasan ng mga ama ng tahanan na kapos sa kakayahan para tuparin ang mga pangarap ng kani-kanilang mga anak kahit sa isang simpleng pamasko lamang.

Sa kabila ng napakarami na nating napuntahan lugar para bahaginan ng kahit pang-Noche Buena man lamang ay nagsusumigaw ang katotohanang hindi natin kakayaning bigyan lahat para walang malungkot sa mismong araw ng Pasko.

Nawa ay magsilbing aral din sa mga ama ang pangyayaring ito na lalo tayong magsumikap sa buhay para sa susunod na taon ay matiyak nating mapupuntahan ni Santa Claus ang ating mga anak.

Ngunit, hindi porke kapos tayo sa pinansyal na aspeto ay hahayaan na lamang nating dumaan ang Pasko ng wala lang.

Dapat ay pangunahan natin ang mismong paliwanag sa ating mga anak kung ano talaga ang tunay na kahulugan ng Pasko at idetalyeng mabuti na hindi handa at laruan ang importante bagama’t bahagi ang mga material na bagay ay higit na mahalaga na magkakasama ang buong pamilya.

Pinakamahalagang sabay-sabay tayong dumalo sa misa sa mismong araw ng kapanganakan ni Hesus kasama ang buong pamilya at ipagpasalamat natin ang mga biyayang ipinagkaloob ng Panginoon sa nagdaang taon.

Pagkatapos dumalo ng misa ay dapat ding pagsaluhan ang hapunan kahit walang magarbong handa — dahil kahit simple ay magkakasama at buo ang pamilya.

Ito ang tunay na diwa ng Pasko, ang ipagdiwang ang kaarawan ng ating Panginoon at dapat na maunawaan ng ating mga anak. 

Ipagdasal lang natin sa Panginoon ang kasalukuyan nating pinagdaraanan at unti-unti ay magiging maayos din ang lahat habang maiintindihan ng mga bata kung bakit hindi magagawi si Santa Claus.

Samantala, ayon sa ulat ng Philippine National Police (PNP) ay tumaas ng bahagya ang krimen na may kaugnayan sa Pasko – ito ay dahil sa pressure na kailangan ng panggastos sa Kapaskuhan.

Ngunit hindi tamang gumawa pa ng panlalamang sa kapwa para lamang mairaos ang araw na ito ng masagana — kahit magarbo ang handaan kung galing naman sa masama ay tiyak na hindi ito ikatutuwa ng Panginoon.

Hindi naman kailangang may mamahaling damit o regalo dahil ang mahalaga ay maipadama natin sa kapwa ang pagmamahal. At kung may mga kasamaan tayo ng loob ay mabuting makipagkasundo na bilang pag-alala sa tunay na diwa ng Pasko.

Sa ganitong paraan ay mairaraos natin ito ng maligaya at sinisiguro kong mas masaya ang ganitong uri ng karanasan kumpara sa maraming handa pero sobrang bigat naman ng nararamdaman dahil sa rami ng bagahe sa buhay.

Ayokong magtunog relihiyoso ngunit mahalagang yugto ng ating buhay ang panahong ito at sayang naman kung hindi natin magagawang maging masaya dahil lamang sa kakapusan sa buhay.

Huwag tayong malugmok dahil sa hindi natin maayos na sitwasyon at sa halip ay gamitin natin itong inspirasyon para sa masayang Pasko sa susunod na taon. Maligayang Pasko sa inyong lahat!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tanggap naman daw ni Congw. Lani… SEN. BONG, UMAMING MAY MGA ANAK SA IBANG BABAE, IPAPAKILALA NA

ni Janiz Navida @Showbiz Special | Dec. 15, 2024

Photo: Bong Revilla Jr. - FB

Hindi sinasadyang napaamin namin ang paborito naming aktor-senador — na napakasimpatiko pa rin hanggang ngayon — na si Sen. Bong Revilla, Jr. sa pagkakaroon nito ng anak (o “mga anak”) sa ibang babae, sa ginanap na grand mediacon kahapon ng Season 3 ng Walang Matigas na Pulis sa Matinik na Misis sa Novotel Hotel, Cubao, QC.

Magbabalik nga kasi sa ere ang mala-pelikulang action-comedy series ni Sen. Bong simula sa Dec. 22, Linggo, kung saan 7 weeks lang daw muna itong mapapanood ng mga Kapuso fans dahil bawal na ngang lumabas si Sen. Bong sa TV kapag nagsimula na ang kampanya sa Feb. 12, 2025.

As we all know, muling tatakbong senador ang mister ni Congw. Lani Mercado sa May, 2025 midterm elections. Pero after that, pramis ng aktor-senador, babalik din siya sa TV at maging sa paggawa ng pelikula.

Sa trailer ng Season 3 ng Walang Matigas na Pulis sa Matinik na Misis, ipinakitang isa sa mga bagong makakasama sa cast si Jillian Ward na gaganap na anak daw ni Tolome (Sen. Bong) sa isang babaeng nakarelasyon nito bukod kay Gloria (played by Beauty Gonzales).

