Diskriminasyon sa ibang wala pang bakuna ang ‘no vaccine no entry’

ni Bong Revilla - @Anak ng Teteng | September 06, 2021

Lumalakas ang panawagan ng iba’t ibang sektor sa pagnenegosyo hinggil sa panukalang magpatupad ng ‘bakuna bubble’ na tanging ang mga bakunado lamang at mga may negatibong test result lang ang papayagang pumasok sa mga establisimyento.

Ngunit hanggang sa kasalukuyan ay naninindigan ang Department of Justice (DOJ) hinggil dito dahil hindi pa umano ito ang tamang panahon sa pagpapatupad nito dahil napakarami pa ng katanungan sa legal na aspeto ng naturang panukala.

Sa kabila nang pagsisikap ng pamahalaan na kumbinsihin ang publiko na makilahok sa isinasagawang vaccination program laban sa COVID-19 ay nananatiling malaking suliranin para sa bansa ang pagdadalawang-isip na magpabakuna ng marami sa ating mga kababayan.

Kahit napakataas na ng isinasagawang kamalayan hinggil sa kaligtasan at mabuting epekto ng bakuna ay ikinukonsidera pa rin ng pamahalaan ang dinaranas ng social trauma ng ilan sa ating mga kababayan na epekto ng mga nagdaang karanasan hinggil sa pagbabakuna.

Ngunit kahit napakataas ng pag-aalinlangan ng publiko ay itinuloy pa rin ng pamahalaan ang pagbabakuna laban sa COVID-19 at marami naman ang nagpabakuna na at patuloy pang tumataas ang nais magpaturok ngunit lumalabas pa rin sa mga survey na marami pa rin ang natatakot.

Lumalabas pag-aaral na ang dinaranas na social trauma ng marami ay dahil sa Dengvaxia vaccine at kontrabersiya sa geopolitics na labis na nagpahirap para makapaglunsad ng panibagong tiwala ang pamahalaan hinggil sa mabuting dulot ng bakuna.

Matatandaang noong 2016 ay nakaranas ang bansa ng pinakontrabersiyal na pagbabakuna sa kasaysayan na humantong sa pagkasawi ng mahigit sa 600 katao na karamihan ay bata at hanggang sa kasalukuyan ay hindi pa napapanagot ang mga nasa likod nito.

Hindi natin masisi ang marami sa ating mga kababayan na nasira ang tiwalang minsan nilang ipinagkaloob sa pamahalaan ngunit dahil sa dami ng nasawi at wala pang natutukoy na salarin ay tila napakahirap para muli silang himuking ibalik ang kanilang naglahong tiwala.

Sa ngayon ay nagbigay na ng pahayag ang pamunuan ng Ayala Malls na hindi umano mahirap ipatupad ang ‘no vaccine no entry’ dahil mahigpit umano ang kanilang pagpapatupad sa mga health at safety protocol.

May sapat umanong panuntunan ang kanilang establisimyento para ipatupad ang konseptong ‘bakuna bubble’ at hindi umano sila magdadalawang isip hinggil dito kung ipag-uutos na ng pamahalaan.

Suportado rin ang ‘bakuna bubble’ ng food at beverage sector na labis umanong naapektuhan ng sunud-sunod na lockdown dahil sa pandemya at karamihan sa mga dine-in services ay hindi pinayagan at malaking tulong umano kung ipatutupad na ito.

Ayon naman sa pamunuan ng McDonald’s Philippines ay hindi maituturing na diskriminasyon ang ‘bakuna bubble’ dahil magsisilbi umano itong proteksiyon sa mga hindi pa bakunado at malaking kabawasan sa problemang kinakaharap laban sa COVID-19.

Ang COVID-19 vaccine umano ay maihahalintulad sa seatbelt na nagbibigay ng proteksiyon sa kahit anong klase ng aksidente tulad ng virus na hindi natin alam kung saan at kung kailan makakahawa.

Maging ang pamunuan ng Wilcon Depot, Inc. ay suportado rin ang naturang panawagan dahil mahalaga umanong payagan na ang mamimili na makapunta sa mga establisimyento para makita nila ng personal ang binibili upang hindi mabiktima ng mga hindi akma at maling produkto sa online selling.

Kahit ang pamunuan ng Victory Liner, Inc. ay nakikisimpatya sa panawagan ng mga negosyante na panahon na umano upang magkaroon ng malinaw na panuntunan na aakma sa sektor ng transportation at aayon sa pagpapatupad ng ‘bakuna bubble’.

