Kaabang-abang ang ikatlong SONA ng Pangulo

ni Bong Revilla @Anak ng Teteng | July 22, 2024

Kaabang-abang ang ikatlong State of the Nation Address (SONA) na isasagawa ngayong araw ni Pangulong Ferdinand Bongbong Marcos, Jr. (PBBM). Inaasahan natin ang mga positibong pag-uulat hinggil sa mga naisakatuparang programa, gayundin ang pagtugon ng pamahalaan sa mga suliranin at hamong kinakaharap ng bansa. 

Malaki ang tiwala ko na muling magbibigay ang Presidente ng komprehensibong ulat sa taumbayan ukol sa mga nagawa ng administrasyon sa nakalipas na taon bilang tugon sa mga isyu na nangangailangan ng agarang atensyon. Ilan diyan ang pagpapababa sa presyo ng mga bilihin, pagsasaayos ng sahod at trabaho, food security, pagsusulong ng katarungang panlipunan, at pagpapalakas ng ating pambansang seguridad. 

Umaasa akong magiging kalakip din nito ang mga hakbangin na gagawin pa ng ating Pangulo para sa pagpapatuloy ng kanyang mga magagandang naabot sa loob ng unang dalawang taon ng kanyang panunungkulan. 

Base sa ulat na inalabas ng Pulse Asia nitong buwan ng Hunyo, 2024, ang pagpapabagal ng inflation ay nananatiling pangunahing concern ng taumbayan. Ayon kasi sa survey, 72% ng nakatatandang Pinoy ay naniniwala na ang patuloy na pagtaas ng mga bilihin ay nangangailangan ng agarang solusyon. 

Kaya nga handa na tayo na mapakinggan ang SONA ng Pangulo upang mabatid natin kung ano ang sasabihin at plano niya ukol dito. 

Kung titingnan ang mga datos na hawak ng ating economic managers, pasok pa naman ang kasalukuyang target inflation rate na 2-4%. Ang inflation rate kasi nitong Hunyo 2024 ay nasa 3.7%, kumpara noong Hunyo 2023 na ang headline inflation rate ay nasa 5.4%. Ipinapakita nito na may ginagawa ang administrasyon. 

Kumpiyansa rin ako na tatalakayin ni PBBM ang kasalukuyang kalagayan at kung saan tayo patungo sa usapin ng food security. 

Sa loob ng nagdaang taon, nakita natin ang mga pagsisikap ng administrasyon para mapayabong ang agrikultura katulad ng pagtatalaga ng bagong kalihim sa Department of Agriculture na tututok sa sektor, pagpasa ng batas na muling bubuhay at magpapalakas sa industriya ng pag-aasin, pag-aabot ng tulong pinansyal sa mga magsasaka at mangingisda, at marami pang iba. 

Pakikinggan natin kung ano pa ang gagawin at mga ipagpapatuloy para masiguro na may sapat na pagkain sa hapag ng bawat Pilipino. 

Nais din nating pasalamatan ang Pangulo dahil sa pag-apruba niya sa mga ipinasa nating batas nitong nakalipas na taon na malaking tulong sa ating mga kababayan — tulad ng pagbibigay ng  P10,000 cash sa mga senior citizens na aabot sa edad na 80, 85, 90, at 95, bukod pa sa buong P100,000 kung aabot naman sa 100 years old. 

Inaprubahan ng Pangulo ang isa pa nating iniakda na Kabalikat sa Pagtuturo Act (RA 11997) na naglalayong bigyan ang mga pampublikong guro ng teaching allowance at taasan mula P5,000 patungong P10,000. 

Inaprubahan din ng Chief Executive ang isa pa nating batas na No Permit, No Exam Prohibition Act (RA 11984) na nagbabawal sa mga unibersidad na ipatupad ang “no permit, no exam” policy dahil hayagang panggigipit ito sa ating mga kababayan. 

Kasunod nito ay iniakda natin ang Free College Entrance Examinations Act (RA 12006) na aprubado na rin kamakailan ng Pangulo kung saan inaatasan ang lahat ng unibersidad na huwag nang singilin ang mga mag-aaral na nais kumuha ng entrance examination maging pribado man o pampublikong kolehiyo basta’t masunod lamang ang umiiral na requirements. 

Muli akong nagpapasalamat kay Pangulong Marcos sa pag-apruba ng mga panukala ko para isulong at palawakin pa ang katarungang panlipunan. Sana rin ay mabanggit sa SONA ang pagsasaayos ng sahod ng mga manggagawa. 

