Panawagan ng simbahan, ‘wag gawing commercial celebration ang Pasko

ni Bong Revilla - @Anak ng Teteng | September 13, 2021

Sa paglipas ng panahon ay mabilis na nagbabago ang lahat at isa sa tila nagkakaisang nais na mangyari ng marami sa ating mga kababayan ay ang simulan na ang pagdiriwang ng Kapaskuhan sa pagpasok pa lamang ng ‘ber’ months.

Maging ang mga radio at television personalities na may malaking impluwensiya sa mga bagay-bagay at kaganapan sa ating kapaligiran ay tila nagkakaisa rin sa pagsasabing ‘ber’ months na at simula na ito ng pagsalubong sa Kapaskuhan.

Paulit-ulit ding naririnig sa kanila at maging sa mga komento sa social media na ang Pilipinas ang may pinakamahabang selebrasyon ng Kapaskuhan sa buong mundo at tila unti-unti na nga natin itong pinangangatawanan.

Hindi malaman kung paano ito nagsimula at hindi ito opisyal, ngunit ang unti-unting pagyakap ng mga Pilipino sa ‘ber’ months ay isang malaking tagumpay sa panig ng mga negosyante na siyang orihinal na nagpasimuno para hikayatin ang marami na mamili at maghanda ng maaga para sa araw ng Pasko.

Wala namang masama na magkaroon ng bagong pagdiriwang tulad ng ‘ber’ months dahil maging sa social media ay regular nang nakikita ang mukha ng singer na si Jose Mari Chan na ilang araw sumisilip bago ang ‘ber’ months at sa unang araw ng September ay naririnig na ang mga Christmas Song sa radyo at telebisyon.

Idagdag pa rito ang isinasagawang countdown sa mga programa sa radyo at telebisyon na araw-araw ay nagdadagdag sa pagkasabik ng mga taong may panggastos sa darating na Kapaskuhan at nagdudulot naman ng pangamba sa mga kababayan nating salat sa kakayahan.

‘Ber’ months din nagsisimula ang magpatugtog ng mga Christmas song sa mga shopping mall at iba pang pamilihan at naglipana na rin ang mga nagbibenta ng parol at naka-display na ang mga ito sa gilid ng kalye kasabay ng pagpatay-sindi ng mga ilaw.

Hindi na maawat ang sistemang ito ng ‘ber’ months at tila nabalewala na nga at natabunan na ang popularidad ng araw ng mga patay na ipinagdiriwang tuwing Nobyembre 1 na saglit na lang iniraraos dahil panahon naman ito para makapaghandog ng bulaklak at kandila ang marami nating kababayan.

Pero alam n’yo ba na may panawagan ang Simbahang Katoliko na hindi tama ang ‘ber’ months o ang mahabang pagdiriwang ng Kapaskuhan at hindi umano dapat gawing commercial celebration ang Araw ng Pasko.

Ang nagbigay ng paalala hinggil dito ay si Catholic Bishops’ Conference of the Philippines President, Kalookan Bishop Pablo Virgilio David, na tila nababahala sa maagang pagsisimula ng pagdiriwang ng Kapaskuhan sa tuwing sumasapit ang buwan ng September.

Pinaninindigan ni Bishop David na hindi kailanman hinihikayat o sinusuportahan ng Simbahan ang maagang pagsisimula ng Pasko sa bansa dahil taliwas umano ito sa Liturgical calendar ng Simbahang Katoliko.

Wala umanong kinalaman ang Simbahan kung paano nagsimula ang ‘ber’ months celebration sa bansa o ang pagpasok ng September, October, November at December –- apat na buwan bago mag-Pasko dahil isa umano itong malaking pagkakamali at mariing tinututulan ng Simbahan.

Bago pa umano ang pagdiriwang ng Pasko tuwing buwan ng Disyembre ay may ginugunita pang panahon ng Adbiyento na apat na linggong paghahanda sa araw ng pagsilang ng Anak ng Diyos na si Hesus at ito umano ang pinakamakahulugang paghahanda sa pagdiriwang ng Pasko.

Pero dahil umano sa pagsasamantala ng mga negosyante ay nasisira ang liturgical season dahil lamang sa komersiyalisasyon na sa halip na bigyang-pansin ang kabanalang bahagi ng pagdiriwang ay inuuna ang pangungumersyo sa tao gamit ang Pasko.