Pabor na pabor din sa ‘bakuna bubble’ ang mga nasa IT at business processing sector, mga gym owner, salon, SPA at marami pang nesgosyo dahil nakikita umano nilang ang pagpapatupad nito ang tanging makapagsasalba para makabangon ang kani-kanilang negosyo.

Nagsimula ang mga panawagan hinggil dito nang magpahayag kamakailan si Presidential Adviser for Entrepreneurship at Go Negosyo founder na si Joey Concepcion na magpatupad ng ‘bakuna bubble’ upang mapasigla umano ang ekonomiya sa gitna ng pandemya na umani naman kaagad ng napakaraming suporta mula sa mga negosyante.

Ngunit natural lamang na may mga tututol sa panukalang ito at tinatawag itong diskriminasyon at maging ang usaping legal ay nauungkat sa panawagang ito at nananatiling nakabitin pa ang ‘bakuna bubble’ na ito.

Kung ang mga hindi bakunado ang tatanungunin ay matagal na nilang alam na baka isang araw ay magkaroon talaga ng paghihigpit, ngunit hindi nila ito alintana dahil ang gusto lang nila ay huwag talagang magpaturok ng bakuna at wala silang pakialam kung anuman ang maging negatibong epekto nito.

Malaking hadlang din sa pagpapatupad ng ‘bakuna bubble’ ang marami sa ating mga kababayan na gusto nang magpabakuna ngunit hindi pa natuturukan dahil sa kakulangan ng supply at ito ang matatawag na diskriminasyon kung hindi sila papapasukin sa mga establisimyento.

Kung igigiit na ipatupad ang ‘bakuna bubble’ ay hindi pa talaga napapanahon dahil marami pa ang hindi nababakunahan na desidido nang magpabakuna, pero ‘yung mga ayaw magpabakuna ay alam na nilang darating ang pagkakataong ito na maghihigpit, pero talagang ayaw nila.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Bigyang-pansin ang mga marinong Pinoy

ni Bong Revilla - @Anak ng Teteng | September 03, 2021

Isang malaking pasasalamat ang nais nating ipaabot sa Chairperson at napakasipag na kasama sa Senado na si Sen. Joel Villanueva dahil sa malaking karangalan na maging co-sponsor sa napakahalagang panukalang-batas hinggil sa kapakanan ng marinong Pinoy.

Buong-buo ang ating suporta sa Senate Bill No. 2369 sa ilalim ng Committee Report No. 289, na pinamagatang “An Act Instituting the Magna Carta of Filipino Seafarers” na magkasamang isinumite ng Committee on Labor, Employment, and Human Resources Development at ng Committee on Foreign Relations.

Napakatagal na ng ating adbokasiya na mabigyang-proteksiyon at itaguyod ang karapatan ng ating mga marino at ang mapabuti ang kanilang kapakanan. Nagsimula pa ito noong ating unang termino bilang mambabatas. Sa 16th Congress pa lamang ay isunulong natin na ang Magna Carta of Filipino Seafarers sa ilalim ng Senate Bill No. 21.

Kaya tuwang-tuwa tayo sa Committee on Labor sa ilalim ng pangangasiwa ni Sen. Villanueva dahil ipinagpatuloy niya noong 17th Congress ang pangangalaga sa kapakanan ng ating mga marino. Sa madaling salita, salang-sala na ang panukalang-batas at sa mahabang panahon na ginugol upang balangkasin ito sa tulong ng mga concerned government agencies at stakeholders, kumbaga, hinog na hinog na para sa plenary discussion at puwede ng maging batas.

Ayon sa Department of Labor and Employment, tinatayang nasa 400,000 Filipino seafarers ang naglipana sa iba’t ibang bansa kung saan ang Pilipinas ang pinakamalaking pinagmumulan ng mga marino sa buong mundo.

Kaya marapat lamang na mabigyan ng sapat na pagkalinga ang industriyang ito — mula sa mga manggagawa mismo, hanggang sa kanilang kontribusyon sa ating ekonomiya, hanggang sa kanilang gampanin sa kanilang pamilya.