Sa huli, ito ang isa sa mga pinakainaasahan ko ay ang pagtalakay ng Pangulo sa pagpapaigting ng ating pambansang seguridad. I am confident that he will share to the Filipino people what his administration is doing to bolster national security. Eager na akong pakinggan ang sasabihin ng Pangulo ngayong Lunes, at ang mga susunod na hakbang natin tungo sa Bagong Pilipinas. 

Samantala, wala tayong dapat ipag-alala dahil sa tiniyak ng Presidential Security Command ang seguridad ni PBBM sa ikatlong SONA nito sa plenaryo ng Kamara de Representantes sa Batasang Pambansa Complex ngayong araw na ito. 

Nabatid na nasa 1,400 na mga PSG personnel ang ipapakalat para sa SONA ni Pangulong Marcos. 

Bukod pa ito sa 22,000 pulis at 2,700 force multiplier na magbabantay sa SONA. 

Sa kabuuan ay inaasahang magiging matagumpay ang SONA liban sa regular na protesta na karaniwang ginagawa laban sa kahit na sinumang Pangulo na nagsasagawa ng SONA sa bansa. 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

HIV cases tumataas, sexual health at gender sensitivity, ituro na sa iskul

ni Bong Revilla - @Anak ng Teteng | June 07, 2023

Nakaaalarma ang sunud-sunod na ulat hinggil sa mabilis na pagkalat ng human immunodeficiency virus (HIV) sa kabila ng walang humpay na paalala ng Department of Health (DOH) hinggil dito.

Hindi ko ma-imagine na umabot sa 1,240 ang bagong kaso ng HIV na naitala sa buwan lamang ng Abril base mismo sa HIV/AIDS Registry of the Philippines na isang kahindik-hindik na pangyayari.

Lumalabas na ang average na kaso ng HIV sa buwan ng Abril ay pumapalo sa 50 katao ang nahahawa araw-araw at umabot sa 101 indibidwal ang nasawi dahil sa HIV infection sa nabanggit ding buwan.

Sa mga naitalang bagong kaso, natukoy ng DOH na 335 sa mga ito ay dati nang may HIV infection nang isagawa ang diagnosis at tinatayang may mataas pang bilang ang hindi pa natutukoy sa mga kabataang nahihirati ng walang takot sa pakikipagtalik.

Sa bagong 1,219 kaso ay nakumpirmang nahawa ang mga ito sa pakikipagtalik na siyang may pinakamataas na insidente ng patuloy na pagkalat ng HIV/AIDS.

Nasa 869 ang bagong kaso ng HIV sa mga lalaking nakikipagtalik sa kapwa lalaki o MSM (men-having-sex-with men), nasa 183 naman ang kaso ng bisexual -- ito ang lalaki o babaeng puwedeng makipagtalik sa kahit anong kasarian at nasa 167 naman ang kaso ng pagtatalik ng lalaki sa babae.

Iba-iba kasi ang sitwasyon para mahawa ng HIV, ito ay ang pagkahawa sa pamamagitan ng paggamit ng infected needles; mother-to-child transmission, pakikipagtalik ng walang proteksiyon, pagsasalin ng dugo at iba pa.

Ayon sa DOH, two-thirds ng bagong kaso ng HIV ay mula sa limang rehiyon: Metro Manila na may 270 kaso; 265 kaso mula sa Calabarzon, 130 kaso mula sa Central Luzon, 96 kaso mula sa Davao region at 74 kaso mula sa Western Visayas.

Sa mga nabanggit na rehiyon nagmula ang 67 porsyento ng kabuuang bilang ng napaulat na kaso ng HIV na naitala sa buwan lamang ng Abril na kung hindi tayo kikilos ay posibleng tumaas pa ang mga kaso sa darating na mga araw.

Sa lalawigan ng Aklan lamang ay nagtala ng 26 bagong kaso ng HIV mula Enero hanggang Marso ng taong kasalukuyan kung saan dalawa na sa mga ito ang kinumpirmang nasawi ng DOH dahil sa kumplikasyon.

Dahil sa pinakahuling ulat na ito ay umabot na sa 34 ang binabawian ng buhay dahil sa iba’t ibang kumplikasyon ng HIV-Acquired Immune Deficiency Syndrome (AIDS) mula noong 1986.