Kaya naman sa Q&A segment sa mediacon, natanong namin si Sen. Bong since ang sabi niya ay kuwento ng buhay niya itong Walang Matigas na Pulis… kung in real life ba ay may lumapit at nagpakilalang anak niya at ano ang naging reaksiyon niya?

At kung sakali namang wala pang lumalapit, ano ang gagawin niya if one day ay may mag-claim na anak niya sa ibang babae?

Mas unang sinagot ni Sen. Bong ang pangalawang tanong namin, bagama’t napansin namin ang pagbuka ng bibig niya at pagsabi ng “Ohhh!” na parang nagulat sa unang tanong namin.

Aniya, kapag may lumapit, siyempre, ang unang itatanong niya ay sino ang nanay, and then, siyempre ay ipapa-DNA raw niya.

“Dahil kung talagang anak ko siya, dapat panagutan ko,” katwiran ni Sen. Bong.

Inulit namin ang tanong, “So, so far, Sen., wala pa naman?”

At du’n na nga bumigay si Sen. Bong na napangiti sa tanong namin sabay pagsingkit ng mga mata, “Alam ni Lani ‘yun, meron, meron. Pero makikilala n’yo rin ‘yun kung sino SILA.” 

Dugtong nito, “At hindi mo puwedeng itago ‘yun, ah? Unfair para sa mga bata, dugo mo ‘yun, anak mo ‘yun, at hindi ko ikinakahiya ‘yun,” na umani ng palakpakan mula sa mga press people na present sa event.

Eh, ano nga naman kung may iba pang mga anak si Sen. Bong bukod sa misis niyang si Congw. Lani, shocking pa ba ‘yun, eh, ang namayapang ama nga niya na si Don Ramon Revilla, Sr. na dati ring aktor-pulitiko ay bukas na libro naman sa lahat ang pagkakaroon ng napakaraming anak sa iba’t ibang babae.

Kaya nga sa one-on-one interview, nang tinanong si Sen. Bong kung ilan na ba lahat ang anak niya, pabirong sagot lang ng super-guwapo pa rin naman kasing aktor, “Konti lang, totoo ‘yun, sa akin, kasya pa sa jeep, eh,” sabay tawa nang malakas, “‘yung sa tatay ko, pang-LRT,” hirit pa nito, kaya pati kami ay ang dami naming tawa.

Kinumpirma rin ni Sen. Bong na hindi lang open sa publiko itong inamin niyang mga anak niya pero tanggap na raw ni Congw. Lani at ng kanyang mga anak sa misis.

Well, du’n ka naman bibilib kay Sen. Bong, may paninindigan at kayang harapin ang kanyang ginawa. No wonder na love na love talaga siya ng press dahil sa kanyang pagiging honest at sincere.

Anyway, kaabang-abang ang Season 3 ng Walang Matigas na Pulis sa Matinik na Misis dahil para ka ngang nanonood ng pelikula sa ganda ng mga action scenes na talagang ginastusan at hindi tinipid.

May eksena rin du’n na tumalon sina Sen. Bong at Beauty sa ilog at nakakaaliw ang pag-amin ni Beauty na kahit nasa ilalim na sila ng tubig, not just once but twice pa siyang sumigaw ng “Tolomeeeeeeeee!” Hahaha!

Bukod kay Jillian Ward, kasama rin sa bagong cast si Boss Toyo at may special participation din si Ms. Gloria Diaz. 

Nandiyan pa rin at kasama sa cast sina Carmi Martin, Leo Martinez, Jestoni Alarcon, Liezel Lopez, Raphael Landicho, Jeff Tan, Maey Bautista, Nino Muhlach, Joko Diaz at marami pang iba, mula sa direksiyon ni Enzo Williams.

Belen, mensahe ng pagmamahal, awa at kababaang-loob

ni Bong Revilla @Anak ng Teteng | Dec. 13, 2024

Labing-isang araw na lamang ay bisperas na ng Pasko, ang araw na pinakahihintay na mismong sentro ng pagdiriwang para salubungin ang Pasko kung saan ginugunita natin ang kapanganakan ng ating Panginoong Hesus.

Maraming kahulugan ang Pasko para sa ating mga kababayan, at sa buong mundo ay kilala ang ating bansa na may pinakamahabang pagsalubong sa araw na ito kasabay ng pagsigla ng ating mga pamilihan.

Kahit walang kaugnayan sa kautusan ng Simbahang Katoliko ay nagkukusa na ang marami nating kababayan na sa unang araw pa lamang ng buwan ng Setyembre ay marami na ang nagpapatugtog ng mga awitin patungkol sa Pasko.