Hindi pa man nagsisimula ang COVID-19 ay napakarami nang kinahaharap na suliranin ang ating mga marino na mas lalo pang lumala dahil nga sa pagbagsak ng ekonomiya dulot ng pandemya at nagsilbing wake-up call ang pangyayaring ito sa pamahalaan para paigtingin pa ang pagsisikap na magbigyang-proteksiyon ang marinong Pinoy.

Noong pa man ay sinisikap na ng ating pamahalaan na bigyang-proteksiyon ang karapatan ng mga marino at itaguyod ang kanilang kapakanan sa tulong ng ating mga kasamahan sa pribadong sektor. Isa sa mga pinakamahalagang dokumento na gumagabay sa sektor na ito ngayon ay ang Maritime Labor Convention, 2006.

Noong Agosto 20, 2012, niratipikahan ng Pilipinas ang Maritime Labour Convention, 2006 at dahil sa nasa ika-30 bansa tayo na nagsagawa nito ay pinairal nito ang Convention na magkaroon ng epekto noong Agosto 20, 2013. Sa naturang ratipikasyon, kinilala ng International Labour Organization (ILO) ang Pilipinas bilang “the largest source of the world’s seafarers” at “the home of nearly one third — 30 per cent — of seafarers working on foreign flag ships.

Dahil din dito ay nagmarka ang ating bansa na maiangat ang lebel bilang isang disenteng trabaho ang pagiging marino at hindi malayo na mula ngayon ay gagawa ulit tayo ng marka sa kasaysayan ng sektor na ito sa pamamagitan ng pagpasa ng panukalang-batas.

Ang naturang Convention ay nagbigay ng minimum requirements for seafarers to work on a ship; conditions of employment; accommodation, recreational facilities, food and catering; health, protection, medical care, welfare and social security protection; at compliance and enforcement.

Ang Magna Carta of the Seafarers ay ang batas na siyang iiral para magkaroon tayo ng pananagutan sa Maritime Labor Convention, 2006. Ang naturang panukala ay naglatag rin ng probisyon na tutugon sa konteksto, mga isyu at pangangailangan ng mga marinong Pinoy.

Layunin din ng Magna Carta of Filipino Seafarers na maglatag ng kumpleto, angkop, at makabuluhang instrumento na sisiguro sa kanilang karapatan at proteksiyon, lalo na sa mga kababaihan, at sa kanilang pangkalahatang pag-unlad.

Ilan sa mahahalagang probisyon ng naturang panukala ay ang mga sumusunod: the terms and conditions of their employment and the duties of seafarers; accommodation, recreation facilities, food and catering in ships; medical care and maritime occupational safety and health standards which shall be formulated by the DOLE; guidelines on termination of employment and settlement of disputes; at repatriation and reintegration of overseas Filipino seafarers.

Bilang co-author at co-sponsor ng naturang panukala ay ipinapanalangin kong makiisa sana ang ating mga kasamang mambabatas na agad isulong para maging ganap na batas sa lalong madaling panahon ang Magna Carta of Filipino Seafarers.

Matagal nang inaasahan ng mga marinong Pinoy ang batas na ito at ito na ang pinakamagandang pagkakataon para ihandog natin sa kanila ang nararapat naman para sa kanila!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Ligtas at pinabilis na proseso ng pagboto sa mga botanteng senior citizens at PWD

ni Bong Revilla - @Anak ng Teteng | September 01, 2021

Hindi pa man din nagsisimula ang filing ng kandidatura ngayong Oktubre para sa mga kandidatong nais tumakbo sa darating na halalan sa taong 2022 ay ramdam na ang init ng pulitika sa kabi-kabilang pasimpleng pangangampanya.

Nagsisimula na rin ang batuhan ng mga maaanghang na paliwanagan mula sa iba’t ibang partido, grupo at indibidwal dahil bahagi naman talaga ito ng sistema ng pulitika, lalo na ang pagpapalabas ng propaganda na lalong nagpapainit sa nalalapit na halalan.

Mas nauna na ang pagpapalabas ng kung anu-ano’ng pahayag tungkol sa eleksiyon kumpara sa pagsasapinal ng Commission on Elections (Comelec) hinggil sa panuntunan kung magkakaroon ba ng face-to-face campaign o aasa na lamang ang lahat sa social media, radyo at telebisyon.

Malaki ang problemang kinahaharap sa darating na kampanya ng mga kandidato kung iaasa sa social media ang kampanya dahil hindi talaga maaasahan ang sisinghap-singhap na koneksiyon ng internet, partikular sa mga bulubunduking bahagi ng mga lalawigan.