Base pa sa pinakahuling datos na inilabas ng DOH, may 501 kumpirmadong kaso ng HIV sa lalawigan ng Aklan mula 1986 hanggang nitong nagdaang Marso 2023 at karamihan dito ay sanhi ng men-having-sex-with men (MSM).

Nitong Marso, umabot sa 2,078 ang nagpositibo sa HIV sa buong bansa o umabot sa 35 porsyento ng pagtaas kumpara sa parehong panahon noong 2022 na isang indikasyon na patuloy ang pagtaas.

Hindi natin tinitingnan bilang kabiguan sa panig ng DOH, ang pagtaas ng kaso ng HIV ngunit kailangan nating paigtingin ang mga hakbangin kung paano maiibsan kung hindi man tuluyang mapipigil ang HIV.

Kailangang mabawasan ang stigma sa pamamagitan ng edukasyon, dapat palakasin ang kamalayan hinggil sa sexual health lalo pa at nasasadlak sa maling pagtrato at itinuturing na nakagawa ng matinding pagkakasala at imoralidad ang mga nahawa sa HIV.

Napapanahon na rin na ang sexual health at gender sensitivity education ay dapat nang isama sa school curriculums at dapat na ituro ng mga sinanay na teacher nang naaayon sa edad at kinagisnang kultura at hindi makasisira o makaaapekto sa pananampalataya ng bawat isa.

Dagdagan din ang pagpapakalat ng kaalaman hinggil sa mga health care providers na handang tumulong sa mga may sintomas ng HIV at maiparating sa lahat ang kahalagahan ng early HIV detection at ang HIV infection ay isang chronic manageable disease.

Dapat ding pag-ibayuhin pa ang medical knowledge tungkol sa HIV ng mga medical at nursing students kasabay ng pagkalinga sa mga sociocultural challenges na kinakaharap ng mga taong kasalukuyang nagdurusa dahil sa sakit na HIV.

Palakasin ang mga programa at idetalyeng mabuti kung paano makakapag-ingat ang isang indibidwal na makaiwas sa naturang sakit at kung paano ito paglalabanan sakaling nahawa na.

Higit sa lahat ay palakasin natin ang moralidad ng ating mga kabataan upang bago pa sila masadlak sa sitwasyong hindi na sila puwedeng umatras ay magkaroon sila ng pagkakataong makapag-isip at hindi na humantong sa pagsisisi.

Halos lahat naman kasi ay alam na ang kahihinatnan kung makikipagtalik nang walang proteksyon ngunit tinatalo ang karamihan ng kapusukan at nagsisisi na lamang sa huli.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

‘Pinas, isa sa mga bansang may pinakamaraming basura sa karagatan

ni Bong Revilla - @Anak ng Teteng | October 13, 2021

Nakakapangilabot isipin na sa gitna ng pandemyang ito na napakaraming tao ang binabawian ng buhay ay may mga paggalaw pa tayong nararamdaman mula sa maraming bansa upang literal na iligtas ang ating mundong ginagalawan.

Positibo ang mga hakbanging ito na mailigtas ang kinabibilangan nating planeta sa pamamagitan nang pag-uumpisa sa pagbibigay-proteksiyon sa marine ecosystems ng mga rehiyon na sumasakop sa halos kalahati ng katubigan sa buong mundo.

At napakalaki ng papel na gagampanan ng mga bansa sa Southeast Asia upang mapagtanto ng marami na panahon na para isagawa ito at marating ang mithiing maisalba ang buong daigdig sa tiyak na kapahamakan.

Dahil sa pagtuon sa biodiversity sa mga rehiyon, ang mga estadong kaanib ng Association of Southeast Asian Nations (Asean) ay isinusulong na magkaroon ng sama-samang pagkilos upang matagumpay na marating ang pandaigdigang mithiin na maisalba ang kahit 30-porsiyento ng planeta sa 2030.

Kahit panahon ng pamdemya, nanawagan ang Asean Centre for Biodiversity (ACB) na humanap ng paraan ang mga bansang kaanib na bumuo ng pagsasama-sama upang mapalakas ang kapasidad na maisalba ang marine resources sa mga rehiyon.

Maging ang mga naninirahan sa malapit sa mga karagatang nagkokonekta sa Asean ay nananawagan din ng pagkakaisa para matugunan ang climate crisis kasabay ng maayos na pamamahala sa ating biodiversity.