Pagkatapos umano ng Adbiyento ay nagsasagawa pa ng nobenaryo na napakahalaga dahil bahagi ito ng malaking paghahanda para sa mismong araw ng Pasko, ngunit ang lahat ng ito ay nababalewala dahil sa maling pagdiriwang.

Hindi naman tayo maaaring makipag-argumento sa paliwanag ng Simbahan dahil mas higit ang kanilang kaalaman sa mismong kapanganakan ng Panginoong Hesus at kung bakit dapat nating gunitain ang naturang pagdiriwang.

Kung may nakikitang mali ang Simbahan sa mahabang selebrasyon ng mga Pilipino sa Kapaskuhan ay mas higit ang kanilang karapatan para ituwid ang makabagong kasanayan dahil sila ang itinalaga at nagturo sa mundo kung bakit may Araw ng Pasko.

Wala naman tayong nakikitang pagkakamali kung magkaroon ang mga Pilipino ng bagong kasiyahan o pagdiriwang tulad ng ‘ber’ months basta’t huwag na lamang nating iuugnay ang naturang selebrasyon sa mismong kapanganakan ni Hesus dahil taliwas umano ito sa Simbahan.

Puwede rin namang ituloy ang kasiyahang nararamdaman ng lahat patungkol sa ‘ber’ months at puwede na lamang natin itong tawaging ‘ber’ months celebration bago magbagong taon para magkaroon ng dahilan na puwede nang magpatugtog ng Christmas song.

Pero tandaan nating mabuti na ayaw ng Simbahan na iugnay natin ito sa banal na pagdiriwang tulad ng Araw ng Pasko at huwag tayong mag-imbento ng sarili nating estilo ng pagdiriwang dahil may umiiral na panuntunan ang Simbahan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Napakaraming buhay ang muntik nang masira

ni Bong Revilla - @Anak ng Teteng | September 10, 2021

Napakaraming buhay ng ating mga kababayan ang naisalba sa tiyak na kapahamakan bunga nitong operasyon ng Philippine Drug Enforcement Agency (PDEA) at Philippine National Police (PNP) noong Martes.

Tila hindi maubus-ubos ang salot ng lipunan na patuloy sa pagpapakalat ng droga na kahit tinutugis ng maykapangyarihan ay walang takot na sinisira ang kaisipan at kinabukasan ng kabataan kapalit ng malaking kita.

Itinatayang nasa 500 kilo ng ‘shabu’ o crystal meth ang nasakote ng mga Anti-narcotics operatives sa buy-bust operation sa Zambales na nagresulta sa pagkasawi ng apat na Chinese national na pinaniniwalaang bahagi ng ‘big-time drug syndicate’.

Nakilala ang mga nasawi na sina Gao Manzhu, 49-anyos; Hong Jianshe, 58; Eddie Tan, 60, na lahat ay pawang nagmula sa Fujian, China; at isang Xu Youha, 50, na mula naman sa Quezon City na kapwa nagtamo ng mga tama ng baril sa iba’t ibang bahagi ng katawan.

Ayon sa PNP, ang naturang operasyon ay isinagawa ng PDEA sa pamamagitan ng impormasyong ibinahagi ng Intelligence Service ng Armed Forces of the Philippines (ISAFP), ang National Intelligence Coordinating Agency (NICA) at ng Bureau of Customs (BOC).

Ibig sabihin, hindi basta-basta ang naisagawa nilang trabaho dahil kinailangan itong paggugulan ng napakahabang panahon para lamang sa isinasagawang surveillance operation para makabisado ang galaw ni Xu Youha na isa sa pinakamalaking galamay ng illegal drugs activities sa bansa.

Naisakatuparan ang napakadelikadong misyon bandang alas-11:30 ng umaga noong Martes sa Barangay Libertador, Candelaria, Zambales matapos na magpanggap ang operatiba ng pamahalaan na bibili ng isang kilong shabu sa grupo ni Xu Youha kasama ang tatlo pang salarin.

Sa gitna ng negosasyon ay nagkahalataan na buy-bust operation ang naturang drug deal kaya nagkaroon ng habulan na humantong sa palitan ng mga putok na nagreulta nga sa pagkasawi ng mga salarin.

Nakuha sa naturang operasyon ang 500 kilo ng shabu na nagkakahalaga ng tumataginting na P3.4 bilyon at kabilang sa mga nakumpiska ang apat na baril, isang kotse, apat na cellphone at dalawang Chinese passports.