Hindi naman kakayanin ng mga kandidato mula sa lokal ang gastos kung ang kanilang propaganda sa kampanya ay gagamitin ang radyo at telebisyon dahil sa sobrang napakamahal at higit sa lahat ay siksikan na pagdating mismo ng panahon ng kampanya.

Ang lahat ng ito ay isinasaalang-alang na sa panahong ito bilang paghahanda sa darating na halalan, ngunit tila hindi napagtutuunan ng pansin ang kalagayan ng ating mga senior citizen at iba pang vulnerable na sektor na pinanghihinaan na rin ng loob at marami ang takot nang bumoto.

Alam naman nating lahat kung gaano kalupit ang pananalasa ng Delta variant at isa ito sa pinangangambahan ng mga senior citizen at ilang kabilang sa vulnerable sector tulad ng PWD (People With Disability) at iba pang may problema sa kalusugan.

Kaya lahat ngayon ay pinagsisikapan nating mapadali para sa kanila, maging ang pagtungo sa mga presinto para makaboto ng ligtas at mas madali ang proseso para makahikayat pa tayo ng mas maraming botante sa darating na 2022 elections.

Kailangang makapiling natin ang mga may edad at may karamdaman sa ating lipunan at masigurong hindi sila mahihirapan sa pakikilahok nila sa halalan upang hindi masayang ang kanilang partisipasyon sa pinakaimportanteng democratic exercise sa bansa.

Nang tinalakay ang Senate Bill 2216 noong nakaraang linggo ay hinimay at inusisa natin ang mga detalye para higit na maliwanagan ang kahalagahan ng kanilang pagdalo sa eleksiyon ng ligtas.

Ang SBN 2216 sa ilalim ng Committee Report na inilatag ng Committee on Electoral Reform and People’s Participation ay naghahanap ng mas magaan na paraan upang makaboto ang senior citizens, persons with disabilities (PWD), buntis at Indigenous Peoples (IPs).

Ang naturang panukala ay naglalayong makaboto ng mas maaga ang mga nabanggit na sektor sa loob ng two to thirty days bago ang mismong araw ng halalan sa mga lugar o establisimyento na madaling puntahan.

Kung papayagan kasi natin ang ating mga senior citizen at iba pang vulnerable sector na makaboto ng mas maaga kumpara sa itinakdang araw ay malaki ang mababawas sa pila sa mismong araw ng eleksiyon, labing-apat na porsiyento kasi ng botante ay senior citizen kaya hindi nila kailangang makipagsiksikan.

Base sa datos na inilatag ng Komite na pinamumunuan ni Senador Imee Marcos, ang napakababang turnout ng mga botante mula sa edad na 60 pataas bago pa man ang banta ng pandemya ay kulang-kulang tatlong porsiyento lamang ng walong milyong rehistradong senior citizens ang aktuwal na nakaboto noong 2019 elections.

Hindi rin tayo kampante sa kapasidad ng Commission on Elections (Comelec) kung kaya nilang magsagawa ng matagumpay na postal voting para sa nalalapit na presidential elections kaya tuluyan na itong ibinasura ng Komite. Maging tayo ay may mga agam-agam sa postal voting kaya’t talagang mas magandang isasantabi muna ito at pag-aralan pa nang husto.

Imbes na postal voting, itinutulak ng Komite na magkaroon din ng ligtas at maayos na Special Area sa mga polling places na eksklusibo para sa mga senior, PWD, at vulnerable sector sa mismong araw ng botohan. Ito ay para mapangalagaan ang kanilang kalusugan, at matiyak ang madaling access sa pagboto nang sila’y mahikayat na bumoto.

Sinisikap ng Senado na maipasa ang panukalang ito para mabigyan ng maayos at ligtas na paraan ang ating mga kababayang nabibilang sa nabanggit na sektor. Kung ito ay tuluyang maipapasa, malaking bagay ito sa ating mga botanteng nais lumahok sa halalan, ngunit dahil sa kasalukuyang pandemya ay nangangambang lumabas at bumoto.

Hindi imposibleng maging super spreader pa ng COVID-19 ang isasagawang eleksiyon na huwag naman sana, at delikado ito para sa kalagayan ng mga senior citizen at vulnerable sector kung hindi agad maisasaayos ang sistema!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com