Ang karagatan na nagdudugtong sa Southeast Asia ang nagsisilbing tahanan ng mga yamang-tubig kabilang na ang mga coral reefs, mangroves, estuaries, sandy at rocky beaches, sea grass, seaweed beds, at iba pang komunidad na nasa ilalim ng karagatan.

Ang pinamamahayan at ang mga residenteng species na siyang nagpaparami ng lahi, nangangalaga at nagsisilbing feeding ground para naman sa mga isda at iba pang nabubuhay sa karagatan kabilang na ang halamang-dagat ay mahalaga para sa kabuhayan ng coastal communities.

Hindi lang ‘yan dahil may pag-aaral na posibleng umabot na sa 500 milyon katao ang inaasahang magtatayo ng mga tahanan malapit sa mga dalampasigan, partikular sa coastal at marine areas ng Southeast Asia na magdadagdag ng malaking problema sa polusyon.

Kaya kung magpapatuloy ang pang-aabuso ng mga tao sa kalikasan at mga yamang-dagat, kabilang na ang climate change ay malaking banta ito para sa pagkawasak ng ecosystem ng malawak na karagatan.

Kaya mabuting hindi nagpapahuli ang Pilipinas pagdating sa mga ganitong pagkilos dahil pangungunahan ng Department of Environment and Natural Resources (DENR) ang national plan of action (NPOA) upang matulungang mapigilan, mabawasan at mapamahalaan ang dumi sa karagatan sa bansa.

Nakatakda itong ilunsad sa Nobyembre ng taong kasalukuyan upang maitaas ang kamalayan sa pagtutulungan hinggil sa responsabilidad, pananagutan at pakikilahok sa pamahalaan upang matugunan ang matagal ng problema ng bansa sa mga basurang nagkalat sa karagatan.

Hindi na kasi basta dumi ang matatagpuan sa mga karagatan tulad ng kalawang na bakal, sirang gamit, plastic materials at marami pang iba na sandyang inabandona sa gitna ng karagatan at ngayon ay dumagdag pa ang araw-araw na pagkakalat ng itinapong facemask.

Ayon sa Environmental Management Bureau ng DENR ay target nila ang zero waste sa karagatan ng bansa sa taong 2040 at hindi malayong ito ay maiskatuparan kung seryoso lamang nilang gagawin ang napakaganda nilang hangarin.

Naalarma kasi ang DENR matapos lumabas ang ulat mula sa international studies na tinutukoy ang Pilipinas na isa sa mga nangunguna sa maraming bansa na may pinakamaraming basura sa karagatan.

Nasa ikatlong puwesto tayo sa may pinakamaraming basura sa malawak na bahagi ng ating karagatan at tinatayang nasa 0.8 milyong metric tons ng plastic marine debris ang nahahakot o nakukuha sa karagatan bawat taon.

Ito ang kagandahan sa DENR dahil hindi sila pumapayag na makaladkad ang pangalan ng bansa dahil sa kapabayaan kaya agad silang naglabas ng mga makabagong estratehiya para maging malinis ang ating karagatan.

Maganda ang inihandang plano ng DENR dahil palalakasin pa nila ang pagrekober sa mga basura, may mga recycling coverage pa at tutukan na ang pagtukoy sa mga daluyang kumakatas ng masangsang na amoy mula sa mga basura na karaniwang nanggaling sa mga pabrika o establisimyento.

Hindi ba’t ilang taon na ang nakararaan nang madiskubre ng pamunuan ng DENR na maraming bahagi ng ating karagatan na malapit sa mga establisimyento ay may mga nakabaong tubo patungo sa dagat at dito pinapalusot ang iba’t ibang klase ng dumi.

Pero lumalabas na hanggang ngayon ay marami pa rin ang nagpapalusot dahil likas na may mga kababayan tayong walang pakialam kahit makaperwisyo ng kapwa basta’t makapagpalusot lamang.

Maganda rin na palakasin ang mga lokal na pamahalaan at ibang grupo ng ating mga kababayan para pagtulungan na matugunan na maging malinis ang ating karagatan at paigtingin ang kamalayan hinggil sa pagpapatupad ng RA 9003 o ang Ecological Solid Waste Management Act.

Matindi na ang kinahaharap natin sa pandemyang ito at marami na ang binawian ng buhay, sana lang ay huwag na tayong umabot na may magbuwis na naman ng buhay dahil lang sa pagkasira ng kalikasan at ng ating daigdig. Sama-sama nating iligtas ang mundo para sa susunod na lahi!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com