Lumalabas na ang nakumpiskang droga ay pinalusot sa bansa sa pamamagitan ng pagdaan sa international waters na kalaunan ay sinasalubong ng maliliit na bangka na siya namang naghahatid sa mga coastal area para hakutin naman ng mga lokal na illegal drugs distributors.

Malaki ang tulungang naganap sa pagitan ng iba’t ibang sandatahang lakas ng bansa dahil maging ang PNP ay nagpakalat ng mga helicopters at speedboats upang umasiste sa pagtugis sa bangka kung saan nakumpiska ang bulto-bultong droga sa karagatang bahagi ng Zambales.

Isang oras lang ang nagdaan ay panibagong bulto na naman ng shabu ang nasabat ng operatiba ng pamahalaan sa m checkpoint sa bayan ng Hermosa, Bataan kung saan karagdagang 80 kilo na na naman ang nakumpiska sa pag-iingat ng tatlo ring Chinese nationals.

Umabot sa halagang P544 milyong halaga ng shabu ang nakuha sa pag-iingat ng mga nasakoteng salarin na sina Qing Chang Zhou, 37 anyos; Cai Cai Bin, 49; at Longcai Chang, 45 na lahat ay tubong Fujian, China at residente ng Binondo, Manila.

Sa kabuuan ay umabot ng halos P4 bilyon halaga ng shabu ang nakumpiska na pinakamalaki sa lahat ng nasakote para sa taong 2021 at inaasahang madaragdagan pa dahil hanggang sa kasalukuyan ay patuloy pa rin ang isinasagawang operasyon para sa posibleng kasabwat pa ng mga salarin.

Alam ba ninyong bago pa man naisagawa ng naturang operasyon ay anim na suspek din ang nasakote nang salakayin ng operatiba ng pamahalaan ang drug den sa Zambales noong nagdaang Marso ng taong kasalukuyan.

Unang linggo ng Abril ng taon ding ito ay sampung salarin naman ang naaresto ng pinagsanib na puwersa ng PNP at PDEA nang salakayin ang isa na namang drug den sa nabanggit ding lugar.

Nitong nagdaang Agosto lamang ay limang salarin din ang nadakip sa drug den na hinihinalang responsable sa pagpapakalat ng droga sa isang barangay din sa Zambales at napakarami pa ng mga insidenteng nabuwag ng maykapangyarihan ang operasyon ng ilegal na droga sa bansa.

Sa dami ng mga nasasakoteng droga na hindi na nakakapanira ng buhay ng ating mga kababayan ay dapat nating bigyan ng pagpapahalaga at papuri ang operatiba ng ating pamahalaan dahil kung hindi sa kanilang pagpupunyagi araw at gabi ay hindi masasabat ang ganito kalalaking halaga ng ‘shabu’ na nakatakda sanang ikalat ngayong Kapaskuhan.

May nakakalusot mang droga sa iba’t ibang barangay hanggang sa maliliit na bayan ng mga lalawigan sa bansa, hindi na ganung ka-talamak at patuloy na itong tinutugis.

Hindi man maubos ang mga gahamang walang pakialam kahit makasira ng buhay basta’t kumita lamang ng malaking pera, sama-sama naman tayong lumalaban sa problemang ito ng bansa.

Isang panawagan lang sa PDEA, bantayn niyong mabuti yang nakumpiska ninyo, at kumuha nang agad ng permiso sa korte na sirain. Nang walang makapagsabi pa na baka mapalitan at umabot pa sa lansangan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Proseso ng pag-aampon, mas pinadali na!

ni Bong Revilla - @Anak ng Teteng | September 08, 2021

Sa wakas ay pumasa na sa ikatlong pagbasa sa Senado ang panukalang-batas na naglalayong mapadali ang proseso ng pag-aampon ng legal na matagal nang binabalewala ng marami nating kababayan dahil sa masalimuot at komplikadong pag-ayos ng dokumento.

Ang Domestic Administrative Adoption and Alternative Child Care Act of 2021 o ang Senate Bill 1933 ay pumasa dahil sa pagkakaisa at pagsang-ayon ng mga Senador na umani ng 22 affirmative votes.

Ang naturang panukala ay pinagsamang dalawang batas na iniakda ni Sen. Mary Grace S. Poe-Llamanzares at ng inyong lingkod na ilang panahon din naming pinagtuunan ng panahon upang ipagtanggol ang kahalagahan nito at sa malaon at madali ay inasahan naming magiging isa na itong ganap na batas.