Hindi dahil sa nilalabag natin ang aral ng simbahan ngunit pagpapakita lamang ito ng pagkasabik ng maraming Pilipino sa pagdating ng Pasko, at katunayan maging ang pamahalaan at mga negosyante ay nakikisabay sa pagbibigay ng maagang benepisyo para sa mga manggagawa.

Nitong nagdaang linggo matapos matanggap na ng ilan sa atin ang mga benepisyo tuwing panahon ng Kapaskuhan, partikular sa Metro Manila ay kitang-kita ang pagdagsa ng maraming tao sa mga shopping mall at mga restaurant.

Pero higit sa dinadayo ng ating mga kababayan ay ang mga pandekorasyon na maaaring gamitin para sa Pasko, at isa sa mga nangunguna ay ang iba’t ibang laki ng Christmas tree at magagandang disenyo ng Belen.

Ang Belen ay isa sa pinakamahalagang tampok na inilalagay sa mga simbahan ilang araw bago sumapit ang Pasko na binubuo ng isang nakahigang sanggol sa sabsaban kasama sina Maria at Jose na napapaligiran ng mga pastol at ng kanilang mga tupa.

Makikita rin ang tatlong Haring Mago at mga anghel na nagsisiawit sa itaas na bahagi ng Belen dahil sa pagsilang ng Mesiyas na nagbibigay ng napakalaking mensahe para sa kapayapaan hindi lang sa ating bansa kung hindi sa buong daigdig.

Sa ating bansa ay may ginaganap na Belenismo Festival sa Tarlac na taun-taong dinarayo ng marami na naging dahilan kaya sila tinawag na ‘Belen Capital of the Philippines’ dulot ito ng labis na pagbibigay importansya nila sa Belen.

Ang Belenismo, mula sa salitang Belen ay Spanish word na ang ibig sabihin ay artistikong paggawa ng Belen na hango noong taong 1223, nang si St. Francis of Assisi at ang ilang kasama ay gumawa ng kauna-unahang Belen.

Isa sa pinakaprominenteng simboliko sa pagdiriwang ng Pasko sa Pilipinas ay ang Belen o ang Nativity Scene na galing sa katagang Bethlehem kung saan isinilang si Hesu Kristo at mula noon ang Belen ay nagtataglay na ng mensahe ng pagmamahal, awa at kababaang-loob ng ating Panginoon.

Bukod sa parol na kasama sa Belen na sumisimbolo naman sa liwanag ng tala, na naging gabay ng tatlong Haring Mago para matunton ang kinaroroonan ng sanggol na si Hesus ay naging permanenteng disenyo na rin sa Belen.

Kabilang na nga ang mga simbahan, paaralan at mga establisimyento sa maraming lugar ay makikitaan ng Belen at may pagkakataong naglalakihan pa ang mga ito ng tulad sa sukat ng normal na tao.

Bago magtapos ang dekada 60 hanggang sa unang bahagi ng taong 2000 ay may napakalaking Belen na dinarayo ng marami nating kababayan sa COD building sa Araneta Center ngunit taong 2003 ay inilipat na ito sa Greenhills Shopping Center sa San Juan.

Noong pandemya ay pansamantalang lumamya ang Belen Festival sa Tarlac partikular noong nakaraang dalawang taon pero ngayon ay nagbabalik ang sigla ng pagandahan ng mga gawang Belen.

Hindi basta-basta ang mga lumalahok sa Belen Festival dahil halos lahat ng kumpanya, mga negosyo, pribadong indibidwal at kilalang grupo ay sumasali sa festival na ito sa Tarlac na dinarayo gaya ng sa Panagbenga Festival sa Baguio.

Isa pa sa kapansin-pansin sa mga nagdaang festival na ito ay ang kahusayan at katalinuhan ng ating mga kababayan sa paggawa ng Belen na mula sa iba’t ibang klase ng materyales na hindi mo aakalain. May mga gumagamit lamang ng sako ng bigas, may pinatuyong damo, sawali, kawayan ngunit kapag nalagyan na ng magagandang ilaw ay hindi mo mapipigilang mamangha sa sobrang gaganda.

Hindi lang mga Pilipino ang pinaghahandaan ang paggawa ng Belen dahil ngayon ay itinatampok din ito sa maraming bahagi ng mundo tulad sa gitna ng St. Peter’s Square sa  Vatican, mayroon din sa Metropolitan Museum of Art sa New York City at Carnegie Museum of Arts sa Pittsburgh.

Maging ang mga siyudad sa Australia, Canada, Germany, Italy, Poland at United Kingdom ay may kani-kanyang naglalakihang Belen at ang Nativity Scene sa Bethlehem mismo kung saan nagsimula ang lahat, sa Orthodox Church of the Nativity na siya ring plaza ng naturang lugar.

Ngunit, higit sa kagandahang dala ng Belen ay ang tunay na diwa nito bilang paggunita sa kapanganakan ng ating Panginoong Hesus na simbulo ng pagbibigayan at pagpapatawad sa bawat isa bago sumapit ang araw ng Pasko.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com