Ang pinagsamang bersiyon ay naglalayong ibasura na ang napakahabang proseso na may kinalaman sa judicial adoption sa pamamagitan ng pagbibigay pahintulot sa domestic adoption patungo sa administratibong proseso.

Nakasaad sa ilalim ng naturang panukala na ang sobrang haba ng panahong ipinaghihintay ng mga magulang na nais mag-ampon ay panahon na upang matigil na mula sa kung ilang taon ay maging anim hanggang siyam na buwan na lamang.

Lumalabas sa kasalukuyang sistema na nasa 60 porsiyento lamang adoption cases sa bansa ang natapos ang proseso sa loob ng isa hanggang tatlong taong paghihintay at mas maraming kaso ang umaabot pa ng apat na taon o mas matagal pa.

Dahil sa ganitong sistema ay hindi maiiwasang marami ang mga magsasamantala sa sitwasyon na pinagkakakitaan pa ng ilan at marami tayong natatanggap na ulat na maraming mga pamilya ang gumagastos ng daan-daang libong piso o higit pa dahil sa napakahabang proseso.

Nasa mandato rin ng naturang probisyon na gawing simple, pagaanin, bawasan ang gastusin sa administratibong pagpuproseso ng pag-aampon na pamamahalaan na ng bagong government body na National Authority for Child Care (NACC).

Libu-libo kasing bata ang basta na lamang inabandona ng kani-kanilang mga magulang o kusang isinuko na ang pagiging magulang dahil sa kahirapan o iba pang kadahilanan tulad ng hindi inaasahang pagkamatay ng mga magulang at marami pang iba.

Ngunit nakatataba ng puso at maipagmamalaki natin bilang Pilipino na marami sa ating mga kababayan ang handang tumangkilik ng mga batang hindi nila kadugo at handang magbigay ng pagmamahal at magandang kinabukasan.

Kaso marami sa ating mga kababayan ang idinadaan sa shortcut ang pag-aampon dahil nga bukod sa magastos ay napakalaking abala pa sa mga nagmamalasakit sanang magulang pero sila pa ang mas pinahihirapan ng sistema.

Karaniwan nang ipinaparehistro sa Philippine Statistic Authority (PSA) ang mga panagalan ng inampong bata at diretso nang inilalagay na sila ang legal na magulang sa pakikipagsabwatan ng ilang kumadrona na karaniwang nagpapaanak sa mga liblib na lugar.

Mabilis ang prosesong ito, ngunit ito ay ilegal dahil sa hindi ito ang tamang proseso ng pag-aampon at posibleng maharap sa kaso ang mga gumawa ng ganitong sistema sakaling dumating ang panahon na may maghabol o magsampa ng reklamo.

Nakapaloob ang procedural safeguards sa naturang panukala ang pagbibigay-proteksiyon sa kalagayan ng bata kabilang na ang kinakailangang home study at case study ng social worker sa bawat aplikasyon sa pag-aampon.

Papatawan ng kaukulang parusa ang sinumang mang-abuso at magsasamantala sa mga bata kabilang na ang pagmamaniobra ng kapanganakan, pagsusumite ng kahina-hinala o maling detalye sa pagpaparehistro ng birth certificate kabilang na ang pagtatala ng hindi tunay na mga magulang.

Kung agad na magiging batas ang iniakda naming panukala ni Sen. Poe ay malaking tulong ito upang maibsan ang mga gastusin at pagkakapatung-patong ng mga nakabinbing kaso sa korte dahil nga sa napakakumplikado ng proseso.

Matutulungan din ng naturang panukala ang may 4,943 bata na nasa pangangalaga ng kasalukuyan ng Department of Social Welfare and Development (DSWD) na lahat ay umaasahang isang araw ay may magbibigay sa kanila ng permanentang tahanan.

Kaya sa mga mag-asawa na walang anak o mga magulang na nais pang magdadag ng anak sa pamamagitan ng pag-aampon ay huwag na kayong mag-atubili kung legalidad lang ang pag-uusapan dahil sa pinadali na natin ang proseso sa legal na paraan.

Nakatatakot nga kasing basta-basta na lamang mag-aampon ng bata ng walang kaukulang dokumento dahil nagmagandang loob ka na, pero kapag minalas ka ay sa kulungan ka pa mapupunta, pero ngayon hindi na!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com